Imajina katak Ita moris iha Galileia iha Jesus nia tempu. Ita presiza bá Jeruzalein atu tuir selebrasaun tenda nian. Sidade Jeruzalein nakonu ho ema husi fatin oioin neʼebé adora Jeová. Ita hakarak hasaʼe sakrifísiu ba Jeová. Tan neʼe Ita dada bibi-timur ida no laʼo sena malu hodi bá templu. Bainhira Ita toʼo iha templu, fatin neʼe mós nakonu ho ema neʼebé hakarak atu hasaʼe sira-nia sakrifísiu. Ikusmai toʼo Ita-nia tempu atu entrega bibi-timur neʼe ba amlulik sira. Maibé derrepente deʼit, Ita hanoin-hetan irmaun ida neʼebé iha buat ruma hasoru Ita. Karik nia mós mai iha ema-lubun nia leet ka iha hela sidade laran. Jesus esplika saida mak Ita presiza halo. (Lee Mateus 5:24.) Oinsá mak Ita bele buka dame ho Ita-nia irmaun neʼe hodi halo tuir Jesus nia matadalan? Iha lista tuirmai, tau marka ba resposta neʼebé loos.

ITA TENKE . . .

• koʼalia ba Ita-nia irmaun se Ita hanoin katak nia iha razaun atu sai hirus

• koko atu korrije Ita-nia irmaun tanba Ita hanoin katak nia sente an lalais ka nia mós iha sala

• rona didiʼak bainhira irmaun neʼe koʼalia sai ninia sentimentu, no maski Ita la komprende ho loloos tansá mak nia hirus, husu deskulpa ho laran kona-ba buat neʼebé halo nia laran-kanek ka kona-ba rezultadu husi Ita-nia hahalok neʼebé Ita halo la ho neon

ITA-NIA IRMAUN TENKE . . .

• buka ema seluk iha kongregasaun atu apoia nia hodi konta ba sira kona-ba oinsá Ita hakanek nia

• hirus Ita, koʼalia sai sala hotu neʼebé Ita halo, no husu Ita atu rekoñese Ita-nia sala sira

• hafolin hahalok haraik-an no aten-brani neʼebé Ita hatudu hodi buka nia, no fó perdua husi laran

Maski ohin loron ita la hasaʼe ona animál iha ita-nia adorasaun, maibé Jesus hanorin saida kona-ba ligasaun entre buka dame ho ita-nia irmaun no adorasaun neʼebé Maromak simu?