Ebreu 13:1-25
13 Kontinua hadomi malu hanesan maun-alin.+
2 Keta haluha atu simu ema ho laran-diʼak,*+ tanba hodi halo nuneʼe mak ema balu simu anju sira, maski sira rasik la hatene.+
3 Kontinua hanoin ema sira neʼebé iha komarka laran*+ hanesan imi mós tama komarka hamutuk ho sira,+ no hanoin sira neʼebé ema fó susar, tanba imi mós iha isin-lolon hanesan sira.*
4 Ema hotu tenke respeitu moris kaben nian, no keta hafoʼer relasaun kaben nian,*+ tanba Maromak sei tesi-lia ba ema neʼebé halo sala seksuál,* no ema neʼebé halo adultériu.*+
5 Iha imi-nia moris, keta hadomi osan,+ maibé kontente ho buat neʼebé imi iha ona.+ Tanba nia dehan ona: “Haʼu sei nunka husik ó, no haʼu sei nunka fila kotuk ba ó.”+
6 Atu nuneʼe ita bele sai brani no dehan: “Jeová* mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?”+
7 Hanoin-hetan ema sira neʼebé dirije imi iha imi-nia leet,+ no fó sai ona Maromak nia liafuan ba imi. Haree didiʼak rezultadu diʼak husi sira-nia hahalok atu imi bele halo tuir sira-nia fiar.+
8 Jesus Kristu hanesan deʼit horiseik, ohin, no ba nafatin.
9 Keta husik hanorin oioin no hanorin oin-seluk lori imi laʼo sala dalan, tanba diʼak liu atu hametin imi-nia laran ho Maromak nia laran-diʼak neʼebé boot duké ho ai-han,* neʼebé la lori buat diʼak ba sira neʼebé hanoin demais kona-ba ai-han.+
10 Ita iha altár ida, no ema sira neʼebé halaʼo serbisu sagradu iha tenda santu* la iha direitu* atu han buat ida iha altár neʼe.+
11 Tanba animál nia isin neʼebé ema sira-neʼe hasaʼe ona tenke sunu tiha iha povu nia hela-fatin nia liʼur, bainhira amlulik boot lori ona animál sira-neʼe nia raan ba Fatin Santu Liu Hotu nuʼudar sakrifísiu sala nian.+
12 Tan neʼe, Jesus mós hetan terus iha sidade nia portaun liʼur,+ atu nuneʼe nia bele halo ema sira sai santu* ho ninia raan rasik.+
13 Entaun, mai ita laʼo ba nia iha povu nia hela-fatin liʼur, no lori moe neʼebé nia mós lori,+
14 tanba iha neʼe ita la iha sidade neʼebé sei hela ba nafatin, maibé ho laran tomak ita hein ba sidade neʼebé atu mai.+
15 Liuhusi nia mak ita tenke hasaʼe nafatin sakrifísiu hahiʼi nian ba Maromak,+ neʼe katak, liafuan neʼebé sai husi ita-nia ibun+ hodi fó sai ninia naran ba ema hotu.+
16 Liután neʼe, keta haluha atu halo hahalok diʼak no fahe buat neʼebé imi iha ba ema seluk,+ tanba buat sira-neʼe hanesan sakrifísiu neʼebé halo Maromak kontente tebes.+
17 Halo tuir sira neʼebé dirije imi iha imi-nia leet+ no hakruʼuk ba sira,+ tanba sira kontinua tau matan ba imi nuʼudar ema neʼebé sei hatán ba Maromak,+ atu nuneʼe sira bele tau matan ba imi ho haksolok laʼós ho halerik, tanba ida-neʼe sei lori buat aat ba imi.
18 Kontinua halo orasaun kona-ba ami, tanba ami fiar katak ami-nia konxiénsia moos,* no ami hakarak atu hatudu laran-moos iha buat hotu.+
19 Maibé haʼu husu imi liuliu atu halo orasaun hodi haʼu bele fila fali lalais ba imi.
20 Maromak dame nian fó moris-hiʼas ona ba bibi-atan boot,+ neʼe mak ita-nia Naʼi Jesus, neʼebé lori raan aliansa nian neʼebé iha ba nafatin. Haʼu harohan katak Maromak sei
21 fó buat diʼak hotu neʼebé imi presiza atu halo ninia hakarak; liuhusi Jesus Kristu mak nia sei book ita atu halo buat neʼebé halo nia kontente. Fó glória ba nia tinan ba tinan nafatin. Amen.
22 Agora haʼu husu ba imi, maun-alin sira, atu rona ho pasiénsia ba liafuan sira neʼebé fó aten-brani ba imi, tanba haʼu hakerek ona karta badak neʼe ba imi.
23 Haʼu hakarak atu imi hatene katak ita-nia maluk fiar-naʼin Timóteo sai livre ona. Se nia toʼo mai lalais, ami sei bá hamutuk atu vizita imi.
24 Fó haʼu-nia kumprimentus ba sira hotu neʼebé dirije imi iha imi-nia leet no ba ema santu* hotu. Sira neʼebé iha Itália+ haruka sira-nia kumprimentus ba imi.
25 Haʼu harohan katak Maromak sei haraik ninia laran-diʼak neʼebé boot ba imi hotu.
Nota-rodapé
^ Ka “tau matan ba ema oin-foun”.
^ Orj., “neʼebé korrente kesi hela”.
^ Ka karik “hanesan imi mós hetan susar ho sira”.
^ Haree “Sala seksuál” iha Glosáriu.
^ Ka “keta hafoʼer kaben-naʼin nia toba-fatin”.
^ Neʼe katak ukun-fuan kona-ba ai-han.
^ Ka “templu”.
^ Orj., “autoridade”.
^ Haree “Halo santu” iha Glosáriu.
^ Orj., “diʼak”.
^ Haree “Ema santu” iha Glosáriu.
