Filipe 3:1-21
3 Ikusliu, haʼu-nia maun-alin sira, kontinua haksolok iha Naʼi.+ Tuir loloos, la todan ba haʼu atu hakerek fali ba imi buat neʼebé haʼu hakerek ona, tanba ida-neʼe proteje imi.
2 Kuidadu bá ho ema neʼebé hanesan asu.* Kuidadu bá ho sira neʼebé halo buat aat. Kuidadu bá ho sira neʼebé habelar hanorin kona-ba sirkunsizaun.*+
3 Tuir loloos, ita mak ema sira neʼebé hetan sirkunsizaun loloos,+ tanba ita halo serbisu sagradu liuhusi Maromak nia espíritu no ita sente orgullu iha Kristu Jesus+ no ita la sadere ba buat isin nian.
4 Se haʼu hakarak sadere ba buat isin nian, haʼu iha duni razaun atu halo ida-neʼe.
Se ema ruma hanoin katak sira iha razaun atu tau fiar iha buat isin nian, haʼu iha razaun barak liu fali sira:
5 Haʼu hetan sirkunsizaun bainhira haʼu foin loron ualu,+ haʼu husi nasaun Izraél, husi suku Benjamim, haʼu ema Ebreu neʼebé moris mai husi ema Ebreu.+ Kona-ba ukun-fuan, haʼu ema Farizeu;+
6 kona-ba laran-manas, haʼu fó-terus ba kongregasaun;*+ kona-ba sai ema laran-loos liuhusi ukun-fuan, haʼu fó ona prova katak haʼu sempre halo hahalok loos.
7 Maibé tanba Kristu, buat sira neʼebé uluk folin-boot ba haʼu, haʼu haree ona nuʼudar folin-laek.*+
8 Laʼós neʼe deʼit, haʼu haree buat hotu hanesan folin-laek tanba koñesimentu neʼebé folin-boot kona-ba haʼu-nia Naʼi, Kristu Jesus. Haʼu husik ona buat hotu tanba nia no haree buat sira-neʼe nuʼudar foʼer* deʼit, atu Kristu bele simu haʼu
9 no haʼu bele sai ida deʼit ho nia. Haʼu la dehan katak haʼu ema laran-loos ona tanba halo tuir Ukun-Fuan, maibé sai ema laran-loos liuhusi fiar+ ba Kristu.+ Sin, Maromak haree ema neʼebé fiar ba Kristu nuʼudar ema laran-loos.+
10 Haʼu-nia hakarak mak atu hatene nia no hatene kona-ba kbiit neʼebé halo nia moris hiʼas+ husi mate. Haʼu hakarak atu terus hanesan nia+ no mós mate hanesan nia,+
11 hodi haree se haʼu bele hetan moris-hiʼas uluk nian husi mate.+
12 Haʼu la dehan katak haʼu simu ona haʼu-nia kolen ka haʼu sai perfeitu ona, maibé haʼu hakaʼas an daudaun+ atu haʼu bele hetan kolen neʼebé Kristu Jesus hili ona haʼu atu simu.+
13 Maun-alin sira, haʼu seidauk sente katak haʼu kaer metin ona ida-neʼe. Maibé buat ida deʼit mak haʼu halo: Haʼu haluha ona buat sira neʼebé iha kotuk+ no hakaʼas an atu hetan buat sira neʼebé iha oin.+
14 Haʼu kontinua halai ho hakarak atu simu kolen+ neʼebé Maromak bolu haʼu atu simu, katak moris iha lalehan+ liuhusi Kristu Jesus.
15 Tan neʼe, ita hotu neʼebé maduru ona,+ mai ita kontinua iha hanoin hanesan neʼe, no se imi iha hanoin neʼebé oin-seluk, Maromak sei hatudu sai ba imi hanoin neʼebé loos.
16 Maibé, nuʼudar ita laʼo ba oin ona, mai ita kontinua laʼo ba oin iha dalan neʼebé hanesan.
17 Maun-alin sira, halo tuir haʼu-nia ezemplu ho laran ida deʼit,+ no haree didiʼak ba sira neʼebé halo tuir ezemplu neʼebé ami hatudu ona ba imi.
18 Tanba iha ema barak neʼebé uluk haʼu temi beibeik, maibé agora haʼu temi sira ho matan-been tanba sira laʼo nuʼudar inimigu ba Kristu nia ai-riin terus nian.*
19 Sira-nia rohan mak mate, no sira-nia maromak mak sira-nia kabun, no sira gaba an kona-ba buat neʼebé lori moe ba sira, no sira tau sira-nia hanoin ba buat mundu neʼe nian.+
20 Maibé ita-nia hela-fatin+ mak iha lalehan,*+ no ita mós hein namanas ba ita-nia salvadór husi lalehan, neʼe mak Naʼi Jesus Kristu.+
21 Nia sei uza ninia kbiit boot atu halo buat hotu hakruʼuk ba nia.+ Ho kbiit neʼe, nia sei troka ita-nia isin-lolon neʼebé fraku hodi sai hanesan ninia isin-lolon neʼebé iha glória.+
Nota-rodapé
^ Neʼe katak ema neʼebé hafoʼer sira-nia an tuir Maromak nia haree liuhusi sira-nia hanorin.
^ Ka “sira neʼebé hakanek isin”. Haree “Sirkunsizaun” iha Glosáriu.
^ Ka karik “haʼu husik ona ho hakarak rasik”.
^ Ka “lixu”.
^ Ka “ita mak sidadaun lalehan nian”.
