Loron ida bainhira Eva mesak, samea ida koʼalia ba nia: ‘Tebes ka lae, Maromak bandu imi labele han ai-fuan husi ai-hun hotu?’ Eva dehan: ‘Ami bele han ai-fuan husi ai-hun hotu, só deʼit iha ida mak labele. Se ami han ai-fuan neʼe, ami sei mate.’ Samea dehan: ‘Imi sei la mate. Tuir loloos, se imi han, imi sei sai hanesan Maromak.’ Neʼe tebes ka lae? Lae, neʼe bosok. Maibé Eva fiar. Eva hateke beibeik ba ai-fuan neʼe, no hakarak liután atu han. Ikusmai, nia han ai-fuan neʼe no fó mós ba Adão. Maski Adão hatene katak sira sei mate se sira la halo tuir Maromak, maibé nia nafatin han.

Liutiha oras balu, Jeová koʼalia ba Adão no Eva hodi husu tanbasá mak sira la halo tuir nia. Eva fó-sala ba samea, no Adão fó-sala ba Eva. Tanba Adão no Eva la halo tuir, Jeová hasai sira husi jardín Eden. Nia mós tau anju sira ho surik neʼebé lakan no nakdulas iha fatin atu tama ba jardín, hodi nuneʼe Adão no Eva labele tama.

Jeová dehan katak ida neʼebé bosok Eva mós sei hetan kastigu. Jeová la kria samea atu bele koʼalia. Tuir loloos anju aat ida mak halo samea neʼe koʼalia hodi lohi Eva. Anju neʼe mak Diabu Satanás. Iha futuru, Jeová sei halakon Satanás hodi nia labele lohi tan ema atu halo buat neʼebé aat.