Roma 15:1-33
15 Maibé ita neʼebé metin iha fiar tenke ajuda sira neʼebé kbiit-laek atu tahan buat neʼebé todan liu ba sira atu lori,+ no la buka atu fó ksolok ba ita-nia an rasik.+
2 Mai ita ida-idak buka atu fó ksolok ba ita-nia maluk tanba ninia diʼak, atu hametin nia.+
3 Tanba Kristu rasik mós la buka atu fó ksolok ba ninia an,+ maibé hanesan hakerek nanis ona: “Buat neʼebé ema halo atu hamoe Ita monu ona ba haʼu-nia leten.”+
4 Tanba buat hotu neʼebé hakerek ona horiuluk kedas, hakerek hodi hanorin ita.+ Neʼe fó ita esperansa+ tanba Eskritura sira-neʼe ajuda ita atu tahan+ no fó kmaan mai ita.
5 Maromak mak fó kmaan mai ita no hametin ita atu tahan, no haʼu harohan katak nia sei ajuda imi hotu atu iha hanoin hanesan Kristu Jesus nian,
6 atu nuneʼe ho hanoin ida deʼit*+ no ho lian* ida deʼit imi sei fó glória ba ita-nia Naʼi Jesus Kristu nia Maromak no Aman.
7 Tan neʼe simu malu bá,+ hanesan Kristu mós simu imi,+ atu nuneʼe Maromak bele simu glória.
8 Tanba haʼu fó-hatene ba imi katak Kristu sai nuʼudar atan ba sira neʼebé hetan ona sirkunsizaun.*+ Ida-neʼe atu hatudu ba sira katak Maromak sempre koʼalia loos no katak Maromak nia promesa ba sira-nia beiʼala mak loos,+
9 no atu nasaun sira seluk bele fó glória ba Maromak tanba ninia laran-sadiʼa.+ Hanesan hakerek nanis ona: “Tan neʼe mak haʼu hahiʼi Ita iha ema nia oin iha nasaun sira-nia leet no haʼu sei kanta knananuk hahiʼi nian ba Ita-nia naran.”+
10 No nia dehan tan: “Imi nasaun sira, haksolok bá hamutuk ho ninia povu.”+
11 Dala ida tan: “Oh imi nasaun hotu, hahiʼi Jeová,* no povu hotu hahiʼi nia bá.”+
12 Dala ida tan Isaias dehan: “Jessé nia abut+ sei mosu mai, no nia sei ukun nasaun sira;+ nasaun sira sei tau sira-nia esperansa ba nia.”+
13 Haʼu harohan katak Maromak neʼebé fó esperansa sei halo imi nakonu ho ksolok hotu no dame liuhusi imi-nia fiar ba nia, atu nuneʼe imi bele sai nakonu* ho esperansa liuhusi espíritu santu nia kbiit.+
14 Agora haʼu-nia maun-alin sira, haʼu rasik fiar katak imi nakonu ona ho hahalok diʼak, nakonu ona ho koñesimentu, no mós katak imi bele hanorin* malu.
15 Maibé haʼu hakerek ona ba imi hodi fó sai momoos buat balu, atu fó-hanoin fali ba imi. Haʼu halo nuneʼe tanba Maromak nia laran-diʼak boot neʼebé nia hatudu ona mai haʼu.
16 Tanba nia hili haʼu atu sai nuʼudar atan ba Kristu Jesus atu haklaken liafuan diʼak husi Maromak+ ba ema iha nasaun seluk.+ Haʼu halo knaar santu neʼe atu nuneʼe Maromak bele simu sira nuʼudar sakrifísiu neʼebé halo santu ona liuhusi espíritu santu.
17 Entaun, haʼu iha razaun atu haksolok, tanba haʼu mak Kristu Jesus nia dixípulu no haʼu halo Maromak nia serbisu.
18 Tanba haʼu sei la koʼalia tan kona-ba buat neʼebé haʼu halo, só koʼalia deʼit kona-ba serbisu neʼebé Kristu halo ona liuhusi haʼu, atu nuneʼe ema husi nasaun seluk bele halo tuir Kristu. Nia halo ida-neʼe liuhusi haʼu-nia liafuan no hahalok,
19 no mós liuhusi sinál no milagre sira,+ no liuhusi kbiit husi Maromak nia espíritu. Tan neʼe, husi Jeruzalein toʼo Ilíriko haʼu haklaken ona ho didiʼak liafuan diʼak kona-ba Kristu.+
20 Iha dalan neʼe mak haʼu hakaʼas an atu la haklaken liafuan diʼak iha fatin neʼebé ema rona ona Kristu nia naran, atu nuneʼe haʼu la halo serbisu neʼebé ema seluk komesa ona.*
21 Neʼe hanesan hakerek nanis ona: “Sira neʼebé ema seidauk fó-hatene kona-ba nia sei haree, no sira neʼebé seidauk rona kona-ba nia sei komprende.”+
22 Tan razaun neʼe mak haʼu la konsege atu bá vizita imi.
23 Maibé agora haʼu haklaken tiha ona iha fatin hotu iha área sira-neʼe, no ba tinan barak* ona haʼu hakarak tebes atu bá vizita imi.
24 Tan neʼe, bainhira haʼu bá España, haʼu hein katak haʼu bele haree imi, no bainhira haʼu haksolok tiha hamutuk ho imi, imi bele lori haʼu toʼo dalan klaran.
25 Maibé agora haʼu atu bá Jeruzalein hodi serbí ema santu* sira.+
26 Tanba sira neʼebé iha Masedónia no Akaia ho laran-haksolok fó kontribuisaun atu fahe ba ema santu sira neʼebé kiak iha Jeruzalein.+
27 Loos duni, sira halo ida-neʼe ho laran-haksolok, no tuir loloos sira iha tusan ba santu sira-neʼe, tanba ema husi nasaun seluk hola parte ona ho santu sira-neʼe kona-ba buat neʼebé husi Maromak, entaun sira-nia tusan mak serbí santu sira-neʼe ho sira-nia sasán.+
28 Entaun, bainhira haʼu halo hotu tiha serbisu neʼe no entrega ona kontribuisaun neʼe ba santu sira, haʼu sei husik hela sira no haʼu sei vizita imi kuandu haʼu atu bá España.
29 Liután neʼe, haʼu hatene katak kuandu haʼu vizita imi, haʼu sei lori bensaun barak husi Kristu.
30 Agora, maun-alin sira, liuhusi ita-nia Naʼi Jesus Kristu no liuhusi domin neʼebé mai husi espíritu, haʼu husu imi ho laran atu hakaʼas an hamutuk ho haʼu atu halo orasaun ba Maromak kona-ba haʼu,+
31 atu nuneʼe iha Judeia haʼu labele monu+ ba ema fiar-laek sira-nia liman no ema santu sira iha Jeruzalein bele simu haʼu-nia ajuda ho laran.+
32 Atu nuneʼe, se Maromak hakarak, haʼu sei bá vizita imi ho ksolok no hetan kmaan hamutuk ho imi.
33 Haʼu harohan katak Maromak neʼebé fó dame sei hamutuk ho imi hotu.+ Amen.
Nota-rodapé
^ Orj., “ibun”.
^ Ka “ho unidade”.
^ Ka “nakonu toʼo resin”.
^ Ka “fó konsellu ba”.
^ Orj., “la harii iha ema seluk nia fundasaun”.
^ Ka karik “balu”.
^ Haree “Ema santu” iha Glosáriu.
