Ezequiel 37:1-28
37 Jeová fó forsa mai haʼu,* no liuhusi ninia espíritu, Jeová lori haʼu no tau haʼu iha rai-tetuk nia klaran,+ no fatin neʼe nakonu ho mate-ruin sira.
2 Nia lori haʼu laʼo haleʼu mate-ruin sira-neʼe hotu, no haʼu haree katak ruin barak tebes iha rai-tetuk neʼe, no ruin sira-neʼe hotu maran-dekor ona.+
3 Nia husu haʼu: “Oan-mane husi ema, mate-ruin sira-neʼe bele moris fali ka lae?” Haʼu hatán: “Jeová, Naʼi Ukun-Naʼin Boot Liu, Ita-Boot mak hatene.”+
4 Entaun nia dehan ba haʼu: “Fó sai profesia kona-ba mate-ruin sira-neʼe, no dehan ba sira: ‘Imi ruin sira neʼebé maran-dekor, rona ba Jeová nia liafuan:
5 “‘Jeová, Naʼi Ukun-Naʼin Boot Liu, dehan nuneʼe ba ruin sira-neʼe: “Haʼu sei huu iis ba imi, no imi sei moris fali.+
6 Haʼu sei tau uat no isin ba imi, no haʼu sei taka imi ho kulit no fó iis ba imi, no imi sei moris. Nuneʼe imi sei hatene duni katak haʼu mak Jeová.”’”
7 Tuirmai haʼu fó sai profesia hodi tuir ninia mandamentu. Bainhira haʼu fó sai tiha profesia, haʼu rona kedas tarutu, lian barullu, no ruin sira-neʼe komesa tutan malu, ruin ida ho ruin seluk.
8 Tuirmai haʼu haree uat no isin taka ruin sira-neʼe, no kulit mós taka sira. Maibé sira-nia iis seidauk iha.
9 Tuirmai nia dehan ba haʼu: “Fó sai profesia ba anin. Oh oan-mane husi ema, fó sai profesia bá no dehan ba anin: ‘Jeová, Naʼi Ukun-Naʼin Boot Liu, dehan nuneʼe: “Oh anin* husi rai nia lidun haat,* mai lai, no huu ba ema sira-neʼe neʼebé ema oho ona, atu nuneʼe sira bele moris fali.”’”
10 Entaun haʼu fó sai profesia hodi tuir ninia mandamentu, no iis* tama ba sira. Sira komesa moris no hamriik,+ sira hotu mak tropa lubun neʼebé boot tebes.
11 Tuirmai nia dehan ba haʼu: “Oan-mane husi ema, ruin sira-neʼe mak umakain Izraél tomak.+ Sira dehan: ‘Ami-nia ruin maran ona, no ami-nia esperansa lakon ona.+ Ami mesak deʼit ona.’
12 Tan neʼe, fó sai profesia no hatete ba sira: ‘Jeová, Naʼi Ukun-Naʼin Boot Liu, dehan nuneʼe: “Oh haʼu-nia povu, haʼu sei loke imi-nia rate sira+ no halo imi sai husi rate,* no lori imi ba rai-Izraél.+
13 Oh haʼu-nia povu, bainhira haʼu loke imi-nia rate sira no halo imi sai husi rate, imi sei hatene duni katak haʼu mak Jeová.”’+
14 Jeová dehan: ‘Haʼu sei tau haʼu-nia espíritu iha imi no imi sei moris,+ no haʼu sei halo imi hela metin iha imi-nia rai. Nuneʼe imi sei hatene duni katak haʼu, Jeová, mak fó sai liafuan sira-neʼe no haʼu kumpre ona ida-neʼe.’”
15 Jeová koʼalia tan mai haʼu, hodi dehan:
16 “Oan-mane husi ema, foti ai-pedasuk ida no hakerek liafuan tuirmai iha ai neʼe: ‘Ba Judá no ba povu Izraél neʼebé hamutuk ho nia.’*+ Depois neʼe, foti tan ai-pedasuk seluk no hakerek liafuan tuirmai iha ai neʼe: ‘Ba José nia ai-pedasuk neʼebé reprezenta Efraim no ba umakain Izraél hotu neʼebé hamutuk ho nia.’*+
17 Depois neʼe, kaer ai rua neʼe hamutuk atu nuneʼe sira bele sai ai ida deʼit iha ó-nia liman.+
18 Bainhira ó-nia povu hatete ba ó: ‘Fó sai ba ami buat sira-neʼe katak sá?’
19 hatete ba sira: ‘Jeová, Naʼi Ukun-Naʼin Boot Liu, dehan nuneʼe: “Haʼu sei foti ai-pedasuk José nian, neʼebé iha Efraim nia liman, no mós Izraél nia suku sira neʼebé hamutuk ho nia, no haʼu sei tau sira hamutuk ho ai-pedasuk Judá nian. Haʼu sei halo sira sai ai-pedasuk ida deʼit,+ no sira sei sai ida deʼit iha haʼu-nia liman.”’
20 Ó tenke kaer ai-pedasuk rua neʼebé ó hakerek ona liafuan atu sira bele haree.
21 “Tuirmai hatete ba sira: ‘Jeová, Naʼi Ukun-Naʼin Boot Liu, dehan nuneʼe: “Haʼu sei foti ema Izraél husi nasaun sira-nia leet neʼebé sira namkari bá, no haʼu sei halibur sira hamutuk husi fatin hotu no lori sira ba sira-nia rai.+
22 Haʼu sei halo sira sai nasaun ida deʼit iha rai neʼe,+ iha Izraél nia foho sira, no liurai ida mak sei ukun sira hotu.+ Sira sei la fahe tan ba nasaun rua, no la fahe tan ba ukun rua.+
23 Sira sei la hafoʼer tan sira-nia an ho estátua sira neʼebé haʼu hakribi* no ho sira-nia hahalok aat no sira-nia hahalok sala hotu.+ Haʼu sei salva sira husi sira-nia hahalok sala hotu neʼebé sira halo hasoru haʼu hodi la hatudu laran-metin ba haʼu, no haʼu sei hamoos sira. Sira sei sai haʼu-nia povu, no haʼu sei sai sira-nia Maromak.+
24 “‘“Haʼu-nia atan David sei sai sira-nia liurai,+ no sira hotu sei iha bibi-atan ida deʼit.+ Sira sei kumpre haʼu-nia desizaun no halo tuir ho didiʼak haʼu-nia ukun-fuan sira.+
25 Sira sei hela iha rai neʼebé haʼu entrega ona ba haʼu-nia atan Jacob, rai neʼebé uluk imi-nia beiʼala sira hela bá.+ Sira no sira-nia oan* no sira-nia bei-oan sira+ sei hela iha neʼebá ba nafatin,+ no haʼu-nia atan David sei sai sira-nia xefe* ba nafatin.+
26 “‘“Haʼu sei halo aliansa dame nian ho sira,+ neʼe mak aliansa ba nafatin ho sira. Haʼu sei prepara fatin ba sira no halo sira sai barak+ no tau haʼu-nia fatin sagradu iha sira-nia leet ba nafatin.
27 Haʼu-nia tenda* sei hamutuk ho sira,* no haʼu sei sai sira-nia Maromak, no sira sei sai haʼu-nia povu.+
28 No bainhira haʼu-nia fatin sagradu iha sira-nia leet ba nafatin, nasaun sira sei hatene duni katak haʼu, Jeová, mak halo santu* Izraél.”’”+
Nota-rodapé
^ Orj., “Jeová tau liman ba haʼu”.
^ Ka “iis; espíritu”. Haree “Ruah” iha Glosáriu.
^ Orj., “husi anin haat”.
^ Ka “espíritu”.
^ Neʼe mak liafuan simbóliku neʼebé refere ba hadiʼa fali Maromak nia povu nia kondisaun.
^ Ka “neʼebé nuʼudar ninia maluk”.
^ Ka “neʼebé nuʼudar ninia maluk”.
^ Ka “ídolu sira neʼebé foʼer tebes”. Liafuan Ebraiku neʼe karik mai husi liafuan “teen”. Liafuan neʼe uza atu hatudu hakribi.
^ Ka “ulun-naʼin”.
^ Orj., “oan-mane sira”.
^ Ka “hela-fatin; uma”.
^ Ka “sei taka sira”.
^ Haree “Halo santu” iha Glosáriu.
