Ezequiel 20:1-49
20 Iha loron sanulu fulan-lima tinan hitu,* Izraél nia katuas balu mai no tuur iha haʼu-nia oin hodi husu matadalan husi Jeová.
2 Tuirmai Jeová koʼalia mai haʼu, hodi dehan:
3 “Oan-mane husi ema, fó-hatene ba Izraél nia katuas sira: ‘Jeová, Naʼi Ukun-Naʼin Boot Liu, dehan nuneʼe: “Imi mai atu husu matadalan husi haʼu ka? ‘Haʼu jura hodi haʼu-nia moris rasik katak haʼu sei la hatán ba imi’,+ Jeová, Naʼi Ukun-Naʼin Boot Liu, mak dehan.”’
4 “Oh oan-mane husi ema, ó prontu atu tesi-lia ba sira* ka lae? Ó tenke tesi-lia ba sira. Fó sai ba sira kona-ba hahalok aat neʼebé sira-nia beiʼala sira halo ona.+
5 Fó sai ba sira: ‘Jeová, Naʼi Ukun-Naʼin Boot Liu, dehan nuneʼe: “Iha loron neʼebé haʼu hili Izraél,+ haʼu mós jura* ba umakain Jacob nia bei-oan sira, no haʼu fó-hatene haʼu-nia an ba sira iha rai-Ejitu.+ Sin, haʼu jura ba sira no dehan: ‘Haʼu mak Jeová, imi-nia Maromak.’
6 Iha loron neʼebá, haʼu jura katak haʼu sei lori sira sai husi rai-Ejitu hodi bá rai neʼebé haʼu buka ona* atu fó ba sira, rai neʼebé iha susubeen no bani-been barak.+ Rai neʼe mak furak liu rai sira seluk hotu.
7 Tuirmai haʼu dehan ba sira: ‘Imi ida-idak tenke soe tiha buat sira neʼebé haʼu hakribi neʼebé imi adora daudaun.* Keta hafoʼer imi-nia an ho rai-Ejitu nia estátua sira neʼebé haʼu hakribi.*+ Haʼu mak Jeová, imi-nia Maromak.’+
8 “‘“Maibé sira kontra haʼu no lakohi rona haʼu. Sira la soe estátua sira neʼebé haʼu hakribi* neʼebé iha sira-nia oin, no sira lakohi husik buat aat sira husi rai-Ejitu.+ Entaun haʼu promete katak haʼu sei fakar sai haʼu-nia laran-nakali ba sira no hasai hotu haʼu-nia hirus hasoru sira iha rai-Ejitu.
9 Maibé haʼu la halakon sira* tanba haʼu-nia naran, atu nuneʼe ema labele hafoʼer haʼu-nia naran iha nasaun sira neʼebé sira hela bá.+ Tanba haʼu fó-hatene ona haʼu-nia an ba sira* iha nasaun sira-neʼe nia oin bainhira haʼu lori sira sai husi rai-Ejitu.+
10 Nuneʼe haʼu lori sira sai husi rai-Ejitu, no dirije sira hodi laʼo ba rai-fuik.+
11 “‘“Tuirmai haʼu fó haʼu-nia ukun-fuan no haʼu-nia lei ba sira,+ atu nuneʼe ema neʼebé halo tuir bele moris liuhusi buat sira-neʼe.+
12 Haʼu mós haruka sira halaʼo haʼu-nia Sábadu+ nuʼudar sinál entre haʼu ho sira,+ atu nuneʼe sira bele hatene katak haʼu, Jeová, mak halo sira santu.*
13 “‘“Maibé umakain Izraél kontra haʼu iha rai-fuik.+ Sira la halo tuir haʼu-nia ukun-fuan no lei sira, neʼebé bele lori moris ba ema neʼebé halo tuir buat sira-neʼe. Sira hafoʼer tebes haʼu-nia Sábadu. Entaun haʼu promete katak haʼu sei fakar sai haʼu-nia laran-nakali ba sira iha rai-fuik hodi halakon sira.+
14 Maibé haʼu la halakon sira tanba haʼu-nia naran, atu nuneʼe ema labele hafoʼer haʼu-nia naran iha nasaun sira-nia leet, katak nasaun sira neʼebé haree haʼu lori sai sira.*+
15 Haʼu mós jura ba sira iha rai-fuik katak haʼu sei la lori sira ba rai neʼebé haʼu atu fó ba sira,+ rai neʼebé iha susubeen no bani-been barak,+ rai neʼebé furak liu rai sira seluk hotu.
16 Haʼu halo nuneʼe tanba sira la halo tuir haʼu-nia lei no ukun-fuan sira, no sira hafoʼer haʼu-nia Sábadu, tanba sira-nia laran tuir estátua sira neʼebé haʼu hakribi.*+
17 “‘“Maibé haʼu* hanoin sira, no haʼu la oho sira. Haʼu la halakon sira iha rai-fuik.
18 Haʼu koʼalia ba sira-nia oan-mane sira iha rai-fuik,+ hodi dehan: ‘Keta halo tuir imi-nia beiʼala nia lei,+ keta kumpre sira-nia desizaun no keta hafoʼer imi-nia an ho sira-nia estátua sira neʼebé haʼu hakribi.*
19 Haʼu mak Jeová, imi-nia Maromak. Imi tenke halo tuir haʼu-nia ukun-fuan no lei sira, no kumpre buat sira-neʼe hotu.+
20 Imi tenke haree haʼu-nia Sábadu nuʼudar buat santu,+ no neʼe sei sai nuʼudar sinál entre haʼu ho imi atu imi bele hatene katak haʼu mak Jeová, imi-nia Maromak.’+
21 “‘“Maibé oan-mane sira-neʼe komesa kontra haʼu.+ Sira la halo tuir haʼu-nia ukun-fuan no lei sira, neʼebé bele lori moris ba ema neʼebé halo tuir buat sira-neʼe. Sira hafoʼer haʼu-nia Sábadu. Entaun haʼu promete katak haʼu sei fakar sai haʼu-nia laran-nakali no hasai hotu haʼu-nia hirus hasoru sira iha rai-fuik.+
22 Maibé haʼu kontrola an+ no haʼu la halakon sira tanba haʼu-nia naran,+ atu nuneʼe ema labele hafoʼer haʼu-nia naran iha nasaun sira-nia leet, katak nasaun sira neʼebé haree haʼu lori sai sira.*
23 Haʼu mós jura ba sira iha rai-fuik katak haʼu sei halo sira namkari iha nasaun sira-nia leet no iha rai oioin,+
24 tanba sira la halo tuir haʼu-nia lei no la simu haʼu-nia ukun-fuan sira,+ no hafoʼer haʼu-nia Sábadu, no sira mós adora* sira-nia beiʼala nia estátua sira neʼebé haʼu hakribi.*+
25 Haʼu mós husik sira halo tuir ukun-fuan neʼebé la diʼak no lei neʼebé la lori sira ba moris.+
26 Haʼu husik sira sai foʼer bainhira sira sunu sira-nia oan primeiru hotu iha ahi* nuʼudar sakrifísiu.+ Tanba sira-nia hahalok aat mak haʼu fó kastigu ba sira hodi sira bele hatene katak haʼu mak Jeová.”’
27 “Tan neʼe, oh oan-mane husi ema, koʼalia ba umakain Izraél no dehan ba sira: ‘Jeová, Naʼi Ukun-Naʼin Boot Liu, dehan nuneʼe: “Iha dalan hanesan neʼe mós, imi-nia beiʼala sira koʼalia aat haʼu bainhira sira kontra haʼu hodi la hatudu laran-metin.
28 Haʼu lori sira ba rai neʼebé haʼu jura ona atu fó ba sira.+ Bainhira sira haree foho-oan sira no ai-hun buras sira,+ sira komesa hasaʼe sakrifísiu neʼebé halo haʼu laran-kanek. Sira sunu sira-nia sakrifísiu hodi halo suar morin atu halo sira-nia maromak kontente* no fui sira-nia sakrifísiu hemu nian iha neʼebá.
29 Entaun haʼu husu ba sira: ‘Imi bá beibeik fatin aas neʼe atu halo saida? (Imi hanaran fatin neʼe nuʼudar Fatin Aas toʼo ohin loron.)’”’+
30 “Agora koʼalia ba umakain Izraél, hodi dehan: ‘Jeová, Naʼi Ukun-Naʼin Boot Liu, dehan nuneʼe: “Imi hafoʼer imi-nia an hanesan imi-nia beiʼala sira halo ka? Imi la hatudu laran-metin ba haʼu hodi adora*+ imi-nia beiʼala nia estátua sira neʼebé haʼu hakribi.*
31 No imi sei kontinua hafoʼer imi-nia an toʼo ohin loron ka? Imi sunu imi-nia oan-mane sira iha ahi*+ hodi hasaʼe sakrifísiu ba estátua hotu neʼebé haʼu hakribi.* Entaun, oh umakain Izraél, haʼu mós iha obrigasaun atu hatán ba imi bainhira imi husu matadalan iha tempu hanesan neʼe ka?”’+
“Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik katak haʼu sei la hatán bainhira imi husu matadalan ba haʼu.+
32 Imi hanoin iha imi-nia neon:* “Mai ita halo hanesan nasaun sira seluk, hanesan família sira iha rai seluk, neʼebé adora* fatuk no ai.”+ Imi-nia hanoin neʼe sei nunka akontese.’”
33 “Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik katak haʼu sei ukun imi nuʼudar liurai ho kbiit, ho liman neʼebé forte no ho laran-nakali.+
34 Haʼu sei lori imi sai husi nasaun sira-nia leet no halibur imi hamutuk husi rai sira neʼebé imi namkari bá. Haʼu sei halo neʼe ho kbiit, ho liman neʼebé forte, no ho laran-nakali.+
35 Haʼu sei lori imi ba rai-fuik iha nasaun sira seluk no iha neʼebá haʼu sei tesi-lia ba imi oin ba oin.+
36 “Jeová, Naʼi Ukun-Naʼin Boot Liu, dehan: ‘Hanesan haʼu tesi-lia ba imi-nia beiʼala sira iha rai-fuik iha rai-Ejitu, nuneʼe mós haʼu sei tesi-lia ba imi.
37 Haʼu sei haruka imi laʼo liu iha bibi-atan nia ai-tonka okos+ no kesi imi ba aliansa.*
38 Maibé haʼu sei halakon tiha ema sira neʼebé halo sala hasoru haʼu no kontradór husi imi-nia leet.+ Tanba haʼu sei lori sira sai husi rai neʼebé sira hela nuʼudar ema estranjeiru, maibé sira sei la tama ba rai-Izraél.+ Nuneʼe imi sei hatene duni katak haʼu mak Jeová.’
39 “Oh umakain Izraél, Jeová, Naʼi Ukun-Naʼin Boot Liu, dehan nuneʼe: ‘Imi ida-idak bá hodi adora estátua sira neʼebé haʼu hakribi.*+ Maibé depois neʼe, se imi la rona haʼu, imi sei lori todan ba imi-nia sala. Tuirmai imi sei la hafoʼer tan haʼu-nia naran neʼebé santu liuhusi imi-nia sakrifísiu sira no estátua sira neʼebé haʼu hakribi.’*+
40 “Jeová, Naʼi Ukun-Naʼin Boot Liu, dehan: ‘Tanba umakain Izraél tomak sei serbí haʼu iha haʼu-nia foho santu, iha foho aas ida iha rai-Izraél.+ Haʼu sei sente kontente ho sira iha neʼebá,+ no haʼu sei husu imi atu fó kontribuisaun no hasaʼe sakrifísiu neʼebé diʼak liu,* katak imi-nia parte santu hotu.+
41 Tanba imi-nia sakrifísiu morin neʼebé halo haʼu-nia laran kontente,* mak haʼu sei sente haksolok bainhira haʼu lori imi sai husi nasaun sira-nia leet no halibur imi hamutuk husi rai sira neʼebé imi namkari bá.+ No haʼu sei halo santu haʼu-nia an liuhusi imi iha nasaun sira-nia oin.’+
42 “‘Imi sei hatene duni katak haʼu mak Jeová+ bainhira haʼu lori imi ba rai-Izraél,+ rai neʼebé haʼu jura ona atu fó ba imi-nia beiʼala sira.
43 Iha neʼebá imi sei hanoin-hetan imi-nia moris no hahalok hotu neʼebé hafoʼer imi,+ no imi sei hakribi imi-nia an* tanba hahalok aat hotu neʼebé imi halo ona.+
44 Depois neʼe, imi sei hatene duni katak haʼu mak Jeová bainhira haʼu salva imi tanba haʼu-nia naran.+ Oh umakain Izraél, haʼu sei la halo ba imi tuir imi-nia hahalok aat ka tuir imi-nia hahalok foʼer’, Jeová, Naʼi Ukun-Naʼin Boot Liu, mak dehan.”
45 Jeová koʼalia tan mai haʼu, hodi dehan:
46 “Oan-mane husi ema, fila oin ba parte súl no fó avizu ba parte súl, no fó sai profesia hodi kontra ai-laran iha área parte súl.
47 Hatete ba ai-laran iha parte súl: ‘Rona ba Jeová nia liafuan. Jeová, Naʼi Ukun-Naʼin Boot Liu, dehan nuneʼe: “Haʼu halo lakan daudaun ahi atu sunu ó,+ no ahi neʼe sei han hotu ó-nia ai matak no ai maran sira. Ahi neʼe sei labele hamate,+ no ema hotu nia oin sei motuk tanba ahi neʼe, husi parte súl toʼo parte norte.
48 No ema hotu sei haree katak haʼu, Jeová, mak sunu ai-laran neʼe, no ahi neʼe sei labele hamate.”’”+
49 Haʼu dehan: “Aii Jeová, Naʼi Ukun-Naʼin Boot Liu, susar ba haʼu! Sira koʼalia kona-ba haʼu, hodi dehan: ‘Nia sempre konta deʼit ai-sasiʼik.’”*
Nota-rodapé
^ Neʼe refere ba Liurai Joaquim, Ezequiel no ema Judeu sira seluk sai dadur ba tinan hitu. Haree Eze 1:2.
^ Ka “atu fó sai desizaun ba sira”.
^ Orj., “foti saʼe haʼu-nia liman”.
^ Ka “haʼu hafuhu ona”.
^ Orj., “neʼebé iha imi-nia matan oin”.
^ Ka “ídolu sira neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
^ Ka “ídolu sira neʼebé foʼer tebes”.
^ Neʼe katak ema Izraél.
^ Neʼe katak ema Izraél.
^ Haree “Halo santu” iha Glosáriu.
^ Neʼe katak ema Izraél.
^ Ka “ídolu sira neʼebé foʼer tebes”.
^ Orj., “haʼu-nia matan”.
^ Ka “ídolu sira neʼebé foʼer tebes”.
^ Neʼe katak ema Izraél.
^ Ka “ídolu sira neʼebé foʼer tebes”.
^ Orj., “sira-nia matan hateke tuir”.
^ Orj., “halo sira-nia oan primeiru liu husi ahi”.
^ Ka “sente kmaan”.
^ Ka “Imi halo prostituisaun iha dalan espirituál ho”.
^ Ka “ídolu sira neʼebé foʼer tebes”.
^ Ka “ídolu hotu neʼebé foʼer tebes”.
^ Orj., “halo imi-nia oan-mane sira liu husi ahi”.
^ Ka “espíritu”. Haree “Ruah” iha Glosáriu.
^ Ka “serbí”.
^ Ka “halo imi kumpre aliansa nuʼudar imi-nia obrigasaun”.
^ Ka “ídolu sira neʼebé foʼer tebes”.
^ Ka “ídolu sira neʼebé foʼer tebes”.
^ Ka “hasaʼe ai-fuan primeiru husi imi-nia toʼos”.
^ Ka “sente kmaan”.
^ Orj., “imi-nia oin”.
^ Ka “lia-dadolin”.
