Isaias 26:1-21
26 Iha loron neʼebá, ema sei kanta knananuk tuirmai neʼe+ iha rai-Judá:+
“Ami iha sidade neʼebé forte.+
Ninia salvasaun mak hanesan moru neʼebé proteje ami.+
2 Loke portaun sira+ atu nuneʼe nasaun neʼebé iha hahalok loos bele tama,Nasaun neʼebé hatudu hahalok laran-metin.
3 Ita-Boot sei proteje ema neʼebé sadere ba Ita ho laran tomak;*Ita sei fó dame nafatin ba sira,+Tanba sira tau fiar deʼit ba Ita.+
4 Tau fiar nafatin ba Jeová,+Tanba Jah* Jeová mak Fatuk Boot rohan-laek nian.+
5 Tanba nia hatún ona sira neʼebé hela iha fatin aas, iha sidade neʼebé aas.
Nia lori tun sidade neʼe,Nia lori tun sidade neʼe ba rai;Nia soe sidade neʼe tun ba rai-rahun.
6 Sira neʼebé hetan terus sei sama sidade neʼe,Ema kiʼik sira sei sama sidade neʼe ho sira-nia ain.”
7 Ema laran-loos nia dalan sira mak loos.*
Tanba Ita iha hahalok loos,Ita sei halo tetuk dalan ba ema laran-loos.
8 Oh Jeová, ami tau esperansa ba Ita,Nuʼudar ami laʼo iha Ita-nia dalan justisa nian.
Ami hafolin tebes Ita-nia naran no hein katak ema hanoin-hetan ida-neʼe.*
9 Bainhira kalan ona, haʼu hein Ita ho haʼu-nia laran tomak,Sin, iha haʼu-nia laran, haʼu buka namanas ba Ita;+Tanba bainhira Ita tesi-lia ba mundu,Ema neʼebé hela iha rai aprende kona-ba hahalok loos.+
10 Maski ema laran-aat simu laran-diʼak,Nia sei la aprende kona-ba hahalok loos.+
Maski nia hela iha rai ema laran-loos nian, maibé nia sei hatudu hahalok aat,+No nia sei la haree Jeová nia kmanek.+
11 Oh Jeová, Ita hiʼit ona Ita-nia liman, maibé sira la haree ida-neʼe.+
Sira sei haree Ita-nia laran-manas ba Ita-nia povu no sira sei hetan moe.
Sin, ahi husi Ita sei han mohu Ita-nia inimigu sira.
12 Oh Jeová, Ita sei fó ami dame,+Tanba Ita mak fó kbiit ba amiAtu halo buat hotu.
13 Oh Jeová, ami-nia Maromak, maski naʼi seluk mak ukun ona ami,+Maibé ami sei temi deʼit Ita-nia naran hodi fó hahiʼi.+
14 Sira mate ona; sira sei la moris.
Sira mate no la iha kbiit, sira sei la hadeer fali.+
Tanba Ita tau ona atensaun hodi halakon siraHodi nuneʼe ema sei la hanoin-hetan tan sira.
15 Oh Jeová, Ita aumenta ona povu iha nasaun neʼe,Ita halo nasaun neʼe sai boot;Ita fó ona glória ba Ita-nia an.+
Ita haluan fronteira sira hotu iha rai neʼe.+
16 Oh Jeová, sira buka Ita durante tempu susar;Sira hatoʼo sira-nia orasaun ho lian neineik bainhira Ita fó dixiplina ba sira.+
17 Hanesan feto isin-rua neʼebé besik ona atu tuur-ahiNia sente moras tuur-ahi nian no hakilar tanba moras,Nuneʼe mós ami sente moras tanba Ita, oh Jeová.
18 Ami sai isin-rua ona, ami sente ona moras tuur-ahi nian,Maibé ami tuur-ahi ba anin deʼit.
Ami la lori salvasaun ba rai neʼe,No la iha oan ida mak moris hodi hela iha rai neʼe.
19 “Imi-nia ema neʼebé mate sei moris fali.
Haʼu-nia povu nia mate-isin* sira sei moris fali.+
Oh imi neʼebé hela iha rai-rahun,+Hadeer bá no haklalak ho kontente!
Tanba imi-nia mahobeen mak hanesan mahobeen iha dadeer,No rai sei fó moris ba ema neʼebé mate ona no kbiit-laek.*
20 Oh haʼu-nia povu, bá, tama ba imi-nia kuartu laran,No taka odamatan sira.+
Subar imi-nia an ba tempu uitoanToʼo Maromak nia hirus liu tiha ona.+
21 Tanba Jeová sai daudaun husi ninia fatinAtu fó kastigu ba ema sira neʼebé hela iha rai neʼe tanba sira-nia sala,No rai neʼe sei hatudu sai raan neʼebé fakar ona iha ninia letenNo sei la taka tan ninia ema sira neʼebé mate.”
Nota-rodapé
^ Ka karik “ema neʼebé laran-metin”.
^ “Jah” mak naran badak ba Jeová.
^ Ka “tetuk”.
^ Neʼe katak ema hanoin-hetan no fó sai Maromak no ninia naran.
^ Orj., “Haʼu-nia mate-isin”.
^ Ka “tuur-ahi ba sira neʼebé kbiit-laek tanba mate”.
