Salmo 17:1-15
David nia orasaun.
17 Oh Jeová, rona haʼu-nia harohan atu husu justisa;See tilun didiʼak ba haʼu-nia halerik atu husu ajuda;Rona haʼu-nia orasaun neʼebé haʼu hatoʼo ho laran-moos.+
2 Favór ida, foti desizaun neʼebé loos hodi defende haʼu;+Haʼu husu katak Ita-nia matan hateke deʼit ba buat neʼebé loos.
3 Ita haree didiʼak ona haʼu-nia laran, Ita buka-hatene ona kona-ba haʼu durante kalan;+Ita hamoos* ona haʼu;+Ita sei haree katak haʼu la halo planu aat ida,No haʼu-nia ibun la koʼalia buat neʼebé aat.
4 Maski ema halo buat naran deʼit,Maibé haʼu hasees an husi naʼok-teen nia dalan sira, hodi tuir liafuan husi Ita-nia ibun.+
5 Husik haʼu laʼo nafatin iha Ita-nia dalan siraAtu nuneʼe haʼu-nia ain labele sidi.+
6 Oh Maromak, haʼu bolu Ita, tanba Ita sei hatán haʼu.+
See tilun* mai haʼu. Rona haʼu-nia liafuan sira.+
7 Halo hahalok kmanek sira hodi hatudu Ita-nia domin neʼebé laran-metin,+Ita mak Salvadór ba sira neʼebé buka protesaun iha Ita-nia liman-loos,Ita salva sira husi ema neʼebé kontra hasoru Ita.
8 Proteje haʼu hanesan proteje Ita-nia matan-fuan;+Subar haʼu iha Ita-nia liras okos.*+
9 Proteje haʼu husi ema aat sira neʼebé ataka haʼu,Husi haʼu-nia inimigu sira neʼebé haleʼu haʼu no hakarak oho haʼu.+
10 Sira la hanoin ema iha sira-nia laran;*Sira-nia ibun koʼalia ho foti an;
11 Agora sira hobur ami;+Sira hein ba oportunidade atu halakon ami.*
12 Sira ida-idak mak hanesan leaun neʼebé hakarak tebes atu lees ninia vítima ba pedasuk,Hanesan leaun neʼebé prontu ona atu ataka.
13 Oh Jeová, hamriik bá, ataka no halakon tiha inimigu sira-neʼe;+Salva haʼu husi ema aat ho Ita-nia surik;
14 Oh Jeová, salva haʼu ho Ita-nia liman,Salva haʼu husi ema iha mundu neʼe,* husi sira neʼebé hanoin deʼit kona-ba moris neʼe,+Sira neʼebé Ita halo nakonu ho buat diʼak oioin neʼebé Ita fó+No sira neʼebé husik hela liman-rohan ba sira-nia oan-mane neʼebé barak.
15 Maibé kona-ba haʼu, ho hahalok loos mak haʼu sei haree Ita-nia oin;Bainhira haʼu hadeer no haree Ita,* haʼu sente kontente.+
Nota-rodapé
^ Liafuan Ebraiku neʼe refere ba prosesu halo nabeen besi hodi bele sai moos.
^ Ka “Hakruʼuk no rona”.
^ Ka “iha Ita-nia liras nia mahon”.
^ Ka “Sira-nia bokur falun metin sira”.
^ Ka “atu riba ami ba rai”.
^ Ka “iha sistema neʼe”.
^ Ka “haree Ita-nia ilas”.
