“Bainhira ema neʼebé halo sala sériu no mate, sira-nia klamar bá infernu. Iha neʼebá, sira-nia klamar hetan kastigu ba nafatin iha ahi.” (Catechism of the Catholic Church) Ulun-naʼin relijiaun balu hatete katak ema neʼebé iha infernu mak ketak husi Maromak.

Salmo 146:4 hatete kona-ba ema: “Bainhira nia iis kotu, nia fila fali ba rai; iha loron neʼe kedas mak ninia hanoin sira lakon ona.” Ema neʼebé mate “la hatene buat ida”. (Eclesiastes 9:5) Entaun, se ema mate labele haree, rona ka sente buat ida, neʼe katak ema mate labele sente moras no terus iha ahi ka tanba ketak husi Maromak.

Bíblia barak iha lian Tetun tradús liafuan Gregu gehena nuʼudar “infernu”, maibé tuir loloos, liafuan gehena reprezenta lakon ba nafatin, la iha ona esperansa atu moris-hiʼas, no laʼós fatin atu hetan kastigu ba nafatin iha ahi. (Mateus 5:29) Bíblia mós koʼalia kona-ba “tasi neʼebé iha ahi-lakan no enxofre”. (Apokalipse 20:10) Maibé, Bíblia rasik esplika fraze neʼe nia signifikadu, hodi hatete: “Tasi neʼebé iha ahi-lakan reprezenta mate segundu.” (Apokalipse 20:14; 21:8) Entaun, neʼe laʼós fatin tebes neʼebé ahi-lakan ba nafatin maibé reprezenta “mate segundu”, katak la iha tan esperansa atu moris-hiʼas.

Se Maromak mak laran-aat, ita lakohi atu sai ninia belun no ita nunka bele hadomi nia. Rocío neʼebé hela iha rai-Méxiku hatete: “Husi kiʼik kedas ema hanorin haʼu kona-ba infernu. Neʼe halo haʼu taʼuk tebes no haʼu hanoin katak Maromak hatudu hahalok aat. Haʼu hanoin nia mak hirus-teen no laran-aat.”

Bíblia nia hanorin kona-ba dalan neʼebé Maromak tesi-lia no ema mate nia kondisaun, troka Rocío nia hanoin kona-ba Maromak. Nia hatete: “Haʼu sente livre. Haʼu sente hanesan ema hasai naha todan husi haʼu-nia kabaas. Haʼu komesa fiar katak Maromak hakarak buat neʼebé diʼak ba ita, katak nia hadomi ita no haʼu mós bele hadomi nia. Nia mak hanesan aman neʼebé kaer ninia oan nia liman no hakarak buat neʼebé diʼak liu ba sira.”​—Isaias 41:13.

Ema barak hakaʼas an atu halo Maromak kontente tanba sira taʼuk infernu. Maibé Maromak lakohi ita atu serbí nia tanba taʼuk nia. Jesus hatete: “Imi tenke hadomi Jeová imi-nia Maromak.” (Marcos 12:29, 30) Liután neʼe, bainhira ita komprende katak Maromak sempre hatudu hahalok justisa, ita la presiza taʼuk kona-ba oinsá nia tesi-lia ba ita iha futuru. Hanesan Job nia belun Eliú, ita bele hatete ho konfiansa: “Tanba loloos, Maromak la halo buat aat, Ida neʼebé Kbiit Boot Liu Hotu sempre halo tuir justisa.”​—Job 34:12.