Isaias 1:1-31
1 Iha tempu neʼebé Liurai Uzias,+ Jotão,+ Acaz+ no Ezequias+ mak ukun rai-Judá,+ Amoz nia oan-mane Isaias*+ haree vizaun tuirmai neʼe kona-ba Judá no Jeruzalein:
2 Oh lalehan, rona bá, oh rai, see tilun bá,+Tanba Jeová koʼalia ona:
“Haʼu haboot oan-mane sira,+Maibé sira kontra fali haʼu.+
3 Karau-aman ida hatene ninia naʼin,No kuda-burru ida hatene ninia luhan neʼebé ninia naʼin harii ba nia;Maibé Izraél la hatene haʼu,*+Haʼu-nia povu rasik la hatudu hahalok matenek.”
4 Susar ba nasaun neʼebé nakonu ho sala,+Povu neʼebé lori sala sira hanesan naha todan,Oan sira neʼebé aat no laran-makerek!
Sira husik ona Jeová;+Sira la hatudu respeitu ba Izraél nia Maromak neʼebé Santu;Sira fila kotuk ona ba nia.
5 Iha neʼebé tan mak haʼu tenke baku imi* tanba imi kontinua kontra haʼu?+
Imi-nia ulun tomak kanek ona,No moras kona ona imi-nia fuan tomak.+
6 Husi ain toʼo ulun, la iha parte ida neʼebé la moras.
Iha kanek, bubu, no kanek neʼebé tasak,Neʼe hotu seidauk hamoos,* falun ka kose ho mina.+
7 Imi-nia rai mamuk ona.
Imi-nia sidade sira ahi han ona.
Ema estranjeiru tolan imi-nia rai iha imi-nia oin kedas.+
Hanesan inimigu husi rai seluk tama no harahun ona buat hotu.+
8 Sidade Siaun* husik hela hanesan barraka iha toʼos-uvas,Hanesan fatin mahon iha toʼos-pepinu,
Hanesan sidade neʼebé tropa halo serku hela.+
9 Se Jeová neʼebé ukun tropa lalehan nian la husik ita balu moris hela,Ita sai ona hanesan Sodoma,No ita sei haree hanesan Gomorra.+
10 Oh imi ukun-naʼin aat sira husi Sodoma, rona Jeová nia liafuan bá.+
Oh povu husi Gomorra, see tilun ba ita-nia Maromak nia ukun-fuan.*+
11 Jeová dehan: “Haʼu hetan buat diʼak saida husi sakrifísiu barak neʼebé imi hasaʼe?+
Haʼu sai baruk ona ho bibi-malae aman+ no naʼan bokur husi animál sira neʼebé bokur,+ neʼebé imi hasaʼe nuʼudar sakrifísiu sunu nian,No haʼu la kontente ho raan+ husi karau-aman,+ bibi-malae oan no bibi-timur.+
12 Sé mak haruka imi mai hamriik iha haʼu-nia oin,+Atu sama haʼu-nia templu nia pátiu* sira?+
13 Keta lori tan sakrifísiu trigu* nian neʼebé la iha folin.
Haʼu hakribi imi-nia insensu.*+
Imi selebra fulan-foun,+ loron Sábadu,+ no halaʼo reuniaun boot,+Maibé haʼu la tahan ona tanba imi uza forsa masonik nian+ iha imi-nia reuniaun espesiál sira.
14 Haʼu* odi imi-nia festa fulan-foun nian no imi-nia festa sira seluk.
Sira sai ona hanesan buat todan ba haʼu;Haʼu sai kole ona atu lori buat sira-neʼe.
15 No kuandu imi foti saʼe imi-nia liman hodi harohan,Haʼu subar haʼu-nia oin husi imi.+
Maski imi halo orasaun dala barak,+Haʼu la rona;+Imi-nia liman nakonu ho raan.*+
16 Fase imi-nia an bá, hodi halo imi-nia an sai moos;+Hasai tiha imi-nia hahalok aat iha haʼu-nia oin;Labele halo tan buat neʼebé aat.+
17 Aprende atu halo buat diʼak, buka justisa bá,+Korrije ema neʼebé hanehan ema seluk,Defende oan-kiak* nia direitu,No defende feto-faluk nia kazu.”+
18 Jeová dehan: “Agora mai, mai ita hadiʼa problema entre ita,+
Maski imi-nia sala sira mak mean,Sira sei sai mutin fali hanesan jelu-rahun;+Maski sala sira-neʼe mak hanesan hena mean,Sira sei sai mutin fali hanesan bibi-malae fulun.
19 Se imi prontu atu rona,Imi sei han buat diʼak husi rai neʼe.+
20 Maibé se imi lakohi no kontra fali,Surik sei tolan imi,+Tanba Jeová nia ibun rasik mak fó sai ona ida-neʼe.”
21 Sidade neʼebé laran-metin+ sai ona feto-aat!*+
Uluk sidade neʼe nakonu ho justisa;+No hahalok loos mak hela iha sidade neʼe nia laran,+Maibé agora ohodór deʼit mak iha sidade neʼe.+
22 Oh sidade, ó-nia osan-mutin sai foʼer ona,+No ó-nia serveja kahur ona ho bee.
23 Ó-nia ulun-naʼin sira mak ulun-toos no sai belun ho naʼok-teen sira.+
Sira ida-idak gosta simu prezente atu bobar lia-loos no buka deʼit prezente.+
Sira la lori justisa ba oan-kiak sira,No taka matan ba feto-faluk sira-nia kazu.+
24 Tan neʼe, Naʼi neʼebé loos, Jeová neʼebé ukun tropa lalehan nian,Maromak neʼebé Kbiit Boot iha Izraél, dehan:
“Toʼo ona! Haʼu sei halo livre haʼu-nia an husi haʼu-nia inimigu,No haʼu sei selu fali ba haʼu-nia inimigu sira-nia hahalok aat.+
25 Haʼu sei foti liman hodi kontra ó,Haʼu sei hasai tiha buat foʼer husi ó hanesan ema halo nabeen osan-mutin hodi halo moos,No haʼu sei hasai tiha buat hotu neʼebé la moos husi ó.+
26 Haʼu sei fó juís sira ba ó hanesan ulukNo fó konsellu-naʼin sira ba ó hanesan tempu uluk.+
Depois neʼe, ó-nia naran sei sai nuʼudar Sidade Hahalok Loos nian no Knua Laran-Metin.+
27 Ho justisa, haʼu sei sosa fali Siaun,+No ho hahalok loos, haʼu sei sosa ninia povu neʼebé fila fali.
28 Ema kontradór no sala-naʼin sira sei harahun tiha hamutuk,+No sira neʼebé husik Jeová sei lakon tiha.+
29 Imi sei sai moe kona-ba ai-hun boot sira neʼebé imi kaan,+No imi sei sente moe tanba jardín* sira neʼebé imi hili.+
30 Imi sei sai hanesan ai-hun boot neʼebé ninia tahan namlaek,+No hanesan jardín ida neʼebé la iha bee.
31 Mane forte sei sai hanesan duʼut-maran,*No ninia serbisu sei sai hanesan ahi-funan;Ahi sei han buat rua neʼe hamutuk,No la iha ema ida atu hamate ahi neʼe.”
Nota-rodapé
^ Naran neʼe katak “Salvasaun husi Jeová”.
^ Ka “la hatene ninia naʼin”.
^ Ka “imi-nia isin”.
^ Orj., “buti”.
^ Orj., “Siaun nia oan-feto”.
^ Ka “hanorin”.
^ Neʼe bele refere mós ba sevada. Haree “Sakrifísiu trigu nian” iha Glosáriu.
^ Haree “Nefes” iha Glosáriu.
^ Ka “Imi oho ona ema barak”.
^ Ka “labarik neʼebé la iha aman”.
^ Ka “prostituta”.
^ Karik neʼe refere ba ai-hun no jardín sira neʼebé ema uza atu adora estátua.
^ Ka “kabas husi duʼut-liñu”.
