Husi kiʼik, haʼu gosta tebes natureza. Haʼu-nia família sempre pasiar ba ai-laran no lagoa neʼebé furak iha ami-nia sidade Jyväskylä, Finlándia Sentrál. Haʼu mós gosta animál. Kuandu haʼu kiʼik, haʼu hakarak hakoʼak asu no busa hotu neʼebé haʼu haree! Kuandu haʼu sai boot, haʼu la gosta haree ema barak neʼebé fó terus ba animál sira. Ikusmai haʼu envolve an ho organizasaun ida neʼebé defende animál sira-nia direitu no iha neʼebá mak haʼu hasoru ema seluk neʼebé mós hadomi animál.

Ami sempre halo kampaña kona-ba animál nia direitu. Ami fahe informasaun no halo demonstrasaun hodi kontra kompañia neʼebé halo roupa husi animál nia fulun no uza animál atu halo esperimentu iha laboratóriu. Ami mós harii organizasaun ida atu proteje animál. Tanba ami radikál tebes kona-ba proteje animál sira, ami sempre iha problema ho autoridade sira. Sira kaptura haʼu dala barak no lori ba tribunál.

Laʼós deʼit kona-ba animál sira, haʼu mós sente la kontente kuandu haree problema seluk neʼebé akontese iha mundu neʼe. Tan neʼe, haʼu tama ba organizasaun balu, inklui Amnesty International no Greenpeace. Haʼu fó haʼu-nia forsa tomak atu apoia sira-nia atividade. Haʼu luta kona-ba ema kiak sira-nia moris, hamlaha, no ema seluk nia direitu.

Maibé nuʼudar tempu laʼo daudaun, haʼu rekoñese katak haʼu labele troka situasaun iha mundu neʼe. Maski organizasaun sira-neʼe konsege hadiʼa problema kiʼik balu, problema neʼebé boot liu aumenta ba beibeik. Haree hanesan forsa neʼebé aat mak kontrola hela mundu tomak no la iha ida mak interese ho ida-neʼe. Haʼu sente hanesan labele halo buat ida.

Haʼu komesa hanoin kona-ba Maromak no Bíblia, razaun tanba haʼu sente triste labele halo buat ida. Antes neʼe haʼu mós estuda ona Bíblia ho Testemuña ba Jeová. Maski haʼu hafolin tebes Testemuña sira-neʼe nia laran-diʼak mai haʼu, iha tempu neʼebá haʼu la prontu troka haʼu-nia moris. Maibé agora, situasaun la hanesan.

Haʼu foti haʼu-nia Bíblia no komesa lee. Neʼe halo haʼu sente kmaan. Haʼu hetan eskritura barak neʼebé hanorin ita atu trata animál sira ho didiʼak. Porezemplu, Provérbios 12:10 hatete katak “ema laran-loos tau matan didiʼak ba ninia animál-hakiak sira”. Haʼu mós aprende katak laʼós Maromak mak hamosu buat aat hotu iha mundu neʼe. Ema nia problema aumenta barak liután tanba ema barak lakohi halo tuir Maromak. Haʼu sente admira tebes kuandu aprende kona-ba Maromak Jeová nia domin no pasiénsia.​—Salmo 103:8-14.

Iha tempu neʼebá haʼu hetan formuláriu atu husu livru Tuir Loloos, Saida mak Bíblia hanorin? Haʼu prenxe no haruka ida-neʼe. Lakleur, feen-laʼen Testemuña mai no oferese atu estuda Bíblia ho haʼu. Haʼu mós simu. Haʼu komesa tuir reuniaun sira iha Reuniaun-Fatin husi Testemuña ba Jeová. Rezultadu mak, lia-loos husi Bíblia komesa buras iha haʼu-nia laran.

Tanba aprende Bíblia, haʼu konsege halo mudansa barak. Haʼu para fuma no la hemu tua demais. Haʼu hadiʼa haʼu-nia dalan hatais no koʼalia. No haʼu mós troka haʼu-nia dalan hanoin kona-ba autoridade sira. (Roma 13:1) Haʼu mós husik ona morál la diʼak neʼebé uluk haʼu halo.

Buat neʼebé susar liu ba haʼu atu troka mak haʼu-nia hanoin kona-ba organizasaun neʼebé defende ema no animál sira-nia direitu. Neʼe labele akontese iha loron ida nia laran. Foufoun haʼu hanoin se haʼu sai husi organizasaun sira-neʼe, neʼe hanesan haʼu trai sira. Maski nuneʼe, ikusmai haʼu rekoñese duni katak só Maromak nia Ukun deʼit mak bele hadiʼa problema hotu iha mundu neʼe. Haʼu deside atu fó haʼu-nia forsa tomak hodi apoia Ukun neʼe no ajuda ema seluk atu hatene kona-ba Ukun neʼe.​—Mateus 6:33.

Uluk bainhira haʼu sei tuir atividade atu luta ba ema no animál nia direitu, haʼu haree ema nuʼudar grupu rua, neʼe mak ema aat no ema diʼak. Haʼu prontu atu kontra hasoru ema neʼebé haʼu haree nuʼudar ema aat. Maibé depois aprende tiha Bíblia, haʼu la odi tan ema seluk. Maibé, haʼu hakaʼas an hatudu domin kristaun ba ema hotu. (Mateus 5:44) Buat neʼebé haʼu halo atu hatudu domin mak, liuhusi haklaken kona-ba Maromak nia Ukun. Haʼu kontente atu haree katak serbisu haklaken bele lori dame no kontente no mós fó esperansa ba ema barak.

Hodi tau fiar tomak ba Maromak Jeová, halo haʼu sente dame iha laran. Haʼu iha fiar neʼebé metin katak, nuʼudar Kriadór, nia sei lori justisa ba ema no mós animál sira ba nafatin, no la husik mundu furak neʼe lakon. Liuhusi Maromak nia Ukun, Maromak sei hadiʼa buat aat hotu. (Isaias 11:1-9) Haʼu sente kontente tebetebes, laʼós deʼit tanba hatene kona-ba lia-loos, maibé mós tanba bele ajuda ema seluk tau fiar ba ida-neʼe. Haʼu la sente tan atu hadiʼa situasaun iha mundu neʼe.