Isaias 39:1-8
-
Babilónia haruka ema ba (1-8)
39 Iha tempu neʼebá, Baladan nia oan-mane Merodac-Baladan, neʼebé nuʼudar liurai Babilónia, haruka karta no prezente ba Liurai Ezequias,+ tanba nia rona katak uluk Ezequias moras maibé agora nia diʼak fali ona.+
2 Ezequias simu sira ho kontente no hatudu ba sira uma neʼebé nia tau ninia rikusoin,+ katak osan-mutin, osan-mean, mina-bálsamu no mina folin-boot seluk, ninia armas-fatin hotu no buat hotu neʼebé iha ninia osan-fatin. Ezequias hatudu ba sira buat hotu iha ninia palásiu no iha rai hotu neʼebé nia ukun.
3 Depois neʼe, profeta Isaias mai hasoru Liurai Ezequias no husu nia: “Mane sira-neʼe dehan saida? Sira mai husi neʼebé?” Ezequias hatán: “Sira mai husi fatin dook, husi rai-Babilónia.”+
4 Tuirmai Isaias husu: “Saida mak sira haree iha ó-nia palásiu?” Ezequias hatán: “Sira haree buat hotu iha haʼu-nia palásiu. Haʼu hatudu ba sira buat hotu iha haʼu-nia osan-fatin.”
5 Tuirmai Isaias hatete ba Ezequias: “Rona ba liafuan husi Jeová neʼebé ukun tropa lalehan nian:
6 ‘Tempu sei toʼo mai, no ema sei lori ba Babilónia buat hotu neʼebé iha ó-nia palásiu no buat hotu neʼebé ó-nia beiʼala sira rai hela toʼo ohin loron. Sira sei la husik hela buat ida’,+ Jeová mak dehan.+
7 ‘Sira sei lori ó-nia jerasaun balu ba Babilónia no sai ema-boot iha liurai Babilónia nia palásiu.’”+
8 Ho ida-neʼe, Ezequias hatete ba Isaias: “Jeová nia liafuan neʼebé Ita fó sai ona mak diʼak.” Nia hatutan tan: “Tanba sei iha dame no hakmatek* durante haʼu-nia moris.”+
Nota-rodapé
^ Ka “lia-loos”.
