Ezequiel 22:1-31
22 Jeová koʼalia tan mai haʼu, hodi dehan:
2 “Oan-mane husi ema, sidade neʼe fakar ona ema nia raan barak.+ Entaun ó prontu ona atu fó sai haʼu-nia desizaun ba sidade neʼe no halo nia hatene kona-ba ninia hahalok aat hotu ka lae?+
3 Ó tenke hatete: ‘Jeová, Naʼi Ukun-Naʼin Boot Liu, dehan nuneʼe: “Oh sidade neʼebé fakar ema nia raan,+ sidade neʼebé halo estátua sira neʼebé haʼu hakribi* hodi hafoʼer ninia an,+ ó-nia rohan besik mai ona.+
4 Ó hetan sala tanba ó oho ema,+ no ó sai la moos tanba ó-nia estátua sira neʼebé haʼu hakribi.*+ Ó halo ó-nia loron sira remata lalais, no halo ó-nia tinan sira toʼo ona nia rohan. Tan neʼe mak haʼu sei halo ó sai buat neʼebé nasaun sira hakribi no rai hotu sei goza ó.+
5 Rai sira neʼebé besik no rai sira neʼebé dook husi ó sei goza ó.+ Ó mak sidade neʼebé iha ona naran foʼer no nakonu ho problema.
6 Izraél nia xefe ida-idak iha ó-nia leet uza sira-nia pozisaun atu oho ema.+
7 Sira halo aat ba sira-nia inan-aman,+ sira lohi hodi hamatak ema estranjeiru no halo aat ba oan-kiak* no feto-faluk sira iha ó-nia leet.”’”+
8 “‘Ó hakribi haʼu-nia fatin sira neʼebé santu, no hafoʼer haʼu-nia Sábadu.+
9 Iha ó-nia leet, ema koʼalia aat hodi hafoʼer ema seluk nia naran, tanba hakarak deʼit atu oho ema.+ Iha foho leten, sira han ai-han neʼebé hasaʼe nuʼudar sakrifísiu no halo hahalok aat tebes.+
10 Iha ó-nia leet, sira la respeitu sira-nia aman nia kama,*+ no halo relasaun seksuál ho feto neʼebé la moos tanba hetan menstruasaun hela.+
11 Mane ida iha ó-nia leet halo hahalok foʼer ho ninia maluk nia feen,+ no mane ida seluk halo hahalok aat tebes hodi hafoʼer ninia feto-foun rasik,+ no mane ida seluk tan halo relasaun ho nia feton, ninia aman nia oan-feto rasik.+
12 Sira simu prezente hodi oho ema iha ó-nia leet.+ Ó fó-empresta hodi husu osan-funan+ ka atu manán osan barak tan, no ó hamatak ó-nia maluk atu hetan osan.+ Sin, ó haluha ona haʼu’, Jeová, Naʼi Ukun-Naʼin Boot Liu, mak dehan.
13 “‘Haʼu basa liman hodi hatudu katak haʼu hakribi ó tanba ó hakarak manán buat ruma ho laran-makerek no tanba ó oho ema iha ó-nia leet.
14 Iha loron neʼebé haʼu kastigu ó, ó sei nafatin aten-brani* no ó-nia liman sei forte nafatin ka lae?+ Haʼu, Jeová, mak koʼalia ona, no haʼu sei kastigu duni ó.
15 Haʼu sei halo ó namkari iha nasaun no rai sira-nia leet,+ no haʼu sei hapara ó-nia hahalok foʼer sira.+
16 Ó sei lakon ó-nia dignidade iha nasaun sira-nia oin, nuneʼe ó sei hatene duni katak haʼu mak Jeová.’”+
17 Jeová koʼalia tan mai haʼu, hodi dehan:
18 “Oan-mane husi ema, ba haʼu, umakain Izraél sai ona hanesan buat foʼer* neʼebé folin-laek. Sira hotu mak hanesan riti, kaleen, besi no besi-makdadi* iha ahi-matan. Sira sai ona hanesan osan-mutin nia teen.+
19 “Tan neʼe Jeová, Naʼi Ukun-Naʼin Boot Liu, dehan nuneʼe: ‘Haʼu halibur imi hamutuk iha Jeruzalein tanba imi hotu sai ona hanesan buat foʼer neʼebé folin-laek.+
20 Hanesan ema halibur osan-mutin, riti, besi, besi-makdadi no kaleen hodi tau iha ahi-matan no nia huu ahi ba buat sira-neʼe atu halo sira nabeen, nuneʼe mós ho haʼu-nia hirus no laran-nakali haʼu sei halibur imi hamutuk, no haʼu sei huu ahi ba imi hodi halo imi nabeen.+
21 Haʼu sei halibur imi hamutuk no kastigu imi ho haʼu-nia laran-nakali neʼebé hanesan ahi,+ no imi sei nabeen iha sidade laran.+
22 Hanesan osan-mutin sai nabeen iha ahi-matan, nuneʼe mós imi sei sai nabeen iha sidade laran. Nuneʼe imi sei hatene duni katak haʼu, Jeová, mak fakar sai haʼu-nia hirus ba imi.’”
23 Jeová koʼalia tan mai haʼu, hodi dehan:
24 “Oan-mane husi ema, hatete ba sidade neʼe: ‘Ó mak rai neʼebé sei la hamoos no udan sei la tun iha loron hirus nian.
25 Profeta sira iha sidade neʼe halo planu aat hamutuk,+ sira mak hanesan leaun siʼak neʼebé lees animál.+ Sira tolan povu.* Sira hadau rikusoin no sasán neʼebé folin-boot. Sira halo feto barak sai faluk iha sidade laran.
26 Amlulik sira iha sidade neʼe kontra ona haʼu-nia ukun-fuan,+ no sira kontinua hafoʼer haʼu-nia fatin sira neʼebé santu.+ Sira la haketak buat neʼebé santu husi buat neʼebé baibain,+ no sira la hanorin kona-ba buat neʼebé moos no buat neʼebé la moos.+ Sira lakohi halaʼo haʼu-nia Sábadu, no sira hafoʼer haʼu-nia naran iha sira-nia leet.
27 Ulun-naʼin sira iha sidade neʼe mak hanesan asu-lobu* neʼebé lees animál; sira fakar ema nia raan no oho ema* tanba hakarak manán buat ruma ho laran-makerek.+
28 Maibé profeta sira iha sidade neʼe taka ulun-naʼin sira-nia hahalok aat hanesan reboka* didin. Sira haree vizaun neʼebé la loos no siʼik futuru neʼebé bosok,+ no sira dehan: “Jeová, Naʼi Ukun-Naʼin Boot Liu, dehan nuneʼe”, maski Jeová rasik la koʼalia buat ida ba sira.
29 Ema iha rai neʼe lohi hodi hamatak ema no hadau ema nia sasán,+ sira halo aat ba ema kiʼik no kiak, sira lohi hodi hamatak ema estranjeiru iha sira-nia leet no la hatudu justisa ba sira.’
30 “‘Uluk haʼu buka mane ida iha sira-nia leet hodi bele hadiʼa fali moru fatuk nian ka hamriik iha moru nia parte neʼebé rahun ona hodi proteje rai neʼe, atu nuneʼe haʼu labele halakon rai neʼe,+ maibé haʼu la hetan ema ida.
31 Tan neʼe, haʼu sei fakar sai haʼu-nia laran-nakali ba sira no halakon sira ho haʼu-nia hirus neʼebé hanesan ahi. Haʼu sei halo sira lori todan ba sira-nia hahalok rasik’, Jeová, Naʼi Ukun-Naʼin Boot Liu, mak dehan.”
Nota-rodapé
^ Ka “ídolu sira neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
^ Ka “ídolu sira neʼebé foʼer tebes”.
^ Ka “labarik neʼebé la iha aman”.
^ Orj., “sira hatudu sai sira-nia aman nia isin-tanan”.
^ Orj., “ó-nia laran sei tahan nafatin”.
^ Liafuan Ebraiku neʼe refere ba buat foʼer neʼebé ema hasai bainhira halo nabeen besi oioin atu buka osan-mutin.
^ Haree “Nefes” iha Glosáriu.
^ Neʼe mak animál neʼebé siʼak no han animál seluk.
^ Haree “Nefes” iha Glosáriu.
