Ezequiel 46:1-24
46 “Jeová, Naʼi Ukun-Naʼin Boot Liu, dehan nuneʼe: ‘Pátiu* kiʼik nia portaun* neʼebé hateke ba parte leste+ tenke taka nafatin+ ba loron serbisu nian, ba loron neen,+ maibé iha loron Sábadu no loron atu komesa fulan-foun, portaun neʼe tenke loke.
2 Xefe sei tama portaun neʼe husi pátiu boot liuhusi portaun neʼe nia varanda,+ no nia sei hamriik besik portaun neʼe nia riin. Amlulik sira sei hasaʼe tomak ninia sakrifísiu sunu nian no ninia sakrifísiu dame nian, no nia tenke hakruʼuk iha portaun nia área atu tama no tuirmai nia tenke sai. Maibé portaun neʼe tenke loke nafatin toʼo kalan.
3 Iha loron Sábadu no fulan-foun,+ povu iha rai neʼe mós tenke hakruʼuk iha Jeová nia oin iha fatin atu tama portaun neʼe.
4 “‘Iha loron Sábadu, xefe tenke fó bibi-malae oan* neen no bibi-malae aman ida neʼebé la iha moras, nuʼudar sakrifísiu sunu nian neʼebé hasaʼe tomak ba Jeová.+
5 Sakrifísiu trigu* nian mak efa* isin ida ho bibi-malae aman neʼe no nia bele fó tan tuir ninia kbiit hamutuk ho bibi-malae oan sira-neʼe, no mós fó mina litru tolu ho balu* ho trigu efa ida-idak.+
6 Iha loron neʼebé komesa fulan-foun, nia tenke hasaʼe karau-aman* ida husi karau-lubun, bibi-malae oan neen no bibi-malae aman ida nuʼudar sakrifísiu. Animál sira-neʼe labele iha moras.+
7 Nia tenke fó sakrifísiu trigu nian efa isin ida ho karau-aman neʼe, efa isin ida ho bibi-malae aman neʼe, no fó tan tuir ninia kbiit hamutuk ho bibi-malae oan sira-neʼe. No nia tenke fó mina litru tolu ho balu ho trigu efa ida-idak.
8 “‘Bainhira xefe neʼe tama, nia tenke tama liuhusi portaun nia varanda, no nia mós tenke sai liuhusi dalan neʼebé hanesan.+
9 No bainhira povu iha rai neʼe mai atu adora Jeová durante tempu festa nian,+ povu sira neʼebé tama liuhusi portaun parte norte nian+ tenke sai liuhusi portaun parte súl nian,+ no sira neʼebé tama liuhusi portaun parte súl nian tenke sai liuhusi portaun parte norte nian. Ema ida labele fila fali liuhusi portaun neʼebé nia tama, tanba sira tenke sai liuhusi portaun neʼebé iha sira-nia oin.
10 Kona-ba xefe neʼebé iha povu nia leet, nia tenke tama bainhira povu tama, no nia tenke sai bainhira povu sai.
11 Durante tempu festa nian,* xefe neʼe tenke fó sakrifísiu trigu nian efa isin ida ho karau-aman ida, efa isin ida ho bibi-malae aman ida, no fó tan tuir ninia kbiit hamutuk ho bibi-malae oan sira. Nia tenke fó mina litru tolu ho balu ho efa ida-idak.+
12 “‘Se xefe neʼe fó sakrifísiu sunu nian+ neʼebé hasaʼe tomak ka sakrifísiu dame nian ba Jeová ho ninia hakarak rasik, ema sei loke portaun neʼebé hateke ba parte leste ba nia, no nia sei fó ninia sakrifísiu sunu nian neʼebé hasaʼe tomak no sakrifísiu dame nian hanesan nia halo iha loron Sábadu.+ Bainhira nia sai ona, portaun neʼe tenke taka fali.+
13 “‘Loroloron, ó tenke fó bibi-malae oan* neʼebé seidauk toʼo tinan ida no la iha moras hodi sai nuʼudar sakrifísiu sunu nian neʼebé hasaʼe tomak ba Jeová.+ Ó tenke fó sakrifísiu neʼe dadeer-dadeer.
14 Dadeer-dadeer ó tenke fó sakrifísiu trigu nian sea nanotak* hamutuk ho bibi-malae oan neʼe, no ho mina litru ida ho mililitru 200* atu bele hisik ba trigu uut neʼebé diʼak nia leten nuʼudar sakrifísiu trigu nian neʼebé hasaʼe beibeik ba Jeová. Ukun-fuan neʼe ba nafatin.
15 Dadeer-dadeer sira tenke fó bibi-malae oan, sakrifísiu trigu nian no mina nuʼudar sakrifísiu sunu nian neʼebé hasaʼe tomak. Neʼe mak sakrifísiu neʼebé tenke hasaʼe beibeik.’
16 “Jeová, Naʼi Ukun-Naʼin Boot Liu, dehan nuneʼe: ‘Se xefe fó rai* ba ninia oan-mane ida-idak nuʼudar liman-rohan, rai neʼe sei sai ninia oan nian. Neʼe mak sira-nia liman-rohan.
17 Maibé se nia fó rai balu husi ninia liman-rohan ba ninia atan, neʼe sei sai atan neʼe nian toʼo tinan livre nian,+ no tuirmai rai neʼe sei entrega fali ba xefe. Só deʼit ninia oan-mane sira-nia liman-rohan mak sira-nian ba nafatin.
18 Xefe labele obriga povu atu sai husi sira-nia rai hodi hadau povu nia liman-rohan neʼe. Xefe tenke fahe ninia rai rasik ba ninia oan-mane sira nuʼudar liman-rohan, atu nuneʼe haʼu-nia povu labele sai husi sira-nia rai rasik.’”
19 Tuirmai nia lori haʼu ba amlulik nia sala han-fatin* sira neʼebé santu, liuhusi fatin atu tama+ iha portaun nia sorin, neʼebé hateke ba parte norte.+ Iha neʼebá haʼu haree fatin ida iha kotuk iha parte oeste.
20 Nia hatete ba haʼu: “Neʼe mak fatin ba amlulik sira atu daʼan naʼan husi sakrifísiu taka sala nian no sakrifísiu sala nian, no mós iha fatin neʼe mak sira tunu sakrifísiu trigu nian,+ atu nuneʼe sira la lori buat ruma sai ba pátiu boot no halo santu povu sira tanba buat neʼebé sira lori.”+
21 Nia lori haʼu ba pátiu boot no lori haʼu liu pátiu nia lidun haat, no haʼu haree pátiu ida iha pátiu boot nia lidun ida-idak.
22 Iha pátiu boot nia lidun haat iha pátiu kiʼik, naruk kóvado* 40 no luan kóvado 30. Pátiu kiʼik haat neʼe boot hanesan deʼit.*
23 Iha didin neʼebé haleʼu pátiu kiʼik haat neʼe, no iha didin hun, sira harii fatin atu daʼan naʼan husi sakrifísiu sira.
24 Tuirmai nia dehan ba haʼu: “Uma sira-neʼe mak fatin ba ema neʼebé serbisu iha templu atu daʼan naʼan husi povu nia sakrifísiu sira.”+
Nota-rodapé
^ Portaun neʼe mak hanesan uma boot neʼebé iha kuartu balu iha laran no ninia varanda mak iha kotuk.
^ Ka “bibi-malae oan neʼebé aman”.
^ Neʼe bele refere mós ba sevada. Haree “Sakrifísiu trigu nian” iha Glosáriu.
^ Ka “karau-oan neʼebé aman”.
^ Orj., “Durante festa no tempu festa nian sira”.
^ Ka “bibi-malae oan neʼebé aman”.
^ Orj., “him 1/3”.
^ Orj., “efa 1/6”.
^ Orj., “fó prezente”.
^ Ka “kuartu”.
^ Ka “Pátiu haat neʼe no uma sira iha pátiu neʼe nia lidun mak boot hanesan deʼit”.
