1-3. Inimigu saida mak duni ita hotu? Tanbasá mak Bíblia nia hanorin halo ita sente kmaan?

HANOIN toʼok, Ita halai husi inimigu neʼebé aat tebetebes. Nia forte liu no halai lalais liu Ita. Ita hatene katak nia sempre oho ninia vítima tanba nia oho tiha ema balun neʼebé Ita koñese. Maski Ita koko makaʼas atu sees husi nia, nia buka nafatin Ita no Ita hanoin katak la iha ema ida neʼebé bele ajuda Ita. Maibé, derrepente deʼit, ema neʼebé bele salva Ita mosu mai. Ema neʼe forte liu fali Ita-nia inimigu neʼe, no nia promete atu ajuda Ita. Ida-neʼe halo Ita sente kmaan tebes!

² Tuir loloos, inimigu neʼe duni ita hotu. Hanesan ita aprende ona iha Kapítulu 6, Bíblia bolu mate nuʼudar ita-nia inimigu. Ita hotu la bele halai husi mate. Ita la bele kontra hasoru inimigu neʼe. Karik, inimigu neʼe manán tiha ita-nia belun ka família ruma. Maibé Maromak Jeová mak Ida neʼebé forte liu fali mate. Nia mak ita-nia Salvadór  neʼebé hadomi ita, neʼebé hatudu tiha ona katak nia bele manán hasoru inimigu neʼe. No mós, Jeová promete atu halakon mate ba nafatin. Bíblia hanorin: “Inimigu ikus neʼebé nia sei harahun tiha mak mate.” (1 Korinto 15:26) Ida-neʼe mak liafuan diʼak duni!

³ Mai ita haree uluk kona-ba oinsá mak ita sente kuandu ita-nia família ka belun mate. Hodi hanoin kona-ba ida-neʼe ita sei hafolin liu promesa ida neʼebé halo ita kontente. Maromak Jeová promete katak ema neʼebé mate ona sei moris filafali. (Isaías [Yesaya] 26:19) Ida-neʼe mak esperansa moris-hiʼas nian.

4. (a) Tanbasá mak aprende kona-ba Jesus nia sentimentu bainhira nia belun mate, bele ajuda ita hatene kona-ba Jeová nia sentimentu? (b) Sé deʼit mak Jesus nia belun diʼak?

⁴ Ita iha belun ka família ruma neʼebé mate tiha ona ka lae? Se nuneʼe, Ita sente laran-triste tebetebes, loos ka lae? Kuandu Ita sente hanesan neʼe, Ita presiza lee Maromak nia Liafuan atu hetan kmaan. (2 Korinto 1:3, 4) Bíblia ajuda ita hatene oinsá mak Maromak Jeová no Jesus sente kona-ba mate. Jesus haleno ninia Aman nia hahalok hotu, no Bíblia konta istória ida kona-ba oinsá Jesus sente triste loos bainhira ninia belun mate. (João 14:9) Bainhira Jesus bá Jeruzalein, baibain nia bá vizita Lázaro, Maria no Marta, neʼebé hela besik Jeruzalein iha sidade Betánia. Sira sai belun diʼak. Bíblia hatete: “Jesus hadomi Marta no nia alin  no mós Lázaro.” (João 11:5) Maibé, hanesan ita aprende ona iha Kapítulu 6, Lázaro mate.

5, 6. (a) Kuandu Jesus haree Lázaro nia família no belun neʼebé tanis, nia sente oinsá? (b) Oinsá mak istória kona-ba Jesus nia laran-triste bele ajuda ita?

⁵ Kuandu Jesus nia belun mate, Jesus sente oinsá? Bíblia fó-hatene katak Jesus bá haree Lázaro nia família no kolega sira neʼebé tanis. Bainhira Jesus haree sira, nia sente laran-taridu tebes. Nia sai “laran-triste tebes no neon-susar”. Bíblia hatutan tan: “Jesus tanis.” (João 11:33, 35) Tanba Jesus tanis, ida-neʼe katak Lázaro la iha esperansa ka lae? Lae. Tuir loloos, Jesus hatene katak buat furak tebes besik ona atu akontese. (João 11:3, 4) Maibé, nia sente laran-kanek no laran-triste tanba ninia belun mate.

⁶ Istória kona-ba Jesus nia laran-triste neʼe hanorin buat importante mai ita. Istória neʼe hanorin mai ita katak Jesus no ninia Aman Jeová, odi mate. Maibé Maromak Jeová bele manán hasoru inimigu neʼe! Mai ita haree saida mak Jesus halo ho Maromak nia forsa.

7, 8. Tuir ema nia hanoin, tanbasá mak Lázaro la iha esperansa tan? Maibé, saida mak Jesus halo?

⁷ Lázaro hakoi iha fatuk-kuak, no Jesus hakarak ema hasai fatuk boot neʼebé taka fatuk-kuak neʼe. Marta lakohi tanba Lázaro mate loron haat ona no nia isin dodok ona. (João 11:39) Tuir ema nia hanoin, la iha esperansa tan.

⁸ Maski nuneʼe, sira hasai fatuk neʼe, no Jesus  hakilar ho lian makaʼas: “Lázaro, sai mai liʼur!” Saida mak akontese? Lázaro “neʼebé mate ona sai mai liʼur”. (João 11:43, 44) Hanoin toʼok, ema iha fatin neʼe kontente tebetebes! Sira mak Lázaro nia biin-alin, família, kolega, ka viziñu, no sira hatene katak Lázaro mate ona. Maibé agora, ema neʼebé sira hadomi neʼe, hamriik iha sira-nia leet. Karik susar ba sira atu fiar buat neʼebé sira haree ho sira-nia matan rasik. Karik sira balun kontente loos atu hakoʼak Lázaro. Loos duni, Maromak manán hasoru mate!

9, 10. (a) Oinsá mak Jesus hatudu katak forsa atu halo Lázaro moris hiʼas mai husi Maromak? (b) Tanbasá mak diʼak atu lee istória sira kona-ba moris-hiʼas iha Bíblia?

⁹ Jesus la hatete katak nia halo milagre neʼe liuhusi nia forsa rasik. Antes nia haruka Lázaro sai husi rate, nia halo orasaun ho lian makaʼas hodi hatudu ho klaru katak Maromak Jeová mak halo Lázaro moris filafali. (João 11:41, 42) Ida-neʼe laʼós dala primeiru neʼebé Jeová uza ninia forsa atu fó moris-hiʼas. Maromak nia Liafuan konta kona-ba ema naʼin-sia neʼebé moris hiʼas tiha ona. * Ita sente kontente kuandu lee istória kona-ba moris-hiʼas sira-neʼe. Istória sira-neʼe hanorin ita katak Maromak la fihir ema, tanba ema neʼebé moris hiʼas mak labarik no ema boot, mane no feto, ema Izraél no ema husi nasaun seluk. Istória sira-neʼe mós konta kona-ba haksolok boot  neʼebé ema sente! Porezemplu, bainhira Jesus halo labarik-feto ida moris hiʼas, ninia inan-aman “sente haksolok tebetebes”. (Marcos 5:42) Sin, Jeová halo sira kontente tebes, no ita bele fiar katak sira nunka haluha akontesimentu ida-neʼe.

¹⁰ Ikusmai, sira neʼebé Jesus halo moris hiʼas mate fali. Se nuneʼe, moris-hiʼas neʼebé sira hetan, neʼe saugati deʼit ka lae? Lae. Bíblia nia istória kona-ba moris-hiʼas hatudu katak Maromak nia promesa sira mak loos no fó esperansa mai ita.

11. Oinsá mak Lázaro nia moris-hiʼas hatudu katak liafuan iha Eclesiastes (Pengkhotbah) 9:5 mak loos?

¹¹ Bíblia hanorin katak ema neʼebé mate ona “la hatene buat ida”. Sira la halo buat ida iha fatin seluk tanba sira la moris. Istória kona-ba Lázaro hatudu katak ida-neʼe mak loos. Bainhira Lázaro moris hiʼas, nia halo ema kontente hodi konta kona-ba moris iha lalehan ka lae? Nia halo ema taʼuk hodi konta kona-ba terus iha infernu ka lae? Lae. Bíblia la hatete katak Lázaro koʼalia hanesan neʼe. Durante loron haat neʼebé Lázaro mate, nia “la hatene buat ida”. (Eclesiastes [Pengkhotbah] 9:5) Tuir loloos, Lázaro mate, no mate hanesan ho toba deʼit.—João 11:11.

12. Tanbasá mak ita bele fiar katak Lázaro nia moris-hiʼas loloos akontese?

¹² Istória kona-ba Lázaro mós hanorin ita katak moris-hiʼas mak akontesimentu neʼebé loos, laʼós istória neʼebé ema inventa deʼit. Ema barak  haree ho matan rasik Jesus halo Lázaro moris hiʼas. Naʼi-ulun relijiaun sira neʼebé odi Jesus, mós la bele nega kona-ba Jesus nia milagre neʼe. Sira dehan: “Ita sei halo saida tanba ema neʼe hatudu sinál barak?” (João 11:47) Ema barak bá hasoru Lázaro neʼebé moris hiʼas ona. Tan neʼe sira tau fiar ba Jesus, katak Maromak mak haruka Jesus. Maibé, tanba naʼi-ulun relijiaun sira la bele nega milagre neʼe, sira balun neʼebé laran-aat halo planu atu oho Jesus no Lázaro.—João 11:53; 12:9-11.

13. Tanbasá mak ita bele fiar katak Jeová bele halo ema mate moris hiʼas?

¹³ Ita bele fiar katak moris-hiʼas bele akontese ka lae? Bele, tanba Jesus hanorin katak iha aban-bainrua “ema hotu neʼebé iha rate laran” sei moris hiʼas. (João 5:28) Jeová mak Kriadór, no moris hotu mai husi nia. Nuneʼe, nia bele kria fali ema ida, loos ka lae? Bele, maibé atu halo nuneʼe nia tenke hanoin-hetan buat hotu kona-ba ema neʼebé mate ona. Nia bele ka lae, hanoin-hetan buat hotu kona-ba ita-nia família no belun sira neʼebé mate ona? Hanoin toʼok, fitun iha lalehan barak tebetebes toʼo ema la bele sura, maibé Maromak fó naran ba fitun ida-idak. (Isaías [Yesaya] 40:26) Entaun, Maromak Jeová mós bele hanoin-hetan buat hotu-hotu kona-ba ita-nia família ka belun ruma neʼebé mate ona, no nia bele halo sira moris hiʼas fali.

14, 15. Hanesan buat neʼebé Job hatete, Jeová sente oinsá kona-ba fó moris-hiʼas ba ema neʼebé mate ona?

¹⁴ Maibé, Jeová sente oinsá kona-ba fó moris-hiʼas ba ema neʼebé mate ona? Bíblia hanorin  katak nia hakarak duni halo ema mate moris fali. Ema fiar-naʼin naran Job husu: “Se ema ida mate nia bele moris fali ka lae?” Job koʼalia kona-ba hein iha rate toʼo tempu neʼebé Maromak hanoin fali nia. Nia hatete ba Jeová: “Ita sei bolu, no haʼu sei hatán ba Ita. Ita sei hanoin ba buat neʼebé Ita halo ho Ita-nia liman.”—Jó (Ayub)14:13-15.

¹⁵ Hanoin toʼok, Jeová hakarak duni atu fó moris-hiʼas ba ema neʼebé mate ona. Ita sente kontente ka lae, atu hatene katak Jeová sente hanesan neʼe? Maibé iha futuru, sé deʼit mak sei moris hiʼas, no iha neʼebé?

16. Ema mate sei moris hiʼas iha mundu neʼebé hanesan saida?

¹⁶ Istória husi Bíblia kona-ba moris-hiʼas hatudu buat barak mai ita kona-ba moris-hiʼas iha aban-bainrua. Ema neʼebé moris hiʼas iha tempu uluk, sira moris fali iha mundu neʼe, no hasoru malu fali ho sira-nia família no belun sira. Moris-hiʼas iha aban-bainrua nian sei sai hanesan neʼe maibé diʼak liu fali. Hanesan ita aprende ona iha Kapítulu 3, Maromak hakarak mundu tomak sai hanesan jardín furak ida. Nuneʼe, ema mate sei la moris hiʼas iha mundu neʼebé nakonu ho funu, krime, no moras. Sira sei iha oportunidade atu moris kontente ba nafatin iha mundu neʼebé nakonu ho dame.

17. Sé deʼit mak sei moris hiʼas?

¹⁷ Sé deʼit mak sei moris hiʼas? Jesus hatete katak “ema hotu neʼebé iha rate laran sei rona  [Jesus nia] lian no sai husi rate”. (João 5:28, 29) No mós, eskritura iha Apokalipse 20:13 hatete: “Tasi entrega sira neʼebé mate iha nia, no mate no rate entrega sira neʼebé mate iha nia.” (Haree Apéndise, pájina 243-4.) Nuneʼe, ema rihun ba rihun neʼebé iha rate laran sei moris fali. Apóstolu Paulo hatete: “Maromak sei fó moris-hiʼas ba ema diʼak no ema aat.” (Apóstolu 24:15) Ida-neʼe katak sá?

18. Sé mak “ema diʼak” neʼebé sei moris hiʼas? Tanbasá mak esperansa neʼe importante mai ita ida-idak?

¹⁸ “Ema diʼak” inklui ema sira neʼebé ita lee iha Bíblia neʼebé moris antes Jesus mai toʼo mundu. Karik Ita hanoin-hetan kona-ba Noé, Abraão, Sara, Moisés, Rute, Ester no ema barak tan. Mane no feto sira-neʼe iha fiar neʼebé metin ba Maromak, no eskritura iha Ebreu kapítulu 11 temi kona-ba sira balu. Maibé “ema diʼak” mós inklui Maromak Jeová nia atan sira neʼebé mate ohin loron. Tanba ita-nia esperansa kona-ba moris-hiʼas, ita la taʼuk demais kona-ba mate.—Ebreu 2:15.

19. Sé mak “ema aat”? Maromak Jeová, ho laran-diʼak, fó sira oportunidade saida?

¹⁹ Oinsá ho “ema aat”, katak sira neʼebé la iha oportunidade atu halo tuir Jeová tanba sira la hatene kona-ba nia? Maromak mós sei la haluha ema rihun ba rihun neʼe. Sira sei moris hiʼas no sira sei iha oportunidade atu aprende kona-ba Maromak neʼebé loos no serbí nia. Durante tinan rihun ida, ema mate sira sei moris hiʼas iha mundu no simu oportunidade atu serbí Jeová  hamutuk ho fiar-naʼin sira. Iha tempu neʼebá sei furak tebes. Bíblia bolu tempu neʼe Loron Tesi-Lia nian. *

20. Saida mak Gehena? Sé deʼit mak bá Gehena?

²⁰ Ida-neʼe dehan katak ema hotu-hotu neʼebé mate tiha ona sei moris hiʼas ka lae? Lae. Bíblia hatete katak ema balu neʼebé mate ona mak iha “Gehena”. (Lucas 12:5) Liafuan Gehena mai husi lia-gregu. Gehena mak fatin ida iha sidade Jeruzalein antigu nia liʼur neʼebé uza atu sunu foʼer. Ema sunu foʼer no mós mate-isin iha Gehena. Sira soe ema aat nia mate-isin ba Gehena tanba sente katak ema aat sira-neʼe la merese atu hakoi no simu moris-hiʼas. Tan neʼe, Gehena reprezenta mate ba nafatin. Maski Jesus simu knaar atu tesi lia ba ema mate no ema moris, maibé Maromak Jeová mak Tesi-Lia Naʼin boot liu. (Apóstolu 10:42) Maromak Jeová sei nunka fó moris-hiʼas ba ema aat sira neʼebé lakohi troka sira-nia hahalok.

21, 22. (a) Saida mak “moris-hiʼas uluk nian”? (b) Sé mak ema primeiru neʼebé simu moris-hiʼas nuʼudar kriatura iha lalehan?

²¹ Bíblia mós koʼalia kona-ba moris-hiʼas oin ida tan. Neʼe mak moris-hiʼas nuʼudar kriatura iha lalehan. Bíblia bolu ida-neʼe “moris-hiʼas uluk nian”. (Apokalipse 20:6) Bíblia iha ezemplu ida  deʼit kona-ba moris-hiʼas ida-neʼe. Ezemplu neʼe mak Jesus Kristu, kuandu nia moris fali no saʼe ba lalehan.

²² Kuandu Jesus mai toʼo mundu nuʼudar ema ida no ema oho nia, Maromak Jeová la husik Ninia Oan neʼebé laran-metin atu hela nafatin iha rate laran. (Salmo [Mazmur] 16:10; Apóstolu 13:34, 35) Maromak halo Jesus moris hiʼas, maibé laʼós nuʼudar ema ida. Apóstolu Pedro esplika katak “ema oho [Kristu] iha isin, maibé nia moris fali ho isin espíritu nian”. (1 Pedro 3:18) Ida-neʼe mak milagre boot loos. Jesus moris fali nuʼudar anju neʼebé iha forsa boot! (1 Korinto 15:3-6) Jesus mak ema primeiru atu simu moris-hiʼas neʼebé furak neʼe. (João 3:13) Maibé ema seluk tan sei simu moris-hiʼas neʼebé hanesan.

23, 24. Sé mak Jesus nia “bibi-lubun kiʼik”? Sira hamutuk naʼin-hira?

²³ Antes Jesus saʼe ba lalehan, nia fó-hatene ba ninia dixípulu sira neʼebé laran-metin katak nia sei “prepara fatin” ba sira iha lalehan. (João 14:2) Jesus bolu sira neʼebé atu saʼe ba lalehan nuʼudar ninia “bibi-lubun kiʼik”. (Lucas 12:32) Grupu kiʼik neʼe, husi ema kristaun neʼebé fiar-metin ba Maromak, hamutuk naʼin-hira? Tuir eskritura iha Apokalipse 14:1, apóstolu João hatete: “Haʼu haree Bibi-Oan [Jesus Kristu] hamriik iha Foho Siaun nia leten hamutuk ho ema naʼin-144.000, no iha sira-nia reen-toos hakerek tiha Bibi-Oan nia naran no ninia Aman nia naran.”

 ²⁴ Ema kristaun naʼin-144.000, neʼebé inklui mós Jesus nia apóstolu sira neʼebé laran-metin ba nia, sei moris hiʼas atu bá lalehan. Bainhira mak sira moris hiʼas? Apóstolu Paulo hakerek katak sira sei moris hiʼas atu bá lalehan durante tempu neʼebé Kristu toʼo ona mai no ukun iha lalehan. (1 Korinto 15:23) Hanesan ita sei aprende iha Kapítulu 9, agora ita moris ona iha tempu neʼe. Tan neʼe, ema restu husi ema naʼin-144.000 neʼebé mate ohin loron, moris hiʼas kedas iha lalehan. (1 Korinto 15:51-55) Maibé, ema barak liu neʼebé mate ona sei moris hiʼas iha futuru, no sira sei moris iha mundu Paraízu.

25. Ita sei aprende kona-ba saida iha kapítulu tuirmai?

²⁵ Sin, Maromak Jeová sei manán hasoru mate, no nia sei halakon ba nafatin inimigu neʼe! (Apokalipse 21:4) Maibé, karik Ita hanoin: ‘Ema sira neʼebé bá lalehan sei halo saida iha neʼebá?’ Sira sei sai parte iha Maromak nia Ukun, ka governu iha lalehan. Ita sei aprende tan kona-ba governu ida-neʼe iha kapítulu tuirmai.