Salmo 50:1-23
Asaf+ nia knananuk.
50 Jeová, Maromak neʼebé aas liu maromak sira seluk,+ koʼalia ona;Nia bolu rai tomakHusi parte leste toʼo parte oeste.*
2 Maromak nia naroman nabilan sai husi Siaun neʼebé furak tebes.+
3 Ita-nia Maromak sei mai no nia sei la nonook deʼit.+
Iha ninia oin iha ahi neʼebé lakan boot,+No anin-fuik neʼebé makaʼas mak haleʼu nia.+
4 Nia bolu lalehan no bolu rai,+Atu tesi-lia ba ninia povu:+
5 “Halibur iha haʼu-nia oin, haʼu-nia povu neʼebé laran-metin,Sira neʼebé halo aliansa ho haʼu liuhusi sakrifísiu.”+
6 Lalehan fó sai ninia hahalok loos,Tanba Maromak rasik mak Juís.+ (Sela)
7 “Rona bá, oh haʼu-nia povu, no haʼu sei koʼalia;Oh Izraél, haʼu sei fó sasin kontra ó.+
Haʼu mak Maromak, ó-nia Maromak.+
8 Haʼu korrije ó laʼós tanba ó-nia sakrifísiu,No laʼós tanba ó-nia sakrifísiu sunu nian neʼebé ó sempre hasaʼe tomak iha haʼu-nia oin.+
9 Haʼu la presiza foti karau ida husi ó-nia uma,Ka bibi-timur aman husi ó-nia bibi-luhan.+
10 Tanba animál fuik hotu iha ai-laran mak haʼu-nian,+Nuneʼe mós ho animál fuik sira iha foho hotu nia leten.
11 Haʼu hatene manu hotu iha foho sira;+Animál barak neʼebé labele sura iha rai-luan mak haʼu-nian.
12 Se karik haʼu hamlaha, haʼu la presiza fó-hatene ba ó,Tanba mundu no buat hotu neʼebé iha mundu mak haʼu-nian.+
13 Haʼu presiza han karau-aman nia naʼan ka?No haʼu presiza hemu bibi-timur nia raan ka?+
14 Hasaʼe agradese ba Maromak nuʼudar ó-nia sakrifísiu,+No kumpre ó-nia juramentu ba Maromak neʼebé Aas Liu Hotu;+
15 Bolu haʼu iha ó-nia tempu susar.+Haʼu sei salva ó, no ó sei fó glória ba haʼu.”+
16 Maibé Maromak sei dehan ba ema aat:
“Sé mak fó direitu ba ó atu konta kona-ba haʼu-nia ukun-fuan sira+Ka koʼalia kona-ba haʼu-nia aliansa?+
17 Tanba ó odi haʼu-nia dixiplina,*No ó kontinua fila kotuk ba haʼu-nia liafuan sira.*+
18 Bainhira ó haree naʼok-teen ida, ó apoia nia,*+No ó ransu beibeik ho ema neʼebé halo adultériu.*
19 Ó uza ó-nia ibun atu habelar buat neʼebé aat,No lia-bosok belit metin ba ó-nia nanál.+
20 Ó tuur no koʼalia aat kona-ba ó-nia maun-alin rasik;+Ó hatudu sai sala husi ó-nia inan nia oan-mane.*
21 Bainhira ó halo buat sira-neʼe, haʼu nafatin nonook deʼit,Tan neʼe ó hanoin katak haʼu hanesan deʼit ho ó.
Maibé agora haʼu sei korrije ó,No haʼu sei fó sai haʼu-nia kazu hasoru ó.+
22 Imi hotu neʼebé haluha ona Maromak,+ favór ida, hanoin didiʼak kona-ba ida-neʼe,Atu nuneʼe haʼu la lees imi ba pedasuk no la iha ema ida atu salva imi.
23 Ema neʼebé hasaʼe agradese nuʼudar ninia sakrifísiu fó glória ba haʼu,+Kona-ba ema neʼebé laʼo tuir deʼit dalan loos,Haʼu sei halo nia haree salvasaun husi Maromak.”+
Nota-rodapé
^ Ka “Husi fatin neʼebé loro-matan saʼe toʼo fatin neʼebé loro-matan monu”.
^ Ka “hanorin; treinu”.
^ Orj., “soe haʼu-nia liafuan sira ba kotuk”.
^ Ka karik “tuir nia”.
^ Ka “Ó hafoʼer ó-nia inan nia oan-mane nia naran”.
