ISTÓRIA 102
João haree vizaun sira
Bainhira apóstolu João sai dadur iha illa Patmos, Jesus fó sai ba nia vizaun 16 kona-ba futuru. Vizaun neʼe hatudu sai kona-ba oinsá Jeová nia naran sei sai santu, ninia Ukun sei toʼo mai, no ninia hakarak sei sai loos iha rai hanesan iha lalehan.
Iha vizaun ida, João haree Jeová tuur iha ninia kadunan santu iha lalehan. Rai-lakan no rai-tarutu sai husi ninia kadunan. Iha katuas naʼin-24 mak haleʼu nia, sira hatais roupa mutin no uza koroa osan-mean. Katuas naʼin-24 neʼe hakneʼak ho oin ba rai hodi adora Jeová. Iha vizaun seluk, João haree ema-lubun boot husi nasaun, suku, no língua hotu adora Jeová. Bibi-Oan, katak Jesus, mak tau matan sira no lori sira ba bee moris nian. No iha vizaun seluk tan, João haree Jesus komesa ukun nuʼudar Liurai iha lalehan hamutuk ho katuas naʼin-24. Iha vizaun tuirmai, João haree Jesus halo funu hasoru samea boot, katak Satanás, no ninia anju aat sira. Jesus soe tun tiha sira mai mundu.
Tuirmai João haree vizaun furak ida kona-ba Bibi-Oan no ema naʼin-144.000 neʼebé hamriik iha Foho Siaun iha lalehan. Nia mós haree anju ida semo haleʼu mundu, no haruka ema atu hamtaʼuk no fó glória ba Maromak.
Vizaun tuirmai mak kona-ba funu Armagedon. Durante funu neʼe, Jesus no ninia tropa sira sei harahun Satanás nia sistema aat neʼe. Iha vizaun ikus, João haree lalehan no mundu nakonu ho dame. Satanás no sira neʼebé apoia nia lakon mohu. Maromak nia atan hotu iha lalehan no mundu hatudu respeitu ba Maromak nia naran neʼebé santu no adora nia mesak deʼit.
“Haʼu sei halo ó no feto neʼe odi malu, nuneʼe mós ho ó-nia bei-oan no ninia bei-oan. Nia sei harahun ó-nia ulun, no ó sei hakanek ninia ain-tuban.”—Génesis 3:15
Karik Ita sei gosta
PERGUNTA KONA-BA BÍBLIA
Saida mak funu Armagedon?
Liafuan Armagedon akontese dala ida deʼit iha Bíblia, maibé eskritura barak husi Bíblia esplika mai ita kona-ba neʼe.
PERGUNTA KONA-BA BÍBLIA
Livru Apokalipse signifika saida?
Livru Apokalipse hatete katak ema neʼebé lee, komprende no halo tuir livru neʼe sei kontente.
