TANBASÁ IMPORTANTE: Estudante Bíblia tenkesér dedika sira-nia moris ba Jeová no hetan batizmu hodi Jeová simu sira. (1Pe 3:21) Ema neʼebé moris tuir sira-nia dedikasaun, neʼe sei proteje sira-nia relasaun diʼak ho Jeová. (Sal 91:1, 2) Ema kristaun ida dedika ninia moris ba Jeová, laʼós ba ema, serbisu, ka organizasaun. Tan neʼe mak estudante tenkesér hafolin no haburas domin ba Jeová.—Rom 14:7, 8.

OINSÁ ATU HALO IDA-NEʼE:

• Bainhira halaʼo estudu ho sira, koʼalia kona-ba saida mak sira aprende kona-ba Jeová husi informasaun sira. Fó laran-manas ba sira katak importante tebes atu lee Bíblia loroloron no “halo orasaun beibeik” ba Jeová.—1Ts 5:17; Tgo 4:8

• Fó laran-manas ba ita-nia estudante atu halo planu kona-ba dedika an no hetan batizmu. No mós ajuda nia atu halo planu simples hanesan fó komentáriu iha reuniaun ka haklaken ba viziñu no kolega serbisu sira. Presiza hanoin-hetan katak Jeová la obriga ema atu serbí nia. Dedikasaun mak desizaun ema ida-idak nian.—Deu 30:19, 20

• Anima ita-nia estudante atu halo mudansa ba ninia hahalok hodi Jeová simu nia no atu kumpre kritériu ba batizmu. (Prv 27:11) Dala ruma hahalok ka toman balu bele sai ona abut, tan neʼe mak estudante ida presiza ajuda beibeik atu nia bele soe hahalok tuan hodi tau fali hahalok foun. (Éf 4:22-24) Hatudu informasaun husi Livru Haklaken iha série “Bíblia troka ema nia moris” ba nia

• Konta ba nia ksolok saida mak ita hetan husi serbí Jeová.—Isa 48:17, 18