Ezequiel 26:1-21
26 Iha loron primeiru husi fulan neʼe iha tinan 11,* Jeová koʼalia mai haʼu, hodi dehan:
2 “Oan-mane husi ema, tanba ema iha sidade Tiro koʼalia kontra Jeruzalein,+ hodi dehan: ‘Merese duni! Portaun neʼebé ema hotu laʼo liu rahun ona!+ Agora haʼu sei hetan oportunidade hotu, no haʼu sei sai riku tanba Jeruzalein rahun ona.’
3 Tan neʼe, Jeová, Naʼi Ukun-Naʼin Boot Liu, dehan nuneʼe: ‘Oh Tiro, haʼu sei kontra ó, no haʼu sei lori nasaun barak mai hodi kontra ó, hanesan tasi hamosu ninia laloran boot.
4 Oh Tiro, sira sei halakon ó-nia moru no harahun ó-nia uma aas* sira,+ no haʼu sei hasai tiha rai husi ó hodi halo ó sai moos hanesan fatuk neʼebé kabeer.
5 Ó sei sai fatin neʼebé maran iha tasi klaran atu ema habai rede.’+
“Jeová, Naʼi Ukun-Naʼin Boot Liu, dehan: ‘Ó sei sai buat neʼebé nasaun sira hadau tanba haʼu rasik mak fó sai ona liafuan sira-neʼe.
6 No ó-nia ema neʼebé hela iha knua sira* iha foho sei mate ho surik. Nuneʼe ema sei hatene duni katak haʼu mak Jeová.’
7 “Tanba Jeová, Naʼi Ukun-Naʼin Boot Liu, dehan nuneʼe: ‘Husi parte norte, haʼu sei lori Liurai Nabukodonozór* husi Babilónia hodi mai kontra Tiro.+ Nia mak liurai ba liurai sira.+ Nia mai ho kuda,+ kuda-karreta funu nian,+ tropa neʼebé saʼe kuda, no ho tropa neʼebé barak loos.
8 Nia sei halakon ó-nia povu iha knua sira ho surik, no nia sei halo serku ba ó hodi harii moru no ateru rai hodi halo aas atu ataka no nia sei uza eskudu boot atu kontra ó.
9 Nia sei baku ó-nia moru sira ho ekipamentu funu nian,* no nia sei harahun ó-nia uma aas* sira ho baliu sira.*
10 Ninia kuda mak barak tebes toʼo sira halo rai-rahun taka ó, no lian husi ninia tropa neʼebé saʼe kuda, lian husi roda sira no kuda-karreta sira sei halo ó-nia moru sira nakdoko bainhira nia tama ó-nia portaun, hanesan ema barak neʼebé halai tama ba sidade liuhusi moru neʼebé rahun ona.
11 Ninia kuda sira sei sama ó-nia dalan hotu.+ Nia sei oho ó-nia povu ho surik, no ó-nia riin forte sira sei monu rahun toʼo rai.
12 Sira sei foti ó-nia rikusoin, hadau sasán neʼebé ó faʼan,+ harahun ó-nia moru, no baku rahun ó-nia uma sira neʼebé furak. Tuirmai sira sei raʼut ó-nia fatuk, ai, no rai hodi soe ba tasi laran.’
13 “‘Haʼu sei hapara lian husi ó-nia knananuk, no ema sei la rona tan lian husi ó-nia arpa sira.+
14 Haʼu sei halo ó sai moos hanesan fatuk neʼebé kabeer, no ó sei sai fatin neʼebé maran atu ema habai rede.+ Ema sei nunka harii fali ó, tanba haʼu, Jeová, mak fó sai liafuan sira-neʼe’, Jeová, Naʼi Ukun-Naʼin Boot Liu, mak dehan.
15 “Jeová, Naʼi Ukun-Naʼin Boot Liu, dehan nuneʼe ba Tiro: ‘Illa sira sei nakdoko tanba lian boot bainhira ó monu, lian halerik bainhira ó-nia ema sira besik atu mate,* no bainhira ema oho ó-nia povu iha ó-nia leet.+
16 Ulun-naʼin* hotu iha tasi sei tun husi sira-nia kadunan no hasai tiha sira-nia roupa neʼebé la iha liman no roupa neʼebé borda ho didiʼak, no sira sei nakdedar loos.* Sira sei tuur iha rai no kontinua nakdedar hodi hateke ba ó ho hakfodak.+
17 No sira sei kanta knananuk triste nian*+ kona-ba ó no dehan ba ó:
“Oh sidade neʼebé hela iha tasi, neʼebé ema gaba, ó lakon ona.+Uluk ó no ó-nia* ema sira mak kbiit boot iha tasi,+No halo ema hotu iha rai sai taʼuk!
18 Illa sira sei nakdedar iha loron neʼebé ó monu,Illa sira iha tasi sei neon-susar bainhira ó lakon.”’+
19 “Tanba Jeová, Naʼi Ukun-Naʼin Boot Liu, dehan nuneʼe: ‘Bainhira haʼu halo ó sai hanesan sidade sira neʼebé ema la hela tan, bainhira haʼu halo ó mout ho bee neʼebé suli makaʼas no bee neʼebé forsa boot taka ona ó,+
20 haʼu sei lori ó hamutuk ho sira neʼebé tun daudaun ba rate* hodi tun ba ema sira neʼebé mate horiuluk kedas. Haʼu sei halo ó hela iha rai okos liu, hanesan fatin sira neʼebé rahun ba tempu kleur ona, hamutuk ho sira neʼebé tun daudaun ba rate,+ atu nuneʼe ema labele hela tan iha ó. Tuirmai haʼu sei hafurak* rai neʼebé ema moris sira hela bá.
21 “Jeová, Naʼi Ukun-Naʼin Boot Liu, dehan: ‘Haʼu sei halo susar kona ó derrepente deʼit, no ó sei la iha tan.+ Sira sei buka ó, maibé sei nunka hetan ó.’”
Nota-rodapé
^ Neʼe refere ba Liurai Joaquim, Ezequiel no ema Judeu sira seluk sai dadur ba tinan 11. Haree Eze 1:2.
^ Ka “torre”.
^ Orj., “oan-feto sira”.
^ Orj., “Nabukodorozór”.
^ Neʼe katak karreta boot neʼebé uza atu sobu moru.
^ Ka “torre”.
^ Ka “surik sira”.
^ Orj., “sira neʼebé ema oho”.
^ Ka “xefe”.
^ Orj., “no nakdedar sei falun sira hanesan roupa”.
^ Orj., “feto neʼe no ninia”.
^ Ka “knananuk lelir nian”.
^ Ka “rai-kuak”.
^ Ka “fó glória ba”.
