Isaias 19:1-25
19 Tuirmai neʼe mak liafuan kastigu nian kona-ba Ejitu:+
Haree bá! Jeová saʼe hela kalohan ida neʼebé semo lalais atu bá rai-Ejitu.
Rai-Ejitu nia maromak sira neʼebé folin-laek sei nakdedar iha ninia oin,+No ema Ejitu sei sai taʼuk tebes.*
2 “Haʼu sei soran ema Ejitu atu sira kontra malu,No sira sei funu malu,Sira ida-idak hasoru ninia maun-alin no ninia maluk,Sidade ida hasoru sidade seluk, ukun ida hasoru ukun seluk.
3 Ema Ejitu sei sai bilán,No haʼu sei halo sira-nia planu sai runguranga.+
Sira sei husu ajuda ba maromak sira neʼebé folin-laek,Ba ema neʼebé kaer maninga, ema neʼebé koko atu koʼalia ba ema mate no ema neʼebé siʼik futuru.”+
4 Naʼi neʼebé loos, Jeová neʼebé ukun tropa lalehan nian, dehan: “Haʼu sei entrega ema Ejitu ba ulun-naʼin neʼebé siʼak-teen,No liurai neʼebé siʼak mak sei ukun sira.”+
5 Bee iha tasi sei sai maran,No mota sira sei sai maran no la iha bee.+
6 No mota sira sei sai dois;Iha rai-Ejitu, Mota Nilo nia mota kiʼik sira-nia bee sei sai menus no maran.
Duʼut sira iha Mota Nilo mós sei sai dodok.+
7 Ai-horis sira besik Mota Nilo no iha Mota Nilo nia ibun sei sai maran,No rai hotu neʼebé uza atu kuda fini besik Mota Nilo+ sei sai maran.+
Anin sei huu sai tiha ida-neʼe, no neʼe sei la iha tan.
8 Peskadór sira sei lelir,Sira neʼebé soe kail ba Mota Nilo sei halerik,No sira neʼebé soe rede ba bee sei sai uitoan deʼit.
9 Sira neʼebé halo kabas husi duʼut-liñu*+No sira neʼebé soru hena mutin sei hetan moe.
10 Ema Ejitu neʼebé soru hena sei triste,No serbisu-naʼin hotu iha rai-Ejitu sei tanis.
11 Ulun-naʼin husi Zoan+ mak beik.
Faraó* nia konsellu-naʼin sira neʼebé matenek liu, fó konsellu neʼebé la diʼak.+
Oinsá mak imi bele dehan ba Faraó:
“Haʼu mak ema matenek nia oan,Jerasaun husi liurai sira iha tempu uluk”?
12 Entaun, ó-nia ema matenek sira iha neʼebé?+
Se sira hatene karik, husik sira fó sai ba ó saida mak Jeová neʼebé ukun tropa lalehan nian deside ona kona-ba rai-Ejitu.
13 Ulun-naʼin sira husi Zoan halo ona hahalok beik;Ulun-naʼin sira husi Nof*+ lohi ona sira-nia an;Xefe sira ba ema Ejitu nia suku sira halo ema Ejitu laʼo sala dalan.
14 Jeová halo ona sira sai bilán;+No ulun-naʼin sira halo ema Ejitu laʼo sala dalan iha buat hotu neʼebé sira halo,Hanesan lanu-teen neʼebé laʼo namlele iha ninia muta laran.
15 Maski ulun ka ikun, dikin ka duʼut naruk,*Ema Ejitu sei labele halo buat ida.
16 Iha loron neʼebá, ema Ejitu sei sai hanesan feto, no sira sei nakdedar no taʼuk tanba Jeová neʼebé ukun tropa lalehan nian sei foti liman hasoru sira.+
17 No rai-Judá sei sai hanesan buat neʼebé halo ema Ejitu taʼuk. Sira sei sente taʼuk bainhira ema temi kona-ba Judá tanba Jeová neʼebé ukun tropa lalehan nian halo ona desizaun ida hasoru sira.+
18 Iha loron neʼebá, ema iha sidade lima iha rai-Ejitu sei koʼalia língua Kanaan nian*+ no jura hodi hatudu laran-metin ba Jeová neʼebé ukun tropa lalehan nian. Sidade sira-neʼe ida sei hanaran nuʼudar Sidade Harahun nian.
19 Iha loron neʼebá, sei iha altár ida ba Jeová iha rai-Ejitu nia klaran no sei iha ai-riin ida ba Jeová iha rai-Ejitu nia fronteira.
20 Ida-neʼe sei sai hanesan sinál ida no hanesan sasin ba Jeová neʼebé ukun tropa lalehan nian iha rai-Ejitu. Sira sei halerik ba Jeová tanba ema hanehan sira, no nia sei haruka salvadór, ida neʼebé kmanek, neʼebé sei salva sira.
21 No Jeová sei halo ema Ejitu hatene nia, no iha loron neʼebá ema Ejitu sei hatene Jeová, no sira sei hasaʼe sakrifísiu no fó prezente no halo juramentu ba Jeová no kumpre ida-neʼe.
22 Jeová sei fó kastigu ba rai-Ejitu.+ Nia sei ataka no kura sira. Sira sei fila fali ba Jeová, no nia sei hatán ba sira-nia harohan no kura sira.
23 Iha loron neʼebá, sei iha estrada boot ida+ neʼebé sai husi rai-Ejitu ba rai-Asíria. Tuirmai ema Asíria sei laʼo ba rai-Ejitu, no ema Ejitu sei laʼo ba rai-Asíria, no ema Ejitu sei serbí Maromak hamutuk ho ema Asíria.
24 Iha loron neʼebá, ema Izraél sei hamutuk ho* ema Ejitu no Asíria,+ no sai nuʼudar bensaun iha rai klaran,
25 tanba Jeová neʼebé ukun tropa lalehan nian sei fó bensaun ba sira, hodi dehan: “Bensaun ba Ejitu neʼebé nuʼudar haʼu-nia povu, no bensaun ba Asíria neʼebé haʼu-nia liman mak halo, no bensaun ba Izraél neʼebé nuʼudar haʼu-nia liman-rohan.”+
Nota-rodapé
^ Orj., “Ejitu nia fuan sei nabeen”.
^ Neʼe mak ai-horis neʼebé kuda iha tempu uluk kedas. Ema uza kabas husi duʼut neʼe atu halo hena-liñu.
^ Neʼe mak títulu ba liurai sira iha rai-Ejitu.
^ Ka “Menfis”.
^ Ka karik “ai-palmeira sanak no duʼut-kain”.
^ Neʼe refere ba língua Ebraiku.
^ Orj., “sei sai parte terseiru hamutuk ho”.
