TANBASÁ IMPORTANTE: Ema tenke bolu Jeová nia naran atu bele hetan salvasaun. (Rom 10:13, 14) Maibé laʼós ema hotu neʼebé estuda Bíblia hakarak atu moris tuir Jeová nia matadalan. Ita uza ita-nia tempu ho didiʼak hodi haklaken no ajuda ema seluk neʼebé hakarak halo Jeová kontente. Kuandu estudante Bíblia ida la laʼo ba oin maski estuda ona ba tempu kleur, diʼak atu para estuda no uza fali ita-nia tempu atu buka ema seluk neʼebé Jeová dada ba nia no ba ninia organizasaun. (Jo 6:44) Maski nuneʼe, se ema neʼe halo mudansa no hatudu katak nia “prontu atu simu lia-loos neʼebé lori ba moris rohan-laek”, ita mós kontente atu estuda fali ho nia.​—Aps 13:48.

OINSÁ ATU HALO IDA-NEʼE:

• Gaba estudante tanba nia hakarak hetan koñesimentu neʼebé loos.​—1Ti 2:4

• Esplika ba nia katak importante tebes atu aplika buat neʼebé nia aprende ona.​—Lc 6:46-49

• Ho laran-diʼak koʼalia hamutuk ai-knanoik kona-ba ema neʼebé kari fini, no husu nia kona-ba saida mak hanetik nia atu aplika buat neʼebé nia aprende.​—Mt 13:18-23

• Esplika ho didiʼak tanbasá Ita para estuda Bíblia ho nia

• Hatete ba nia katak Ita sei nafatin vizita atu anima nia, no karik se nia halo mudansa atu laʼo ba oin, nia bele komesa estuda fali

HAREE VÍDEO, NO DEPOIS HATÁN BA PERGUNTA SIRA TUIRMAI NEʼE:

• Saida mak hatudu katak estudante neʼe la halo mudansa no la laʼo ba oin?

• Oinsá mak haklaken-naʼin ajuda estudante atu komprende katak importante tebes atu halo mudansa?

• Saida mak haklaken-naʼin halo atu hatudu katak se estudante halo mudansa, nia bele estuda fali iha futuru?