Ebreu 6:1-20
6 Agora ita aprende ona hanorin báziku+ kona-ba Kristu, tan neʼe mai ita laʼo ba oin hodi sai ema maduru,+ no la tau fali uma nia fundasaun ba dala ida tan. Hanorin sira-neʼe mak arrepende an husi hahalok neʼebé folin-laek,* no fiar iha Maromak,
2 hanorin kona-ba batizmu* oioin, tau liman ba ema,+ moris-hiʼas husi mate,+ tesi-lia no desizaun neʼebé metin ba nafatin.
3 Se Maromak husik ita atu halo nuneʼe, ita sei laʼo ba oin hodi sai ema maduru.
4 Kona-ba ema sira neʼebé hetan ona naroman,+ no simu ona prezente* neʼebé mai husi lalehan, no mós simu ona espíritu santu,
5 no hetan ona Maromak nia liafuan furak no mós bensaun* sira husi tempu* neʼebé atu mai,
6 se sira laʼo sees ona husi fiar,+ la iha ema ida mak bele lori fali sira atu arrepende sira-nia sala, tanba sira prega fali ona Maromak nia Oan-Mane iha ai-riin no hamoe nia iha ema hotu nia oin.+
7 Tanba rai simu bensaun husi Maromak bainhira nia xupa udan-been neʼebé tun iha nia leten, no tuirmai fó moris ba modo sira, no ema sira neʼebé kuda modo bele han ida-neʼe.
8 Maibé se rai hamosu ai-tarak no duʼut aat, rai neʼe sai folin-laek no lakleur tan sei hetan malisan, no ikusmai sei sunu tiha.
9 Kona-ba imi, haʼu-nia maluk doben sira, maski ami koʼalia hanesan neʼe, maibé ami fiar katak imi-nia situasaun diʼak liu fali sira neʼebé laʼo sees ona husi fiar, no imi halo buat neʼebé sei lori imi ba salvasaun.
10 Tanba Maromak nunka hatudu hahalok aat hodi haluha imi-nia serbisu no imi-nia domin neʼebé imi hatudu ona ba ninia naran,+ tanba imi serbí ona no kontinua serbí ema santu* sira.
11 Maibé ami hakarak imi ida-idak atu hatudu badinas hanesan uluk, atu nuneʼe imi-nia esperansa bele metin nafatin+ toʼo rohan,+
12 atu nuneʼe imi labele sai baruk,+ maibé halo tuir ezemplu husi sira neʼebé simu buat neʼebé promete ona liuhusi sira-nia fiar no pasiénsia.
13 Tanba uluk bainhira Maromak halo promesa ho Abraão, nia jura hodi ninia an rasik tanba la iha ida seluk neʼebé boot liu fali nia.+
14 Nia dehan: “Haʼu sei haraik duni bensaun ba ó no haʼu sei halo duni ó-nia bei-oan sira sai barak.”+
15 Entaun, bainhira Abraão hatudu tiha pasiénsia, nia simu duni promesa neʼe.
16 Tanba ema jura hodi ida neʼebé boot liu fali sira, no sira-nia juramentu neʼe hakotu haksesuk malu, tanba tuir lei, neʼe hanesan garantia katak sira-nia liafuan mak loos.+
17 Hanesan neʼe mós, bainhira Maromak deside atu hatudu ho klaru liután ba sira neʼebé simu promesa nuʼudar liman-rohan+ katak ninia hakarak* labele muda, nia mós halo juramentu ida hodi fó garantia,*
18 atu nuneʼe, liuhusi buat rua* neʼebé labele muda tanba Maromak nunka bosok,+ ita neʼebé halai ona ba Maromak nia fatin seguru bele hetan aten-brani atu kaer metin ba esperansa neʼebé tau ona iha ita-nia oin.
19 Ita iha esperansa neʼe+ hanesan ankor neʼebé loos no metin ba ita-nia moris, no esperansa neʼe lori ita tama ba laran liuhusi kortina ida.*+
20 Jesus tama ona iha neʼebá uluk liu ita, no nia loke dalan no prepara dalan ba ita.+ Nia sai ona amlulik boot hanesan Melkizedek ba nafatin.+
Nota-rodapé
^ Ka “hahalok mate”.
^ Ka “prezente neʼebé la presiza selu”.
^ Orj., “kbiit”.
^ Haree “Ema santu” iha Glosáriu.
^ Ka “konsellu”.
^ Orj., “hodi halo mediasaun”.
^ Neʼe refere ba Maromak nia promesa no juramentu.
^ Neʼe refere ba kortina neʼebé haketak Fatin Santu ho Fatin Santu Liu Hotu iha tenda santu.
