Ba maluk fiar-naʼin sira:

Nuʼudar Jeová nia atan, ita hafolin tebes ninia Liafuan Bíblia. Ita fiar metin katak Bíblia fó sai istória neʼebé loos, matadalan neʼebé diʼak ba ita-nia moris loron-loron, no evidénsia neʼebé hatudu katak Jeová hadomi tebes ita. (Salmo 119:105; Lucas 1:3; 1 João 4:19) Ita hakarak atu ajuda ema seluk aprende lia-loos neʼebé folin-boot husi Maromak nia Liafuan. Tan neʼe, ami kontente tebes atu fó sai livru neʼe ho títulu Aprende husi Istória iha Bíblia. Ami sei esplika uitoan kona-ba livru neʼe.

Livru neʼe liuliu ba labarik sira, maibé mós bele ajuda ema boot neʼebé hakarak aprende liután kona-ba Bíblia. No tanba Bíblia mak livru ba ema hotu, ita hotu bele hetan benefísiu hodi aprende Bíblia nia istória sira no neʼe bele lori kontente ba ita.

Livru neʼe konta istória oioin hahú husi tempu neʼebé Maromak kria ema, no istória sira-neʼe hotu foti husi Bíblia. Ami hakaʼas an atu fó sai akontesimentu sira iha dalan neʼebé simples, klaru, no tuir tempu.

Maibé livru neʼe la konta deʼit istória husi Bíblia. Liafuan no dezeñu sira iha livru neʼe nia objetivu mak atu halo istória sira iha Bíblia sai moris no ajuda ita komprende ema neʼebé temi iha istória sira-neʼe nia sentimentu.

Liuhusi livru neʼe, ita bele hatene katak Bíblia konta istória kona-ba ema neʼebé halo tuir Jeová no mós ema neʼebé la halo tuir. Ita mós bele aprende lisaun husi sira-nia ezemplu. (Roma 15:4; 1 Korinto 10:6) Livru neʼe fahe ba parte 14. Parte ida-idak iha introdusaun neʼebé fó sai kona-ba buat neʼebé ita sei aprende.

 Se Ita iha oan, Ita bele lee istória ida ho Ita-nia oan no koʼalia hamutuk kona-ba dezeñu sira. Tuirmai imi bele lee eskritura neʼebé liga ho istória neʼe. Ajuda Ita-nia oan atu komprende katak lisaun neʼebé nia aprende mak bazeia ba Bíblia. Ita mós bele halo nuneʼe bainhira ita ajuda ema boot atu komprende kona-ba Bíblia.

Ami hein katak livru neʼe sei ajuda ema hotu neʼebé laran-moos, maski idade kiʼik ka boot, atu aprende Maromak nia Liafuan no aplika iha sira-nia moris. No rezultadu mak sira mós bele adora Jeová no sai parte ba ninia família.