1, 2. (a) Jesus fó ai-knanoik saida atu hatudu katak ulun-naʼin relijiaun sira la laran-metin? (b) Husi Jesus nia ai-knanoik, saida mak ita aprende kona-ba oan neʼebé joven ona?

 LORON balu antes Jesus mate, nia koʼalia ho ulun-naʼin relijiaun nian no husu pergunta ba sira. Jesus hatete: “Imi hanoin sá? Ema ida iha oan-mane naʼin-rua. Nia bá ida uluk hodi dehan: ‘Oan, ohin ó bá serbisu iha toʼos.’ Oan neʼe hatán: ‘Haʼu lakohi.’ Maibé, lakleur, nia hakribi hodi bá. Tuirmai, nia hakbesik ida seluk hodi dehan ba nia hanesan nia dehan ba ida uluk. Ida  neʼe hatán: ‘Haʼu bá, naʼi.’ Maibé nia la bá. Sira naʼin-rua neʼe, ida-neʼebé mak halo tuir nia aman nia hakarak?” Ulun-naʼin sira-neʼe hatán: “Ida uluk.”—Mateus 21:28-31.

² Iha versíkulu sira-neʼe, Jesus hatudu kona-ba ulun-naʼin relijiaun sira neʼebé la laran-metin. Sira hanesan oan-mane ida ikus, sira promete atu halo Maromak nia hakarak, maibé sira la halo tuir. Kuandu lee Jesus nia ai-knanoik neʼe, inan-aman bele haree katak Jesus komprende didiʼak kona-ba moris família nian. Hanesan oan sira iha Jesus nia ai-knanoik, baibain susar atu hatene kona-ba saida mak oan joven hanoin daudauk, ka saida mak sira sei halo. Karik, maski oan halo problema barak durante tempu joven, maibé kuandu nia sai boot ona, nia bele kaer didiʼak ninia responsabilidade no ema bele fiar nia. Entaun, importante atu hanoin kona-ba neʼe, nuʼudar ita koʼalia kona-ba oan joven neʼebé kontra beibeik.

3. Tanbasá mak inan-aman labele tesi lia kedas katak sira-nia oan ida mak ho ulun-toos kontra beibeik?

³ Dala ruma, oan joven balu la fó ulun ba sira-nia inan-aman. Karik Ita rasik hatene família ida neʼebé iha oan joven hanesan neʼe. Maibé, tuir loloos la fasil ba ita atu hatene se oan ida la halo tuir tanba nia hasoru problema ruma, ka se nia ho ulun-toos hakarak duni atu kontra hasoru ninia inan-aman. No mós, dala ruma difisil atu komprende tansá mak oan balu la fó ulun ba inan-aman, maibé oan sira seluk halo tuir. Se inan-aman sente katak sira-nia oan ida komesa hatudu katak nia ho ulun-toos kontra beibeik, inan-aman tenke halo saida? Antes hatán pergunta ida-neʼe, ulukliu mai ita koʼalia uitoan kona-ba buat ida tan. Kuandu livru neʼe koʼalia kona-ba oan neʼebé ho ulun-toos kontra beibeik, neʼe katak sá loos?

4-6. (a) Oinsá mak ita hatene katak oan ho ulun-toos kontra beibeik? (b) Saida mak inan-aman tenke hanoin-hetan se sira-nia oan joven dala ruma la halo tuir sira?

 ⁴ Oan neʼebé ho ulun-toos kontra beibeik katak oan neʼebé ho neon lakohi halo tuir inan-aman no sira neʼebé mak boot liu, lakohi simu ajuda atu hadiʼa ninia hahalok, no mós nafatin halo hanesan neʼe. Kona-ba labarik hotu Bíblia hatete: ‘Hahalok beik mak iha oan nia laran.’ (Provérbios 22:15) Tan neʼe labarik hotu, dala ruma, lakohi halo tuir inan-aman no sira neʼebé boot liu sira. No mós, buat ruma neʼebé troka iha ema ida nia moris bele hamosu estrese. Ita-nia oan-mane ka oan-feto neʼebé joven nia isin no sentimentu troka beibeik, tanba sira laʼós tan labarik kiʼik maibé atu tama ba moris nuʼudar ema boot. Tan neʼe, susar ba inan-aman balu atu iha relasaun neʼebé diʼak ho sira-nia oan joven. No mós, dala ruma inan-aman lakohi fó liberdade ba joven, maibé oan joven hakarak atu hetan liberdade liután. Situasaun neʼe hanesan inan-aman neʼebé hakarak karreta atu halai neineik, maibé joven hakarak karreta atu halai lalais.

⁵ Oan joven neʼebé ho ulun-toos kontra beibeik fila kotuk ba buat neʼebé inan-aman fiar mak loos. Maibé, hanoin-hetan katak se Ita-nia oan ida dala ruma la halo tuir, neʼe la dehan katak nia mak ho ulun-toos kontra beibeik. No kona-ba serbí Maromak, karik oan balu ladún iha interese kona-ba lia-loos husi Bíblia, maibé ida-neʼe mós la dehan katak sira kontra inan-aman. Entaun nuʼudar aman ka inan, imi labele lalais atu tesi lia katak imi-nia oan mak oan neʼebé ho ulun-toos kontra beibeik.

⁶ Maibé, ida-neʼe katak joven hotu sei kontra hasoru inan-aman nia kbiit ka lae? Lae, laʼós joven hotu. Tuir loloos, iha buat barak neʼebé hatudu katak iha joven uitoan deʼit neʼebé ho ulun-toos kontra beibeik sira-nia inan-aman. Maibé, oinsá se oan ida ho neon kontra beibeik? Karik, saida mak book nia atu kontra ninia inan-aman?

7. Tanbasá mak perigu atu ransu ho ema neʼebé halo tuir Satanás nia mundu?

⁷ Razaun ida tansá joven barak kontra sira-nia inan-aman mak tanba mundu neʼe haleno Satanás nia hahalok. “Mundu tomak sei iha aat-naʼin nia ukun.” (1 Joao 5:19) Satanás nia mundu hatudu hahalok neʼebé aat. (Joao 17:15) Ohin loron ema nia hahalok aat sai aat liután duké tempu uluk. (2 Timoteo 3:1-5, 13) Tan neʼe, ema kristaun hotu tenke hakaʼas an atu la halo tuir Satanás nia mundu. Se inan-aman la hanorin, la fó avizu no la proteje sira-nia oan, “espíritu neʼebé book an iha ema ulun-toos sira-nia laran” bele mós manán sira-nia oan joven. (Efeso 2:2) Baibain joven sira hakarak tuir deʼit joven seluk nia hahalok, maibé Bíblia hatete: “Ema neʼebé hamutuk ho ema beik sira sei hetan buat aat.” (Provérbios 13:20) Neʼe katak ema neʼebé ransu ho sira neʼebé haleno mundu nia hahalok aat sei haburas mós hahalok aat. Oan joven sira presiza hetan beibeik inan-aman nia ajuda, atu sira bele fiar katak halo tuir Maromak nia matadalan mak dalan neʼebé diʼak liu.—Isaías 48:17, 18.

8. Razaun saida deʼit mak halo oan joven balu kontra beibeik sira-nia inan-aman?

⁸ Razaun ida seluk tansá oan kontra inan-aman mak tanba situasaun iha uma-laran. Porezemplu, se aman ka inan mak lanu-teen, uza droga, ka halo violénsia hasoru nia kaben, karik oan joven sei la iha hanoin neʼebé loos kona-ba buat barak iha ninia moris. Dala ruma iha oan neʼebé kontra inan-aman maski sira-nia família iha moris neʼebé hakmatek. Ida-neʼe bele mosu kuandu oan sente katak inan-aman la iha interese ba nia. Maibé dala ruma, laʼós deʼit situasaun iha uma-laran mak book oan joven atu kontra beibeik. Maski inan-aman halo tuir Maromak nia matadalan no hakaʼas an atu proteje oan sira husi mundu aat neʼe, maibé oan balu fila kotuk husi buat neʼebé inan-aman fiar mak loos. Tanbasá? Tanba ita  hotu mak sala-naʼin, inklui mós joven sira. Apóstolu Paulo hatete: “Husi ema ida deʼit [Adão] mak sala tama iha mundu, no tan sala, mate; nuneʼe mate toʼo ba ema hotu, basá ema hotu sala.” (Roma 5:12) Adão kontra hasoru Maromak tan deʼit buka nia rasik nia hakarak, no nia hadaʼet sala ba nia bei-oan sira. Nuneʼe, joven balu hili rasik atu kontra beibeik, hanesan sira-nia beiʼala, Adão.

9. Inan-aman balu haboot sira-nia oan iha dalan rua neʼebé sala. Esplika toʼok.

⁹ Razaun ida tan tansá oan joven kontra beibeik mak tanba dalan neʼebé inan-aman haboot sira. (Koloso 3:21) Inan-aman balu fó dixiplina neʼebé makaʼas liu no nunka fó liberdade neʼebé sira-nia oan presiza. Inan-aman seluk tan husik oan halo deʼit sira-nia hakarak, no la fó matadalan atu proteje oan joven neʼebé ladún iha esperiénsia kona-ba moris. Tuir loloos, susar ba inan-aman atu tetu didiʼak kona-ba oinsá sira bele fó dixiplina iha dalan neʼebé loos. Oan ida-idak presiza dixiplina neʼebé la hanesan. Karik inan-aman presiza fó atensaun liu ba oan ida duké oan ida seluk. Maski nuneʼe, Bíblia hatudu ezemplu rua neʼebé bele sai nuʼudar avizu ba inan-aman. Ida mak Eli neʼebé la fó dixiplina ba ninia oan sira. No ida seluk mak Roboão, neʼebé halaʼo nia knaar nuʼudar liurai hodi hanehan ninia povu. Ezemplu rua neʼe hatudu katak perigu tebes kuandu inan-aman la fó dixiplina, ka fó dixiplina iha dalan neʼebé makaʼas liu.

10. Maski Eli mak amlulik boot neʼebé laran-metin, maibé tanbasá mak nia la halaʼo didiʼak ninia knaar nuʼudar aman?

¹⁰ Eli mak amlulik boot iha rai-Izraél antigu, no nia mós iha oan balu. Nia serbí nuʼudar amlulik boot ba tinan 40, nuneʼe nia komprende didiʼak Maromak nia Ukun-Fuan. Nia halaʼo nia knaar ho laran-metin no karik nia mós hanorin didiʼak Maromak nia Ukun-Fuan ba ninia oan-mane, Hofni no Finéas. Maibé, Eli estima  demais ninia oan sira. Hofni no Finéas serbí nuʼudar amlulik, maibé sira mak “ema neʼebé folin-laek”, tanba sira kaan-teen ba hahán no hakarak deʼit atu halo sala-foʼer. Kuandu sira halo hahalok aat iha fatin neʼebé santu, Eli la barani atu hasai sira husi knaar nuʼudar amlulik. Eli la fó dixiplina ba sira, maibé fó-hatene deʼit katak sira-nia hahalok sala. Hodi husik oan sira halo deʼit sira-nia hakarak, Eli hatudu katak nia hafolin ninia oan sira liu fali Maromak. Tan neʼe, Eli nia oan sira hafoʼer adorasaun ba Maromak Jeová, no ikusmai Eli nia umakain hotu hetan susar.—1 Samuel 2:12-17, 22-25, 29; 3:13, 14; 4:11-22.

11. Saida mak inan-aman bele aprende husi Eli nia istória?

¹¹ Maski Eli nia oan halo sala kuandu sira boot ona, maibé istória neʼe hatudu mai ita katak perigu tebes se inan-aman la fó dixiplina ba oan sira. (Kompara ho Provérbios 29:21.) Inan-aman balu hanoin katak sira hatudu domin hodi husik oan sira halo deʼit sira-nia hakarak. Inan-aman sira-neʼe la esplika ba oan sira kona-ba buat neʼebé sira bele ka labele halo. Inan-aman sira-neʼe mós la fó dixiplina ba oan sira, maski oan sira kontra Maromak nia ukun-fuan. Tanba husik oan halo tuir deʼit sira-nia hakarak, ikusmai oan lakohi rona sira-nia inan-aman ka lakohi halo tuir ema neʼebé boot liu sira.—Kompara ho Eclesiastes 8:11.

12. Oinsá mak Liurai Roboão halaʼo nia knaar?

¹² Ezemplu ida tan mak Liurai Roboão. Nia mak liurai ikus neʼebé ukun Izraél tomak. Roboão hatudu ezemplu aat kona-ba oinsá halaʼo nia knaar hodi hanehan ninia povu. Ninia aman, Liurai Salomão, hanehan povu hodi fó serbisu neʼebé todan liu. Nuneʼe, bainhira Roboão sai liurai, nia ukun povu neʼebé la kontente ona. Roboão hatudu laran-sadiʼa ba sira-nia situasaun ka lae? Lae. Kuandu povu hakarak Roboão atu hamenus sira-nia todan, Roboão lakohi rona ba konsellu husi katuas sira neʼebé serbí nia, maibé nia deside atu aumenta tan povu nia todan. Tan nia foti-an, suku sanulu iha parte norte kontra  hasoru nia, no nasaun Izraél fahe ba rua.—1 Reis 12:1-21; 2 Crônicas 10:19.

13. Saida mak bele ajuda inan-aman atu la halo tuir Roboão nia ezemplu?

¹³ Inan-aman mós bele foti lisaun importante husi istória kona-ba Roboão. Sira presiza “buka ba Aman Jeová” liuhusi orasaun no uza Bíblia nia matadalan, atu buka-hatene se sira haboot sira-nia oan tuir dalan neʼebé diʼak ka la diʼak. (Salmo 105:4) Eclesiastes 7:7 hatete: “Tan ukun neʼebé hanehan ema, karik ema matenek mós halo hahalok bulak.” Nuneʼe, inan-aman neʼebé tetu didiʼak kona-ba buat neʼebé oan joven sira bele no labele halo, proteje oan sira husi perigu ruma, no ajuda sira haburas kbiit atu halo desizaun neʼebé diʼak. Maibé se inan-aman bandu buat barak liu, ida-neʼe bele hanetik oan sira hodi sira la fiar an no ladún iha kbiit atu halo desizaun rasik. Bainhira inan-aman tetu didiʼak no hatete ho klaru ba oan kona-ba buat neʼebé oan bele no labele halo, dala barak, halo sira-nia oan kontente no oan sira sei la hanoin atu kontra beibeik.

14, 15. Nuʼudar oan sai boot, sira presiza saida tan?

¹⁴ Maski inan-aman kontente hodi haree sira-nia oan sai boot ba daudauk, maibé karik inan-aman mós sente taʼuk tanba oan joven sira hahú atu hakarak tau matan ba sira-nia an rasik. Durante tempu neʼe, keta hakfodak se dala ruma oan sai ulun-toos no lakohi rona ba Ita. Hanoin-hetan katak nuʼudar inan-aman, Ita-nia knaar mak atu haboot oan sira atu sai ema kristaun neʼebé laran-metin no hatene kaer sira-nia responsabilidade ho didiʼak.—Kompara ho 1 Korinto 13:11; Efeso 4:13, 14.

¹⁵ Maski susar, maibé inan-aman presiza kuidadu atu la bandu kedas se oan joven husu liberdade, tanba agora sira presiza duni liberdade liután duké kuandu sira sei kiʼik. Tuir loloos, labarik balu iha ona hanoin hanesan  ema boot, maski sira sei joven. Porezemplu, Bíblia koʼalia kona-ba Liurai Josias neʼebé tinan 15 deʼit. Bíblia hatete: “Maski nia sei labarik hela, nia hahú ona atu buka David nia Maromak.” Loos duni, Josias mak joven neʼebé hatene kaer ninia responsabilidade ho didiʼak.—2 Crônicas 34:1-3.

16. Nuʼudar oan hetan liberdade liután, sira mós tenke prontu atu simu saida?

¹⁶ Maibé, liberdade lori mós responsabilidade. Nuneʼe, dala ruma, husik oan joven hasoru problema neʼebé mosu tanba ninia desizaun balu. Bíblia hatete: “Ema ida sei koʼa buat neʼebé nia kari.” (Galasia 6:7) Matadalan ida-neʼe loos ba ema hotu, inklui mós joven sira. Oan sira la bele iha inan-aman nia mahon ba nafatin. Maibé, oinsá se oan ida hakarak atu halo buat ruma neʼebé sala duni? Nuʼudar inan-aman Ita tenke hatete ba Ita-nia oan katak, “Labele.” No maski Ita esplika tansá nia labele halo buat ruma neʼebé sala, maibé keta troka Ita-nia desizaun. (Kompara ho Mateus 5:37.) Maski nuneʼe, koko atu hatete “Labele” ho kalma no iha dalan neʼebé diʼak, tanba “resposta neʼebé mamar, hasees hirus”.—Provérbios 15:1.

17. Oan joven presiza saida deʼit husi sira-nia inan-aman?

¹⁷ Se inan-aman sempre troka lei iha uma-laran tuir sira-nia hakarak deʼit, ida-neʼe sei halo oan joven sai bilán. Maibé oan sira sente seguru liu kuandu inan-aman kaer metin ba sira-nia lei. Oan sira sente hanesan neʼe, maski dala ruma sira la kontente ho lei balu. Liután neʼe, kuandu inan-aman fó ajuda no tau fiar ba sira-nia oan joven, neʼe halo sira iha fiar an no la sai ema neʼebé moedór. Nuneʼe sira bele sai ema boot neʼebé hatene kaer sira-nia responsabilidade ho didiʼak, no mós sente kontente.—Kompara ho Lucas 16:10; 19:17; 1 Tesalonika 5:15.

18. Se inan-aman hakaʼas an atu haboot oan sira ho didiʼak, dala barak sira bele koʼa buat diʼak saida?

¹⁸ Se inan-aman hakaʼas an atu halo moris família nian hakmatek no nakonu ho domin, sira bele fiar katak sira-nia oan sei sai ema boot neʼebé diʼak. (Efeso 4: 31, 32; Tiago 3:17, 18) Tuir loloos, iha joven barak neʼebé sai boot iha família neʼebé inan ka aman mak lanu-teen, halo violénsia, ka halo hahalok seluk neʼebé la diʼak. Maski susar tebes, maibé sira sai ema boot neʼebé diʼak. Nuneʼe, hakaʼas an bá, halo Ita-nia oan sira sente seguru, sempre hatudu laran-diʼak ba sira no halo sira hatene katak Ita hadomi sira. Loos, Ita presiza fó lei no dixiplina neʼebé tuir Bíblia nia matadalan sira. Maibé se Ita halo neʼe hotu, karik ema seluk sei gaba Ita-nia oan no ida-neʼe sei halo Ita mós kontente.—Kompara ho Provérbios 27:11.

19. Maski inan-aman tenke hanorin labarik tuir dalan neʼebé diʼak ba nia, maibé saida mak labarik nia responsabilidade?

¹⁹ Sin, inan-aman bele duni ajuda oan sira atu sai ema boot neʼebé diʼak. Provérbios 22:6 hatete: “Hanorin labarik tuir dalan neʼebé diʼak ba nia; maski nia sai katuas ona nia sei la husik dalan neʼe.” Maibé, oinsá ho oan joven neʼebé halo problema beibeik maski inan-aman halaʼo sira-nia knaar ho didiʼak? Ida-neʼe bele akontese ka lae? Bele. Ita bele komprende versíkulu neʼe hodi hanoin didiʼak ba versíkulu sira seluk neʼebé hatudu katak oan nia responsabilidade mak atu “rona” no halo tuir inan-aman. (Provérbios 1:8) Atu família bele moris hakmatek, inan-aman no sira-nia oan tenkesér halaʼo sira idak-idak nia responsabilidade tuir Bíblia nia matadalan. Selae, problema sei mosu iha família laran.

20. Kuandu oan joven ida halo sala ruma, saida mak inan-aman tenke halo?

²⁰ Saida mak inan-aman tenke halo kuandu oan joven ida halo sala ruma? Iha tempu neʼe, oan presiza inan-aman nia ajuda. Inan-aman presiza hanoin-hetan katak sira-nia oan seidauk iha esperiénsia kona-ba moris, ida-neʼe sei ajuda inan-aman atu la sai hirus lalais. Apóstolu Paulo hatete ba sira neʼebé tau matan ba kongregasaun: “Imi toman ema ruma halo sala karik, imi sira  neʼebé iha espíritu loos sei lori nia ho laran-kmaus ba dalan loos.” (Galasia 6:1) Inan-aman mós bele halo tuir matadalan neʼe kuandu oan joven ida halo sala ruma. Esplika ba nia tansá buat neʼebé nia halo mak sala, no oinsá mak nia bele hadook an husi hahalok sala neʼe. No moos, esplika ho klaru katak maski ninia hahalok mak sala, maibé nia laʼós ema aat ida.—Kompara ho Judas 22, 23.

21. Kuandu oan joven ida halo sala boot, oinsá mak inan-aman bele halo tuir katuas iha kongregasaun nia ezemplu?

²¹ Maibé, oinsá se oan joven ida halo sala neʼebé boot? Se nuneʼe, oan neʼe presiza tebes ajuda no konsellu neʼebé matenek. Kuandu ema ida iha kongregasaun laran halo sala boot, Bíblia hatete katak nia tenke hakribi ninia sala no hakbesik katuas iha kongregasaun laran atu hetan ajuda. (Tiago 5:14-16) Se nia hakribi ninia sala, katuas sira bele ajuda nia atu hadiʼa ninia relasaun ho Maromak Jeová. Iha família laran, inan-aman mak iha responsabilidade atu ajuda oan neʼebé halo sala boot hodi hakribi ninia sala no hadiʼa ninia relasaun ho Maromak Jeová. Karik inan-aman mós presiza koʼalia ho katuas sira kona-ba neʼe. No, se oan halo sala boot, inan-aman labele subar ida-neʼe husi katuas sira.

22. Kuandu oan joven ida halo sala boot, oinsá mak inan-aman bele halo tuir Maromak Jeová nia ezemplu?

²² Inan-aman sente triste tebes kuandu sira-nia oan rasik halo problema boot. Tanba hirus, karik sira ameasa sira-nia oan neʼe. Maibé, ida-neʼe bele halo oan sente katak inan-aman odi nia. Keta haluha katak oan neʼe nia futuru depende ba oinsá mak problema neʼe rezolve. Hanoin-hetan mós katak iha tempu Izraél antigu, Maromak Jeová prontu atu fó perdua bainhira ninia povu hakribi sira-nia sala. Rona ba Maromak nia liafuan tuirmai neʼe: “‘Mai, agora, imi hotu, mai ita halo loos problema entre ita,’ Jeová dehan. ‘Maski imi-nia sala mak hanesan mean lakan, sira sei sai mutin hanesan jelu-rahun; maski imi-nia sala mean hanesan hena mean, sira sei sai  mutin hanesan bibi-malae nia fulun.’” (Isaías 1:18) Neʼe mak ezemplu neʼebé diʼak tebes ba inan-aman sira, loos ka lae?

23. Se oan ida halo sala boot, inan-aman tenke halo saida? Saida mak sira labele halo?

²³ Entaun, se oan ida halo sala boot, koko atu book nia laran hodi nia fila fali ba dalan neʼebé loos. Husu toʼok konsellu husi inan-aman seluk neʼebé iha esperiénsia barak no katuas sira iha kongregasaun. (Provérbios 11:14) Koko atu la halo ka hatete buat ruma la ho hanoin, tanba ida-neʼe bele hakanek oan nia laran no karik halo susar ba nia atu hakbesik Ita. Hakaʼas an atu la sai hirus demais ka laran-nakali. (Koloso 3:8) Lalika lakon esperansa. (1 Korinto 13:4, 7) Maski Ita odi hahalok aat hotu, maibé labele halo Ita-nia laran sai toos, ka lakon domin ba Ita-nia oan. Buat neʼebé importante liu hotu mak inan-aman tenke hakaʼas an atu sempre hatudu ezemplu diʼak, no halo sira rasik nia fiar ba Maromak metin nafatin.

24. Dala ruma problema saida mak mosu iha família kristaun nia laran? Oinsá mak inan-aman bele hasoru situasaun neʼe?

²⁴ Dala ruma oan joven ida ho nia hakarak rasik deside atu kontra hasoru inan-aman, no lakohi halo tuir Bíblia nia matadalan. Se nuneʼe, kontinua atu ajuda oan sira seluk. Kuidadu atu labele uza Ita-nia tempu tomak atu ajuda oan neʼebé kontra beibeik toʼo haluha oan sira seluk. No mós la presiza atu subar problema neʼe husi sira. Diʼak liu atu koʼalia ho sira hodi esplika kona-ba situasaun neʼe, no halo sira fiar katak Ita sei hadomi família tomak.—Kompara ho Provérbios 20:18.

25. (a) Kuandu oan neʼebé boot ona kontra beibeik no lakohi simu ajuda, oinsá mak inan-aman bele halo tuir matadalan husi 2 Joao 10? (b) Maski oan ida kontra beibeik, saida mak inan-aman presiza hanoin-hetan kona-ba oan sira seluk?

²⁵ Kona-ba ema iha kongregasaun neʼebé kontra  beibeik no lakohi simu ajuda, apóstolu João hatete: “Keta simu nia iha imi-nia uma eh kumprimenta nia.” (2 Joao 10) Dala ruma inan-aman mós hanoin katak sira tenke halo tuir matadalan neʼebé hanesan, hodi hasai husi uma sira-nia oan neʼebé boot ona, neʼebé lakohi duni simu ajuda. Maski susar tebes atu foti desizaun hanesan neʼe, maibé dala ruma inan-aman presiza halo ida-neʼe atu proteje oan sira seluk. Sin, Ita presiza duni atu tau matan no proteje Ita-nia família. Nuneʼe, Ita presiza fó-hatene ho klaru ba família kona-ba hahalok neʼebé bele no labele halo iha uma-laran. Koʼalia beibeik ho oan sira seluk, no rona ba sira-nia hanoin. Hatudu interese ba buat neʼebé akontese iha sira-nia moris loron-loron nian, hanesan iha eskola no iha kongregasaun. No mós, fó-hatene ba sira katak maski Ita la simu oan neʼebé kontra beibeik nia hahalok, maibé Ita la odi nia. Bíblia konta kona-ba aman ida naran Jacob. Kuandu nia oan balu hamoe família tomak tanba sira-nia hahalok aat, Jacob la hakribi ninia oan, maibé hakribi sira-nia hahalok.—Gênesis 34:1-31; 49:5-7.

26. Saida mak ajuda inan-aman atu sente kmaan maski sira-nia oan ida ho ulun-toos kontra beibeik?

²⁶ Kuandu oan ida ho ulun-toos kontra beibeik, karik Ita sente katak ida-neʼe akontese tanba Ita rasik nia sala. Maibé se Ita sadere ba Maromak Jeová iha orasaun, no hakaʼas an ona atu halo tuir Bíblia nia matadalan, Ita lalika fó-sala ba Ita-nia an. Ita bele sente kmaan hodi hatene katak ema hotu mak sala-naʼin, no fiar katak Ita halo ona buat hotu neʼebé Ita bele halo atu sai aman ka inan neʼebé diʼak. (Kompara ho Apostolu 20:26.) Kuandu iha oan neʼebé ho ulun-toos kontra beibeik no lakohi simu ajuda, neʼe halo inan-aman sente triste tebes. Maibé se ida-neʼe akontese iha Ita-nia família, keta haluha katak Maromak hatene kona-ba Ita-nia situasaun no nia sei nunka husik ema neʼebé laran-metin ba nia. (Salmo 27:10; 1 Pedro 5:7) Entaun, hakaʼas an atu halo  Ita-nia uma sai fatin neʼebé seguru, no fatin neʼebé oan sira seluk bele haburas sira-nia relasaun ho Maromak Jeová.

27. Hodi hanoin-hetan Jesus nia ai-knanoik, inan-aman bele iha esperansa saida kona-ba oan neʼebé kontra beibeik?

²⁷ Liután neʼe, keta lakon esperansa. Tanba Ita hakaʼas an ona atu haboot oan iha dalan neʼebé loos, karik ikusmai ida-neʼe bele book ninia fuan no nia sei fila fali ba imi no ba Maromak. (Eclesiastes 11:6) Iha família kristaun seluk neʼebé mós hasoru situasaun hanesan Ita-nian, no sira balu iha oan neʼebé fila fali ba dalan neʼebé loos. Neʼe hanesan Jesus nia ai-knanoik neʼebé konta kona-ba oan neʼebé husik hela uma no halo hahalok aat, maibé ikusmai nia hakribi buat neʼebé nia halo no fila fali ba ninia aman. (Lucas 15:11-32) Karik ida-neʼe mós bele akontese ba Ita.