Koloso 2:1-23
2 Haʼu hakarak imi hatene katak haʼu hakaʼas an makaʼas atu ajuda imi no sira neʼebé iha Laodiseia+ no mós ajuda sira hotu neʼebé seidauk haree haʼu.*
2 Haʼu halo nuneʼe atu sira-nia laran bele hetan kmaan+ no sira bele sai ida deʼit iha domin,+ no atu sira bele hetan rikusoin* hotu liuhusi komprende ho didiʼak no hetan koñesimentu neʼebé loos kona-ba Maromak nia segredu santu, neʼe katak Kristu.+
3 Matenek no koñesimentu nia rikusoin hotu subar didiʼak ona iha nia.+
4 Haʼu koʼalia ida-neʼe atu ema labele lohi imi ho liafuan midar oioin.
5 Maski haʼu la iha neʼebá hamutuk ho imi, maibé haʼu-nia laran* hamutuk ho imi, haʼu haksolok atu haree oinsá imi halo buat hotu ho didiʼak+ no imi-nia fiar metin ba Kristu.+
6 Tan neʼe, hanesan imi simu ona Naʼi Kristu Jesus, kontinua laʼo hamutuk ho nia bá.
7 Hanesan imi aprende ona, imi-nia fiar iha Kristu tenke metin hanesan ai-abut neʼebé tama kleʼan ba rai, no harii iha nia,+ no sai metin.+ No mós, imi tenke fó agradese beibeik.+
8 Kuidadu bá atu ema ida la kaer imi hanesan dadur* liuhusi filozofia no hanorin bosok neʼebé la iha folin,+ neʼebé tuir deʼit ema nia lisan no tuir mundu nia hanoin, laʼós tuir Kristu,
9 tanba Maromak nia hahalok hotu kompletu iha nia.*+
10 Nuneʼe imi sai kompletu ona liuhusi nia neʼebé ulun ba governu hotu no autoridade hotu.+
11 Liuhusi imi-nia relasaun ho nia, imi mós hetan ona sirkunsizaun,* laʼós ho ema nia liman maibé hodi hasai hahalok sala husi isin,+ tanba neʼe mak dalan neʼebé Kristu nia atan sira hetan sirkunsizaun.+
12 Tanba imi hetan batizmu* iha nia, imi hakoi tiha ona hamutuk ho nia,+ no liuhusi imi-nia relasaun ho nia mak imi mós moris fali+ hamutuk ho nia tanba imi-nia fiar ba Maromak nia kbiit. Maromak mak halo nia moris hiʼas husi mate.+
13 Liután neʼe, maski imi mate ona iha imi-nia sala sira no imi mós la hetan sirkunsizaun iha imi-nia isin, maibé Maromak fó ona moris ba imi hamutuk ho nia.+ Ho laran-diʼak, nia fó perdua ona ba ita-nia sala hotu+
14 no nia hamoos tiha dokumentu+ neʼebé kontra ita,+ neʼebé iha ukun-fuan barak.+ Nia hasai tiha ida-neʼe hodi prega iha ai-riin terus nian.*+
15 Nia manán tiha governu sira no sira neʼebé iha podér, no lori sira nuʼudar dadur, nia hamoe sira iha ema barak nia oin hodi hatudu sai katak nia manán sira+ liuhusi ai-riin terus nian.*
16 Tan neʼe, keta husik ema ida tesi-lia ba imi kona-ba buat neʼebé imi han no hemu+ ka kona-ba selebra festa ruma ka fulan-foun+ ka loron Sábadu.*+
17 Buat sira-neʼe mak nuʼudar lalatak husi buat sira neʼebé atu mai,+ maibé buat neʼebé realidade mak Kristu.+
18 Ema balu hatudu haraik an ho finje deʼit no adora anju sira, entaun keta husik ema sira-neʼe hanetik imi atu hetan imi-nia kolen.+ Sira apoia buat neʼebé sira haree. Tuir loloos sira sai foti an maski la ho razaun tanba sira hanoin tuir deʼit isin.
19 Ema hanesan neʼe la kaer metin ba ulun,+ ba ida neʼebé fó buat neʼebé isin tomak presiza, no halo parte ida-idak tutan hamutuk, no liuhusi nia mak Maromak halo isin-lolon tomak sai boot ba daudaun.+
20 Se imi la simu hanoin mundu nian no mate ona ho Kristu, tanbasá mak imi kontinua moris hanesan imi parte ba mundu neʼe?+ Tanbasá mak imi halo tuir ukun-fuan sira neʼebé dehan:+
21 “Keta kaer, keta han, keta kona”?
22 Neʼe refere ba buat hotu neʼebé lakon tiha bainhira ita uza ona, hodi tuir ema nia lei no hanorin.+
23 Maski ukun-fuan sira-neʼe haree hanesan matenek, maibé neʼe la ajuda ema atu luta hasoru hakarak isin nian,+ no sira halo tuir ukun-fuan sira-neʼe tanba sira hakarak hili rasik dalan atu halaʼo adorasaun. Sira fó-terus ba sira-nia isin rasik tanba sira hakarak ema hanoin katak sira haraik an.
Nota-rodapé
^ Orj., “haree haʼu-nia oin”.
^ Ka “rikusoin espirituál”.
^ Orj., “espíritu”. Haree “Pneuma” iha Glosáriu.
^ Ka “la lori imi bá nuʼudar ninia vítima”.
^ Orj., “hahalok hotu hela iha ninia isin”.
^ Ka karik “liuhusi nia”.
