Labele koʼalia demais: Labele hanoin katak ita tenke esplika buat hotu. Jesus uza pergunta hodi ajuda ema atu hanoin no komprende ho loloos. (Mt 17:24-27) Husu pergunta halo ita-nia estudu moris no ajuda ita atu hatene estudante komprende ona ka lae no nia fiar saida. (be p. 253 par. 3-4) Bainhira husu pergunta, tenke iha pasiénsia atu hein ba resposta. Se estudante fó resposta sala, uza fali pergunta seluk atu ajuda nia komprende, duké fó sai resposta neʼebé loos ba nia. (be p. 238 par. 1-2) Koʼalia neineik uitoan hodi estudante bele komprende didiʼak buat foun neʼebé ita hanorin ba nia.—be 230 par. 4.

Labele halo estudu komplikadu: La presiza atu konta hotu buat neʼebé ita hatene ona kona-ba tópiku ida. (Jo 16:12) Fó atensaun ba pontu importante deʼit husi parágrafu ida-idak. (be p. 226 par. 4-5) Dala ruma ita hakarak atu esplika tan informasaun seluk, maibé halo nuneʼe bele halo estudante la tau fokus ba pontu importante sira. (be p. 235 par. 3) Kuandu estudante komprende ona, hakat ba parágrafu tuirmai.

Labele estuda liu deʼit: Ita-nia objetivu mak atu book ema nia laran, laʼós estuda informasaun deʼit. (Lc 24:32) Uza didiʼak kbiit husi Maromak nia Liafuan hodi fó atensaun ba eskritura importante sira iha lisaun. (2Ko 10:4; Ebr 4:12; be p. 144 par. 1-3) Uza ai-knanoik neʼebé simples. (be p. 245 par. 2-4) Hanoin uluk saida mak susar ba estudante no nia fiar saida, tuirmai hanoin oinsá mak bele uza lisaun neʼe atu ajuda nia. Husu pergunta hanesan: “Ita sente oinsá kona-ba informasaun neʼebé Ita aprende daudauk neʼe?” “Neʼe hanorin ita saida kona-ba Jeová?” “Tanbasá mak diʼak atu halo tuir konsellu neʼe?”—be p. 238 par. 3-5; p. 259 par. 1.