TANBASÁ IMPORTANTE: Se estudante prepara ba sira-nia estudu, fasil liu ba sira atu komprende no hanoin-hetan buat neʼebé ita hanorin. Sira mós sei laʼo ba oin lalais liután. Hetan tiha batizmu, sira presiza nafatin prepara ba reuniaun no haklaken hodi bele “matan-moris nafatin”. (Mt 25:13) Tan neʼe, se sira hatene dalan atu estuda no iha toman diʼak atu estuda, neʼe sei lori benefísiu iha sira-nia moris. Komesa husi tempu neʼebé ita foin estuda ho sira, ita presiza ajuda sira atu haburas toman diʼak hodi prepara ba sira-nia estuda.

OINSÁ ATU HALO IDA-NEʼE:

• Sai ezemplu diʼak. (Rom 2:21) Hanoin kona-ba estudante ida-idak nia presiza bainhira prepara. (km 11/15 p. 3) Hatudu ba nia Ita-nia livru neʼebé Ita riska tiha ona

• Anima nia atu prepara. Bainhira estuda metin ona, fó-hatene katak preparasaun mak parte ida husi arranju atu estuda Bíblia, no esplika tanbasá neʼe diʼak ba nia. Fó sujestaun oinsá uza tempu semana-semana atu prepara. Irmaun-irmán balu fó sira-nia livru neʼebé prepara tiha ona hodi estudante bele uza durante ninia estudu, no nia bele haree rasik oinsá neʼe bele ajuda nia. Gaba nia bainhira nia prepara

• Hatudu nia oinsá atu prepara. Irmaun-irmán balu deside atu la estuda iha loron ida, maibé uza fali tempu neʼe hodi hatudu estudante oinsá atu prepara ba ninia lisaun atu estuda. Sira halo ida-neʼe bainhira estudante foun hela