Job 5:1-27
5 “Favór ida, bolu bá! Sé mak sei hatán ba ó?
Anju santu ida-neʼebé mak ó sei bolu atu ajuda ó?
2 Tanba laran-hirus sei oho ema neʼebé beik,No laran-moras sei oho ema neʼebé la iha neon.
3 Haʼu haree ona ema beik nia moris sai diʼak,Maibé derrepente deʼit susar kona ninia hela-fatin.
4 Ninia oan-mane sira la hetan protesaun,No sira hetan terus iha sidade nia portaun,+ la iha ema ida mak salva sira.
5 Ai-han neʼebé nia koʼa, ema neʼebé hamlaha mak sei foti no han,Ema neʼe sei foti ninia ai-han husi ai-tarak sira-nia leet.No sira-nia rikusoin, ema seluk mak sei tolan.
6 Tanba buat sira neʼebé aat labele mosu deʼit husi rai-rahun,No susar labele mosu deʼit husi rai.
7 Ema moris mai sempre hetan susar,Hanesan ahi-funan sempre semo ba leten.
8 Maibé haʼu rasik sei husu Maromak,No haʼu sei entrega haʼu-nia kazu ba Maromak,
9 Ba Nia neʼebé halo buat kmanek boot oioin neʼebé ita ema la iha kbiit atu buka-hatene,Buat furak oioin neʼebé ita ema labele sura.
10 Nia fó udan ba raiNo fó bee ba rai.
11 Nia foti aas ema kiʼik,No foti saʼe ema laran-triste atu hetan salvasaun.
12 Nia estraga ema matenek nia planu aat sira,Hodi nuneʼe sira labele hetan susesu iha serbisu neʼebé sira halo ho sira-nia liman.
13 Nia halo ema matenek monu ba lasu neʼebé sira rasik tau,+Hodi nuneʼe nia bele estraga ema matenek sira-neʼe nia planu.
14 Nakukun mak taka sira maski rai sei loron hela,No sira lamas bá-mai iha meiudia hanesan iha kalan.
15 Nia salva ema husi ema aat nia nanál neʼebé hanesan surik,No salva ema kiak sira husi kbiit-naʼin nia liman,
16 Hodi nuneʼe ema kiʼik sira bele iha esperansa,Maibé ema aat sira-nia ibun taka metin tiha.
17 Ksolok ba ema neʼebé Maromak fó dixiplina,Tan neʼe, keta fila kotuk ba dixiplina husi Ida neʼebé Kbiit Boot Liu Hotu!
18 Tanba nia mak halo moras, maibé nia sei falun kanek neʼe,Nia mak harahun, maibé nia sei kura ho ninia liman rasik.
19 Nia sei salva ó husi susar neen neʼebé kona ó,Maski susar sira kona ó toʼo dala hitu mós nia sei salva ó.
20 Durante rai-hamlaha, nia sei salva* ó husi mate,No durante funu, nia sei salva ó husi surik nia kbiit.
21 Ó sei hetan protesaun husi nanál neʼebé hanesan xikote.+No ó sei la taʼuk se ema ataka ó atu hadau ó-nia sasán.
22 Ó sei la hanoin barak kona-ba hamlaha no perigu,No ó sei la taʼuk ba animál fuik sira.
23 Tanba fatuk sira iha rai-luan sei la hakanek ó,*No animál fuik sira iha rai-luan sei moris ho dame hamutuk ho ó.
24 Ó sei hatene katak ó-nia tenda mak seguru,*No bainhira ó bá haree ó-nia animál-hakiak iha ó-nia rai, la iha ida mak lakon.
25 Ó sei haksolok tanba ó iha oan barak,No ó-nia bei-oan sira sei sai barak hanesan ai-horis sira iha rai.
26 Ó-nia isin sei forte nafatin toʼo ó tama ba rate,Hanesan trigu-kain neʼebé ema koʼa iha ninia tempu.
27 Ami buka-hatene ona, no buat sira-neʼe loos duni.
Rona no simu bá.”
