Salmo 75:1-10
-
Maromak tesi-lia ho loloos
-
Ema aat sei hemu tua-uvas husi Jeová nia kopu (8)
-
Ba dirijente: Tuir melodia Labele Harahun Haʼu. Asaf+ nia knananuk.
75 Ami fó agradese ba Ita, oh Maromak, ami fó agradese ba Ita;Ita-nia naran hamutuk ho ami,+No povu fó sai Ita-nia hahalok furak sira.
2 Ita dehan: “Kuandu haʼu marka ona tempu ida atu tesi-lia,Haʼu tesi-lia ho loloos.
3 Bainhira rai no ema hotu neʼebé iha rai sai nakdedar,*Haʼu mak halo rai nia riin sira metin nafatin.” (Sela)
4 Haʼu hatete ba ema neʼebé gaba an: “Keta gaba an”,
No ba ema aat: “Keta loko an kona-ba ó-nia kbiit.*
5 Keta loko an kona-ba ó-nia kbiit*Ka koʼalia ho foti an.
6 Tanba hahiʼi la mai husiParte leste, oeste, ka súl.
7 Tanba Maromak mak Juís.+
Nia hatún ema ida no hiʼit aas ema seluk.+
8 Tanba kopu ida iha ona Jeová nia liman;+No tua-uvas neʼe nafurin no kahur didiʼak ona.
Nia sei fakar sai duni ida-neʼe,No ema aat hotu iha rai sei hemu tua neʼe toʼo ninia teen.”+
9 Maibé kona-ba haʼu, haʼu sei fó sai ba nafatin buat neʼebé Maromak halo ona;Haʼu sei kanta knananuk hahiʼi nian* ba Jacob nia Maromak.
10 Tanba nia dehan: “Haʼu sei halakon ema aat nia kbiit* hotu,Maibé haʼu sei aumenta ema laran-loos nia kbiit.”*
Nota-rodapé
^ Orj., “nabeen”.
^ Orj., “Keta hiʼit aas ó-nia dikur”.
^ Orj., “Keta hiʼit aas ó-nia dikur”.
^ Ka “halo múzika”.
^ Orj., “hakotu ema aat nia dikur sira”.
^ Orj., “hiʼit aas ema laran-loos nia dikur sira”.
