Provérbios 15:1-33
15 Hatán ho liafuan mamar* sei hatún hirus,+Maibé liafuan neʼebé makaʼas* halo ema hirus liután.+
2 Ema matenek nia nanál koʼalia buat diʼak neʼebé nia hatene,+Maibé ema beik nia ibun fakar sai buat beik.
3 Jeová nia matan haree ba fatin hotu,Nia kontinua hateke ba ema aat no ema diʼak.+
4 Nanál neʼebé kalma* mak ai-hun moris nian,+Maibé koʼalia bosok halo ema laran-kanek.
5 Ema beik la respeitu ninia aman nia dixiplina,*+Maibé ema matenek simu konsellu.*+
6 Iha ema laran-loos nia uma iha rikusoin barak,Maibé rikusoin neʼebé ema laran-aat hetan mak lori problema ba nia an.+
7 Ema matenek nia ibun habelar koñesimentu,+Maibé ema beik nia laran lakohi halo hanesan neʼe.+
8 Jeová hakribi ema laran-aat nia sakrifísiu,+Maibé nia kontente ho ema laran-loos nia orasaun.+
9 Jeová odi ema laran-aat nia dalan,+Maibé nia hadomi ema neʼebé buka atu halo hahalok loos.+
10 Ema neʼebé husik tiha dalan diʼak haree dixiplina hanesan buat aat,*+No ema neʼebé odi konsellu sei mate.+
11 Jeová bele haree momoos sira neʼebé iha rate* laran, sira neʼebé iha fatin halakon nian,*+
Entaun nia mós bele haree duni ema nia fuan-laran!+
12 Ema gozadór la gosta sira neʼebé korrije nia.+
Nia lakohi buka matadalan husi ema neʼebé matenek.+
13 Laran neʼebé haksolok halo ema nia oin kontente,Maibé laran-kanek halo ema sai triste.+
14 Ema neʼebé iha kbiit atu komprende buka koñesimentu,+Maibé ema beik nia ibun buka deʼit* buat beik.+
15 Ema neʼebé iha susar laran, ninia loron hotu mak aat,+Maibé ema neʼebé laran-kontente, nia moris ho ksolok loron ba loron.*+
16 Diʼak liu iha sasán uitoan deʼit maibé hamtaʼuk Jeová+Duké iha rikusoin barak maibé nakonu ho laran-susar.*+
17 Diʼak liu han modo-tahan bikan ida hamutuk ho domin+Duké han naʼan neʼebé diʼak liu* hamutuk ho odi.+
18 Ema neʼebé hirusdór hamosu istori malu,+Maibé ema neʼebé la hirus lalais hapara haksesuk malu.+
19 Ema baruk-teen nia dalan mak nakonu ho ai-tarak,+Maibé ema laran-loos nia dalan mak hanesan dalan boot neʼebé tetuk.+
20 Oan* neʼebé matenek halo ninia aman kontente,+Maibé ema neʼebé beik hakribi ninia inan.+
21 Hahalok beik fó ksolok ba ema neʼebé beik,*+Maibé ema neʼebé matenek* kontinua laʼo iha dalan loos.+
22 Planu sira sei la sai loos kuandu ema la koʼalia ba malu,*Maibé buat hotu sei laʼo ho diʼak kuandu ema barak fó konsellu.*+
23 Ema ida haksolok tanba fó resposta neʼebé loos,+No liafuan neʼebé koʼalia iha tempu neʼebé loos mak furak tebetebes!+
24 Ema matenek* laʼo tuir dalan moris nian,+Hodi hasees an husi rate* neʼebé iha okos.+
25 Jeová sei sobu rahun ema loko an nia uma,+Maibé nia sei proteje baliza husi feto-faluk nia rai.+
26 Jeová hakribi ema aat nia planu sira,+Maibé liafuan neʼebé diʼak mak buat neʼebé moos ba Nia.+
27 Ema neʼebé buka atu manán rikusoin ho laran-makerek sei lori problema* ba nia umakain rasik,+Maibé ema neʼebé lakohi simu* prezente ruma hodi bobar lia-loos mak sei kontinua moris.+
28 Ema laran-loos hanoin didiʼak antes atu hatán,*+Maibé ema laran-aat nia ibun fakar sai buat aat.
29 Jeová dook loos husi ema laran-aat sira,Maibé nia rona ema laran-loos sira-nia orasaun.+
30 Matan neʼebé nabilan* halo ema laran-kontente;No liafuan diʼak fó forsa ba ruin sira.*+
31 Ema neʼebé rona ba konsellu neʼebé sei lori ba morisMak hela iha ema matenek sira-nia leet.+
32 Ema neʼebé lakohi simu dixiplina hakribi ninia moris,+Maibé ema neʼebé rona ba konsellu hetan kbiit atu komprende.+
33 Hamtaʼuk Jeová hanorin ema atu hatudu hahalok matenek,+No haraik an halo ema hetan glória.+
Nota-rodapé
^ Ka “liafuan neʼebé hakanek ema nia laran”.
^ Ka “Hatán ho laran-maus”.
^ Ka “Nanál neʼebé fó kura”.
^ Ka “hanorin; treinu”.
^ Ka “korrije”.
^ Ka “buat neʼebé makaʼas liu”.
^ Haree “Siol” iha Glosáriu.
^ Ka “iha Abadon”. Haree “Abadon” iha Glosáriu.
^ Ka “han deʼit”.
^ Ka “nia sente kontente hanesan festa loron ba loron”.
^ Ka “konfuzaun”.
^ Orj., “naʼan husi karau neʼebé bokur”.
^ Orj., “Oan-mane”.
^ Ka “ema neʼebé hatene tetu didiʼak”.
^ Orj., “ema neʼebé la iha laran”.
^ Ka “la buka konsellu”.
^ Ka “kuandu iha konsellu-naʼin barak”.
^ Haree “Siol” iha Glosáriu.
^ Ka “Ema neʼebé komprende didiʼak”.
^ Ka “lori moe”.
^ Ka “fó”.
^ Ka “hanoin kleʼan kona-ba oinsá atu hatán; medita antes koʼalia”.
^ Ka “Ema neʼebé hateke mai ho oin-midar”.
^ Orj., “halo ruin bokur”.
