Números 23:1-30
23 Tuirmai Balám dehan ba Balak: “Harii altár hitu iha fatin neʼe,+ no prepara karau-aman hitu no bibi-malae aman hitu ba haʼu.”
2 Balak halo tuir kedas buat neʼebé Balám hatete. Balak ho Balám hasaʼe karau-aman ida no bibi-malae aman ida iha altár ida-idak.+
3 Tuirmai Balám dehan ba Balak: “Hein lai iha neʼe besik ó-nia sakrifísiu sunu nian, no haʼu sei bá. Karik Jeová sei mosu ba haʼu. Buat naran deʼit neʼebé nia fó sai mai haʼu, haʼu sei fó-hatene ba ó.” Entaun, nia saʼe ba foho-oan ida nia tutun.
4 Tuirmai Maromak mosu ba Balám,+ no Balám dehan ba Maromak: “Haʼu harii altár hitu tuituir malu, no haʼu hasaʼe ona karau-aman no bibi-malae aman iha altár ida-idak.”
5 Ho ida-neʼe, Jeová tau liafuan tuirmai neʼe iha Balám nia ibun:+ “Fila fali ba Balak, no ida-neʼe mak ó tenke hatete ba nia.”
6 Entaun nia fila fali no haree katak Balak no Moab nia ulun-naʼin hotu hamriik besik ninia sakrifísiu sunu nian.
7 Tuirmai nia hatoʼo lia-dadolin neʼe, hodi dehan:+
“Balak, liurai Moab nian, lori haʼu husi Aram,+
Husi foho sira iha parte leste. Nia dehan:‘Mai hodi fó-malisan ba Jacob.
Sin, mai hodi koʼalia aat Izraél.’+
8 Oinsá mak haʼu bele fó-malisan ba sira neʼebé Maromak la fó-malisan?
No oinsá mak haʼu bele koʼalia aat sira neʼebé Jeová la koʼalia aat?+
9 Haʼu haree sira husi fatuk boot nia leten,No haʼu haree sira husi foho sira-nia leten.
Sira hela mesak iha neʼebá nuʼudar povu ida,+Sira haree sira-nia an nuʼudar povu neʼebé la hanesan nasaun sira seluk.+
10 Sé mak bele sura ema-lubun husi Jacob neʼebé barak hanesan rai-rahun?+Sé mak bele sura parte balu* husi ema Izraél?
Husik haʼu* mate hanesan ema neʼebé laran-loos,No husik haʼu-nia rohan sai hanesan sira-nian.”
11 Balak dehan ba Balám: “Nuʼusá mak ó halo nuneʼe ba haʼu? Haʼu lori ó mai atu fó-malisan ba haʼu-nia inimigu sira, maibé agora ó fó fali bensaun barak ba sira.”+
12 Nia hatán: “Haʼu tenke koʼalia buat naran deʼit neʼebé Jeová tau iha haʼu-nia ibun,+ loos ka lae?”
13 Balak dehan ba nia: “Favór ida, mai hamutuk ho haʼu hodi bá iha fatin seluk neʼebé ó bele haree sira. Ó sei haree povu balu deʼit; ó sei la haree sira hotu. Husi neʼebá ó tenke fó-malisan ba sira.”+
14 Entaun Balak lori Balám ba rai-luan Zofim nian, iha Foho Pisga nia tutun,+ no harii altár hitu no hasaʼe karau-aman ida no bibi-malae aman ida iha altár ida-idak.+
15 Entaun Balám dehan ba Balak: “Hein lai iha neʼe besik ó-nia sakrifísiu sunu nian no haʼu sei bá koʼalia ho Maromak iha neʼebá.”
16 Jeová mosu ba Balám no tau liafuan sira-neʼe ba nia ibun:+ “Fila fali ba Balak, no neʼe mak buat neʼebé ó tenke dehan ba nia.”
17 Entaun Balám bá hasoru fali Balak no haree katak nia hein hela besik ninia sakrifísiu sunu nian, no Moab nia ulun-naʼin sira hamutuk ho nia. Balak husu ba Balám: “Jeová dehan saida?”
18 Tuirmai Balám hatoʼo lia-dadolin neʼe, hodi dehan:+
“Oh Balak, hamriik no rona bá.
Oh Zipor nia oan-mane, rona mai haʼu.
19 Maromak la koʼalia bosok+ hanesan ema,Nia mós la troka ninia hanoin*+ hanesan oan-mane husi ema.
Bainhira nia koʼalia buat ruma, nia mós sei halo tuir duni, loos ka lae?
Bainhira nia koʼalia, nia mós sei kumpre duni,+ loos ka lae?
20 Haʼu mai iha neʼe hodi fó bensaun,Agora Nia fó ona bensaun,+ no haʼu labele troka fali ida-neʼe.+
21 Nia la husik ema uza forsa masonik nian atu kontra Jacob,No nia la husik susar kona ema Izraél.
Jeová, sira-nia Maromak, mak hamutuk ho sira,+No sira hahiʼi nia nuʼudar liurai iha sira-nia leet ho lian makaʼas.
22 Maromak lori sira sai husi rai-Ejitu.+
Ba sira, nia hanesan karau-aman fuik nia dikur.+
23 Tanba ema labele fó sai katak buat aat sei kona Jacob,+Ka la iha matan-dook neʼebé bele kontra Izraél.+
Iha tempu neʼe ema bele dehan kona-ba Jacob no Izraél:
‘Haree ba buat neʼebé Maromak halo ona!’
24 Povu neʼe sei hamriik hanesan leaun ida,No hanesan leaun, nia sei hamriik duni.+
Nia sei la toba toʼo nia han buat neʼebé nia kaerNo hemu raan husi sira neʼebé nia oho.”
25 Tuirmai Balak hatete ba Balám: “Se ó labele fó-malisan ba sira, entaun keta haraik bensaun ba sira.”
26 Balám hatán ba Balak: “Haʼu fó-hatene ona ba ó: ‘Haʼu sei halo buat hotu neʼebé Jeová hatete’,+ loos ka lae?”
27 Balak dehan ba Balám: “Favór ida, mai no haʼu sei lori ó ba fatin seluk tan. Karik iha neʼebá mak Maromak loos sei husik ó atu fó-malisan ba povu neʼe.”+
28 Entaun Balak lori Balám ba foho Peor nia tutun, neʼebé hateke tun ba Jesimon.*+
29 Tuirmai Balám dehan ba Balak: “Harii altár hitu iha fatin neʼe, no prepara karau-aman hitu no bibi-malae aman hitu ba haʼu.”+
30 Balak halo tuir duni buat neʼebé Balám hatete, no nia hasaʼe karau-aman ida no bibi-malae aman ida iha altár ida-idak.
Nota-rodapé
^ Haree “Nefes” iha Glosáriu.
^ Orj., “parte 1/4”.
^ Ka “sente triste”.
^ Ka karik “rai-fuik”.
