Koloso 3:1-25
3 Maibé se Maromak halo imi moris fali ona hamutuk ho Kristu,+ entaun kontinua buka buat leten nian, iha neʼebá mak Kristu tuur iha Maromak nia liman sorin loos.+
2 Kontinua hanoin deʼit kona-ba buat leten nian,+ laʼós kona-ba buat neʼebé iha rai.+
3 Tanba imi mate ona, no imi-nia moris subar ona hamutuk ho Kristu hodi tuir Maromak nia hakarak.
4 Kuandu Kristu, neʼebé lori moris ba ita,+ hatudu sai ninia kbiit, iha tempu neʼebá mós Maromak sei hatudu sai katak imi hamutuk ho nia no imi sei halo parte iha ninia glória.+
5 Tan neʼe, hamate hakarak isin nian*+ neʼebé book imi atu halo sala seksuál,* hahalok la moos, hakarak seksuál neʼebé labele kontrola,+ hakarak aat, no kaan-teen, neʼebé hanesan adora estátua.*
6 Maromak nia hirus sei tun ba ema sira neʼebé halo buat sira-neʼe.
7 Uluk imi mós iha toman atu halo buat sira-neʼe.*+
8 Maibé agora imi tenke soe tiha buat sira-neʼe hotu, katak laran-nakali, hirus, hahalok aat,+ koʼalia aat,+ no keta husik liafuan foʼer+ ida sai husi imi-nia ibun.
9 Keta bosok malu.+ Hasai tiha hahalok* tuan nian+ no husik tiha buat sira neʼebé uluk imi halo,
10 no tau fali hahalok foun nuʼudar imi-nia roupa;+ Maromak fó hahalok foun neʼebé nia kria tuir ninia ilas, hahalok neʼe sai foun ba beibeik liuhusi koñesimentu neʼebé loos.+
11 Ho hahalok foun neʼe, ema Gregu ka ema Judeu, ema neʼebé hetan sirkunsizaun* ka la hetan sirkunsizaun, ema estranjeiru ka ema Sita,* atan ka ema livre, sira hotu hanesan deʼit, maibé Kristu mak buat hotu no ita hotu ida deʼit ho nia.+
12 Tan neʼe, nuʼudar ema neʼebé Maromak hili ona,+ santu no Maromak hadomi, tau hahalok domin ho laran-sadiʼa,+ laran-diʼak, haraik an,+ laran-maus,+ no pasiénsia+ nuʼudar imi-nia roupa.
13 Kontinua hatudu pasiénsia ba malu no prontu atu fó perdua ba malu ho laran tomak+ maski ema halo buat ruma neʼebé hakanek imi-nia laran.+ Hanesan Jeová* prontu atu fó perdua ba imi ho laran tomak, imi mós tenke halo nuneʼe.+
14 Maibé, liu fali buat sira-neʼe hotu, tau domin nuʼudar imi-nia roupa,+ tanba domin mak kesi ita hamutuk iha dalan neʼebé perfeitu.+
15 No mós, husik Kristu nia dame ukun* imi-nia laran,+ tanba Maromak bolu ona imi ba dame neʼe hodi sai isin ida. No sempre hatudu agradese bá.
16 Husik Kristu nia liafuan hela iha imi no halo imi nakonu ho matenek. Kontinua hanorin no fó aten-brani* ba malu ho salmo+ no hahiʼi ba Maromak, no kanta knananuk adorasaun nian ho agradese, kanta ba Jeová* iha imi-nia laran.+
17 Buat naran deʼit neʼebé imi koʼalia no halo, halo buat hotu iha Naʼi Jesus nia naran. Fó obrigadu ba Aman Maromak liuhusi nia.+
18 Imi feen sira, hakruʼuk ba imi-nia laʼen,+ tanba neʼe mak buat neʼebé diʼak tuir Naʼi nia haree.
19 Imi laʼen sira, kontinua hadomi imi-nia feen+ no keta sai hirus makaʼas ba sira.+
20 Imi oan sira, halo tuir imi-nia inan-aman iha buat hotu,+ tanba ida-neʼe halo Naʼi kontente tebes.
21 Imi aman sira, keta halo imi-nia oan sai laran-hirus,*+ atu nuneʼe sira la sai laran-triste.
22 Imi atan sira, halo tuir imi-nia patraun iha rai iha buat hotu,+ laʼós deʼit kuandu sira haree imi, hodi halo kontente ema, maibé ho laran-moos no hamtaʼuk Jeová.*
23 Buat naran deʼit neʼebé imi halo, halo ida-neʼe ho laran tomak hanesan imi halo ba Jeová,*+ laʼós ba ema,
24 tanba imi hatene katak imi sei simu liman-rohan nuʼudar imi-nia kolen husi Jeová.*+ Sai atan ba imi-nia Naʼi, neʼe katak Kristu.
25 Tuir loloos, ema neʼebé halo sala sei simu kolen tuir sala neʼebé nia halo,+ no Maromak la todan ba sorin.+
Nota-rodapé
^ Orj., “imi-nia parte isin nian iha rai”.
^ Ka “imi mós laʼo hodi moris hanesan neʼe”.
^ Orj., “ema”.
^ “Ema Sita” fó ideia katak ema fuik.
^ Ka “kontrola”.
^ Ka “fó konsellu”.
^ Ka “keta provoka imi-nia oan”.
