Koloso 4:1-18
4 Imi patraun sira, imi tenke hatudu hahalok loos no la todan ba sorin ba imi-nia atan sira, tanba imi hatene katak imi mós iha Naʼi ida iha lalehan.+
2 Keta kole atu halo orasaun.+ Kontinua matan-moris hodi halo orasaun no fó agradese.+
3 Iha tempu hanesan, harohan kona-ba ami,+ atu nuneʼe Maromak bele loke odamatan ba ami atu haklaken ninia liafuan, hodi fó sai segredu santu kona-ba Kristu, tanba segredu santu neʼe mak haʼu tama komarka,+
4 no harohan bá atu haʼu bele koʼalia ho klaru kona-ba neʼe tuir dalan neʼebé haʼu tenke koʼalia.
5 Kontinua halaʼo moris ho matenek kuandu imi hamutuk ho ema neʼebé laʼós parte ba kongregasaun, hodi uza didiʼak imi-nia tempu.*+
6 Sempre koʼalia ho laran-diʼak hodi tau masin uitoan,+ atu nuneʼe imi bele hatene oinsá imi tenke hatán ba ema ida-idak.+
7 Tíkiko+ mak haʼu-nia maluk doben no serbisu-naʼin neʼebé laran-metin no maluk atan iha Naʼi, nia sei fó-hatene buat hotu ba imi kona-ba haʼu.
8 Haʼu haruka nia ba imi, atu nuneʼe imi bele hatene ami-nia situasaun, no nia bele fó kmaan ba imi-nia laran.
9 Nia mós bá hamutuk ho Onésimo+ neʼebé uluk mai husi imi-nia leet. Nia mak haʼu-nia maluk neʼebé fiar metin no haʼu hadomi. Sira naʼin-rua sei fó-hatene imi kona-ba buat hotu neʼebé akontese iha neʼe.
10 Haʼu-nia maluk dadur Aristarco+ haruka ninia kumprimentus ba imi, nuneʼe mós ho Barnabé nia primu Marcos,+ kona-ba Marcos neʼe mak ami fó lia-menon atu imi simu nia ho liman rua+ se nia bá vizita imi,
11 no Jesus neʼebé mós ema bolu Justo haruka ninia kumprimentus ba imi. Ema sira-neʼe husi grupu neʼebé hetan ona sirkunsizaun.* Sira deʼit mak haʼu-nia maluk serbisu-naʼin ba Maromak nia Ukun,* no sira sai ona ajuda-naʼin neʼebé fó kmaan duni mai* haʼu.
12 Kristu Jesus nia atan Epafras,+ neʼebé uluk mai husi imi-nia leet, haruka ninia kumprimentus ba imi. Nia sempre hakaʼas an atu halo orasaun ho laran kona-ba imi, atu nuneʼe ikusmai imi bele sai kompletu hodi hamriik metin no fiar metin ba Maromak nia hakarak hotu.
13 Tanba haʼu sai nuʼudar sasin katak nia hakaʼas an makaʼas ba imi-nia diʼak no mós ba sira neʼebé iha Laodiseia no Hierápolis.
14 Doutór Lucas,+ neʼebé ema barak hadomi, haruka ninia kumprimentus ba imi, nuneʼe mós ho Demas.+
15 Fó haʼu-nia kumprimentus ba maun-alin sira iha Laodiseia no ba ita-nia feton Ninfa no mós ba kongregasaun neʼebé iha ninia uma.+
16 No kuandu imi lee tiha ona karta neʼe, haruka ida-neʼe ba kongregasaun iha Laodiseia atu sira bele lee, no imi mós lee+ fali karta neʼebé haʼu haruka ba Laodiseia.
17 No mós, fó-hatene Arkipo,+ hodi dehan: “Tau atensaun ba knaar neʼebé ó simu ona husi Naʼi atu ó bele kumpre knaar neʼe.”
18 Haʼu Paulo mak hakerek kumprimentus neʼe ho haʼu-nia liman rasik.+ Kontinua hanoin haʼu-nia situasaun nuʼudar dadur.+ Maromak nia laran-diʼak neʼebé boot hamutuk ho imi.
