Job 41:1-34
-
Maromak koʼalia kona-ba lafaek (1-34)
41 “Ó bele kail lafaek*+ hanesan kail ikan ka?Ó bele kesi metin ninia nanál ho tali ka?
2 Ó bele tuu tali ba ninia inus-kuak ka?Ó bele sona borus ninia hasan-ruin ho besi-kaʼit* ka?
3 Nia sei husu ó atu hatudu laran-sadiʼa ba nia ka?Nia sei koʼalia mamar ba ó ka?
4 Nia sei promete ba óHodi sai ó-nia atan durante ninia moris tomak ka?
5 Ó bele halimar ho nia hanesan halimar ho manu sira ka?Ó bele kesi nia ho tali hodi fó ba ó-nia oan-feto kiʼikoan sira atu halimar ho nia ka?
6 Negósiu-naʼin sira sei haksesuk malu kona-ba ninia folin ka?
Ema neʼebé fila liman sei koʼa ninia isin hodi fahe ba malu ka?
7 Ó bele sona nia kulit ho diman barak ka?+Ó bele sona nia ulun ho keur ka?
8 Tau toʼok ó-nia liman ba nia dala ida deʼit,Ó sei nunka haluha ida-neʼe no nunka halo fali!
9 Se ó mehi atu kaer nia, neʼe sei nunka akontese.
Maski ó haree deʼit mós sei halo ó taʼuk tebes toʼo monu* ba rai.
10 La iha ema ida mak brani atu book nia.
Tan neʼe, sé mak bele hamriik hasoru haʼu?+
11 Sé mak fó uluk buat ruma mai haʼu, hodi nuneʼe haʼu tenke selu ba nia?+
Buat hotu-hotu iha lalehan okos mak haʼu-nian.+
12 Haʼu sei koʼalia tan kona-ba lafaek nia ain sira,Kona-ba ninia forsa boot no isin-lolon neʼebé kria ona ho diʼak tebes.
13 Sé mak kolu ona ninia roupa?
Bainhira ninia ibun nakloke, sé mak brani atu tama ba laran?
14 Sé mak bele loke ninia hasan-ruin sira neʼebé boot?*
Ninia nehan sira neʼebé haleʼu ninia ibun halo ema taʼuk.
15 Ninia kotuk iha kikit sira neʼebé rabat malu metin,*Sira tutan malu ho loloos.
16 Kikit sira rabat malu metin loosToʼo anin mós labele tama.
17 Sira belit metin ba malu,Sira belit metin loos toʼo labele haketak.
18 Bainhira nia fani, naroman sai husi ninia inus,Ninia matan hanesan naroman iha dadeer.
19 Naroman hanesan rai-lakan sai husi ninia ibun,No ahi-funan mós haksoit sai husi ninia ibun.
20 Suar sai husi ninia inus,Hanesan ahi-matan neʼebé lakan hela.*
21 Nia huu iis,* halo ahi-klaak lakan,No ninia ibun tiru sai ahi.
22 Ninia kakorok iha forsa boot,Sira hotu neʼebé hasoru nia sai taʼuk tebes.
23 Ninia kulit belit metin ba malu,No toos hanesan besi neʼebé labele muda.
24 Ninia fuan toos hanesan fatuk,Sin, toos hanesan fatuk dulas trigu nian.
25 Bainhira nia hiʼit an saʼe, sira neʼebé forsa boot mós sai taʼuk,Bainhira nia book an bá-mai, neʼe halo sira bilán.
26 La iha surik ida mak bele manán nia,Nuneʼe mós ho diman, rama-oan ka rama ulun.+
27 Nia haree besi hanesan duʼut-maran deʼit,Riti hanesan ai lahuk deʼit.
28 Rama-oan ida labele halo nia halai,Fatuk sira neʼebé ema tuda ho tali-baku* mós sai hanesan duʼut-maran deʼit.
29 Nia haree ai-dona hanesan duʼut-maran deʼit,No nia hamnasa deʼit bainhira nia rona lian husi diman neʼebé ema doko hela.
30 Ninia kabun hanesan sanan-rai nia rohan neʼebé kroʼat,Nia latan an iha tahu laran hanesan ai-kabelak sama trigu nian.+
31 Nia halo tasi nakali hanesan bee iha sanan laran,Nia halo tasi nafurin hanesan mina iha sanan.
32 Fatin neʼebé nia nani liu ona sai nabilan.
Ema sei hanoin katak bee kleʼan mak hanesan fuuk mutin.
33 Iha rai tomak la iha buat ida mak hanesan ho nia,Maromak kria nia nuʼudar animál ida neʼebé la hatene taʼuk.
34 Nia fihir ba animál hotu neʼebé loko an.
Nia mak liurai ba animál siʼak hotu neʼebé forsa boot.”
Nota-rodapé
^ Orj., “ai-tarak”.
^ Ka “soe”.
^ Orj., “odamatan sira husi ninia oin”.
^ Ka karik “nia foti an tanba ninia kikit sira”.
^ Ka “ahi-matan neʼebé lakan makaʼas han duʼut sira”.
^ Ka “Ninia iis”. Haree “Nefes” iha Glosáriu.
