Roma 16:1-27
16 Haʼu fó koñese ita-nia feton Febe ba imi. Nia serbí iha kongregasaun* iha Senkreia.+
2 Favór ida, simu nia bá iha Naʼi no iha dalan neʼebé merese ba ema santu* sira, no fó ajuda naran deʼit neʼebé nia presiza,+ tanba nia mós defende ona maun-alin barak, inklui mós haʼu rasik.
3 Fó haʼu-nia kumprimentus ba Prisca* no Áquila,+ haʼu-nia maluk serbisu-naʼin iha Kristu Jesus.
4 Sira tau sira-nia moris* iha perigu laran tanba haʼu.*+ Tuir loloos, haʼu no mós kongregasaun hotu husi nasaun seluk fó obrigadu ba sira.
5 Fó kumprimentus mós ba kongregasaun neʼebé iha sira-nia uma.+ Fó kumprimentus ba Epéneto neʼebé haʼu hadomi, nia mak Kristu nia dixípulu primeiru* iha área Ázia nian.
6 Kumprimentus ba Maria neʼebé halo serbisu makaʼas ba imi.
7 Kumprimentus ba Andróniko no Junias, haʼu-nia família sira.+ Sira mak haʼu-nia maluk dadur-naʼin, neʼebé apóstolu sira hatene didiʼak no sira sai ona Kristu nia dixípulu kleur liu fali haʼu.
8 Fó haʼu-nia kumprimentus ba Ampliato, ida neʼebé haʼu hadomi iha Naʼi.
9 Kumprimentus ba Urbano ita-nia maluk serbisu-naʼin iha Kristu, no ba Estáquis neʼebé haʼu hadomi.
10 Kumprimentus ba Apeles, neʼebé laran-metin iha Kristu. Kumprimentus ba sira neʼebé husi Aristóbulo nia umakain.
11 Kumprimentus ba haʼu-nia família Herodião. Kumprimentus ba sira neʼebé husi Narciso nia umakain neʼebé Naʼi nia dixípulu.
12 Kumprimentus ba Trifena no Trifosa, feto sira-neʼe halo serbisu makaʼas iha Naʼi. Kumprimentus ba Pérside neʼebé ita hadomi, tanba feto neʼe halo serbisu makaʼas iha Naʼi.
13 Kumprimentus ba Rufo neʼebé Naʼi hili, no mós kumprimentus ba ninia inan neʼebé haʼu mós haree nuʼudar inan.
14 Kumprimentus ba Asínkrito, Flegonte, Hermes, Pátrobas, Hermas, no mós maun-alin sira neʼebé hamutuk ho sira.
15 Kumprimentus ba Filólogo no Júlia, Nereu no ninia feton, no Olimpas, no mós ema santu hotu neʼebé hamutuk ho sira.
16 Kumprimenta malu bá ho reʼi* nuʼudar maun-alin. Kristu nia kongregasaun hotu fó kumprimentus ba imi.
17 Agora haʼu husu ba imi maun-alin sira, kuidadu bá ho sira neʼebé halo ema haketak malu no halo ema sidi, tanba sira kontra hanorin neʼebé imi aprende ona. Imi tenke hadook an husi sira.+
18 Tanba ema sira hanesan neʼe laʼós atan ba ita-nia Naʼi Kristu, maibé atan ba sira-nia hakarak rasik,* no liuhusi liafuan midar no liafuan gaba nian mak sira lohi ema neʼebé la hatene buat aat.
19 Ema hotu haree ona imi-nia laran-metin, tan neʼe haʼu sente haksolok kona-ba imi. Maibé haʼu hakarak imi atu sai matenek kona-ba buat neʼebé diʼak, no la hatene kona-ba buat neʼebé aat.+
20 Lakleur tan, Maromak neʼebé fó dame sei harahun Satanás+ iha imi-nia ain okos. Haʼu harohan katak ita-nia Naʼi Jesus nia laran-diʼak neʼebé boot hela ho imi.
21 Haʼu-nia maluk serbisu-naʼin Timóteo fó kumprimentus ba imi, nuneʼe mós ho Lúcio, Jason no Sosípatro, haʼu-nia família sira.+
22 Haʼu, Tércio, fó kumprimentus ba imi iha Naʼi. Haʼu mak hakerek karta neʼe no Paulo fó sai liafuan sira-neʼe ba haʼu.
23 Haʼu-nia uma-naʼin Gaio+ no kongregasaun hotu kumprimenta imi. Erasto neʼebé tau matan ba sidade nia osan* no mós ninia alin* Quarto fó kumprimentus ba imi.
24 *——
25 Maromak bele hametin imi hodi tuir liafuan diʼak neʼebé haʼu fó sai, no mós mensajen kona-ba Jesus Kristu. Liafuan diʼak neʼe liga ho segredu santu+ neʼebé Maromak hatudu sai ona. Segredu neʼe subar hela ba tempu kleur
26 maibé agora segredu neʼe hatudu sai ona ba ema. Liuhusi profeta nia liafuan iha Eskritura, nasaun hotu aprende kona-ba segredu neʼe. Ida-neʼe tuir mandamentu husi Maromak neʼebé moris ba nafatin. Nia hakarak nasaun hotu atu fiar ba nia no halo tuir nia.
27 Maromak mesak deʼit mak matenek,+ nia merese simu glória ba nafatin liuhusi Jesus Kristu. Amen.
Nota-rodapé
^ Haree “Ema santu” iha Glosáriu.
^ Ninia naran seluk mak Priscila.
^ Orj., “kakorok”.
^ Haree “Psiké” iha Glosáriu.
^ Orj., “ai-fuan primeiru”.
^ Orj., “reʼi santu”. Iha tempu uluk, ema Kristaun kumprimenta malu ho reʼi bainhira sira hasoru malu.
^ Ka “kabun rasik”.
^ Ka “neʼebé tezoureiru ba sidade”.
^ Lian Gregu la esplika sé mak maun ka alin.
