Jonas 4:1-11
4 Maibé Jonas la kontente duni kona-ba neʼe no sai hirus makaʼas.
2 Entaun nia halo orasaun ba Jeová, hodi dehan: “Aii Jeová, uluk bainhira haʼu sei iha haʼu-nia rai, haʼu hatene ona ida-neʼe sei akontese. Tan neʼe mak haʼu koko halai ba Tarsis,+ tanba haʼu hatene ona katak Ita mak Maromak neʼebé laran-diʼak no laran-sadiʼa, la hirus lalais, nakonu ho domin neʼebé laran-metin,+ no lakohi fó susar.*
3 Agora oh Jeová, favór ida, hasai tiha haʼu-nia moris, tanba diʼak liu haʼu mate deʼit duké moris.”+
4 Jeová husu: “Ó iha direitu atu sai hirus makaʼas ka?”
5 Tuirmai Jonas sai ba sidade nia liʼur no tuur iha parte leste husi sidade neʼe. Nia halo barraka ida ba nia an no tuur iha ninia mahon atu bele haree saida mak sei akontese ba sidade neʼe.+
6 Maromak Jeová halo lakeru-hun ida buras, hodi fó mahon ba Jonas no halo nia sente kmaan. No Jonas sente kontente tebes ho lakeru-hun neʼe.
7 Maibé iha loron tuirmai bainhira rai naroman, Maromak loos haruka ular, no ular neʼe estraga lakeru-hun neʼe toʼo sai namlaek.
8 Bainhira loro-matan saʼe ona hodi fó naroman, Maromak mós haruka anin manas husi parte leste, no loro-matan kona makaʼas Jonas nia ulun toʼo nia besik atu dezmaia. Entaun nia kontinua husu atu mate deʼit, no nia dehan beibeik: “Diʼak liu haʼu mate deʼit duké moris.”+
9 Maromak husu ba Jonas: “Ó iha direitu atu sai hirus makaʼas kona-ba lakeru-hun neʼe ka?”+
Jonas hatán: “Sin, haʼu iha direitu atu sai hirus, haʼu hirus toʼo hakarak atu mate deʼit.”
10 Maibé Jeová dehan: “Ó hanoin ba lakeru-hun neʼe, maski ó la kuda ka halo moris. Lakeru-hun neʼe moris iha kalan ida deʼit no mate iha kalan ida deʼit.
11 Sá tan sidade boot+ Nínive neʼebé iha ema naʼin-120.000 resin neʼebé la hatene saida mak loos no saida mak sala,* hamutuk ho sira-nia animál neʼebé barak. Haʼu labele hanoin sira ka?”+
Nota-rodapé
^ Ka “no sente triste kona-ba fó susar”.
^ Ka “la hatene sira-nia liman-loos husi sira-nia liman-karuk”.
