1, 2. Ohin loron, iha neʼebé mak ita bele hetan mahon?

HANOIN toʼok Ita laʼo iha dalan. Anin huu makaʼas no kalohan sai nakukun tebes. Rai lakan no tarutu, no ikusmai udan tau makaʼas. Ita laʼo lalais atu buka mahon. Derrepente, besik dalan ninin Ita haree mahon ida neʼebé Ita bele tama. Fatin neʼe seguru no bele proteje Ita husi anin no udan. Ida-neʼe halo Ita sente kontente tebes, loos ka lae?

² Ohin loron ita moris iha tempu hanesan, neʼebé nakonu ho susar. Iha mundu neʼe, buat aat neʼebé akontese sai aat liután. Maibé iha mahon neʼebé bele proteje ita. Neʼe mak saida? Haree toʼok saida mak Bíblia hatete: “Haʼu sei dehan ba Maromak Jeová: ‘Ita mak haʼu-nia mahon no haʼu-nia abrigu, haʼu-nia Maromak neʼebé haʼu fiar.’”—Salmo (Mazmur) 91:2.

3. Oinsá mak ita bele halo Maromak Jeová sai ita-nia mahon?

 ³ Loos duni! Maromak Jeová, ita-nia Kriadór no Ukun-Naʼin neʼebé boot liu, nia mak bele sai ita-nia mahon neʼebé seguru. Maromak Jeová iha forsa boot liu hotu, tan neʼe nia bele proteje ita husi buat aat hotu neʼebé akontese ba ita. Maski agora buat aat akontese mai ita, nia sei halakon buat sira-neʼe iha futuru. Oinsá mak ita bele halo Maromak Jeová sai ita-nia mahon? Ita tenke tau fiar ba nia. No mós, Maromak nia Liafuan hatete ba ita: “Hela nafatin iha Maromak nia domin.” (Judas 21) Tan neʼe, ita presiza atu hela nafatin iha Maromak nia domin hodi haburas ita-nia domin ba ita-nia Aman iha lalehan. Hanesan neʼe ita bele fiar katak Maromak mak ita-nia mahon. Maibé oinsá mak ita bele haburas ita-nia domin ba Maromak?

4, 5. Iha dalan saida deʼit mak Maromak Jeová hatudu ona ninia domin ba ita?

⁴ Atu hela nafatin iha Maromak nia domin, ita tenke komprende oinsá mak Maromak Jeová hatudu ona nia domin mai ita. Hanoin kona-ba Bíblia nia hanorin neʼebé ita aprende ona husi livru ida-neʼe. Maromak Jeová, ita-nia Kriadór halo mundu sai ita-nia hela-fatin neʼebé furak. Mundu neʼe nakonu ho hahán barak no bee, animál oioin, rikusoin hanesan mina-rai, osan-mean, osan-mutin, no buat seluseluk tan. No mós liuhusi Bíblia, Maromak fó-hatene ita kona-ba nia naran no nia hahalok sira. Bíblia mós fó-hatene katak Maromak haruka nia Oan-Mane Jesus neʼebé nia hadomi toʼo mundu, no husik nia hetan terus no mate tan ita. (João 3:16) Prezente ida-neʼe katak sá mai ita? Ida-neʼe katak ita iha esperansa kapás kona-ba futuru.

 ⁵ Maromak mós halo buat ida tan atu ita bele iha esperansa neʼe. Maromak Jeová harii ona governu ida iha lalehan, neʼe mak Mesias nia Ukun. Lakleur tan Ukun neʼe sei halakon terus hotu no halo mundu tomak sai paraízu, ka jardín furak. Hanoin toʼok! Ita bele moris iha paraízu ho dame no haksolok ba nafatin. (Salmo [Mazmur] 37:29) Maibé molok buat hirak-neʼe mosu, ohin loron mós ita bele moris haksolok tanba Maromak fó matadalan mai ita. Prezente seluk tan neʼebé Maromak fó mai ita mak oportunidade atu koʼalia nakloke ba nia iha orasaun. Neʼe mak buat balu deʼit neʼebé Maromak Jeová halo ona atu hatudu ninia domin ba Ita ida-idak no mós ba ema hotu.

6. Oinsá mak Ita hafolin Maromak Jeová nia domin?

⁶ Pergunta importante neʼebé Ita tenke husu ba Ita-nia an mak neʼe: ‘Saida mak haʼu sei halo atu hafolin Maromak Jeová nia domin?’ Ema barak dehan: ‘Haʼu tenke hadomi fali Maromak Jeová.’ Ita mós sente hanesan neʼe ka lae? Jesus hatete katak ukun-fuan neʼebé boot liu hotu mak: “Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.” (Mateus 22:37) Loos, Ita iha duni razaun barak atu hadomi Maromak Jeová. Maibé sente deʼit Ita iha domin ba Maromak Jeová toʼo ona atu hatudu katak Ita hadomi nia ho laran, moris, no neon tomak ka lae?

7. Sente deʼit katak iha domin ba Maromak, ida-neʼe toʼo ona ka lae? Esplika toʼok.

⁷ Tuir Bíblia, domin ba Maromak laʼós buat neʼebé  Ita sente deʼit. Maski importante duni atu sente katak Ita iha domin ba Maromak Jeová, maibé tuir loloos Ita foin hahú atu iha domin neʼebé loos ba nia. Ita hatene katak masán nia musan mak importante duni atu iha ai-hun masán nian neʼebé buras no fó fuan barak. Maibé se Ita hakarak han masán, Ita kontente ka lae, se ema ida fó deʼit masán nia musan ba Ita? Lae duni! Nuneʼe mós sente domin ba Maromak Jeová, ida-neʼe katak Ita foin hahú atu iha domin neʼebé loos ba nia. Bíblia hatete: “Basá domin ba Maromak katak ita halo tuir ninia ukun-fuan sira; no ninia ukun-fuan sira la todan.” (1 João 5:3) Ita-nia domin neʼebé loos ba Maromak sei fó fuan diʼak hodi hatudu husi ita-nia hahalok.—Mateus 7:16-20.

8, 9. Oinsá mak ita hatudu domin ba Maromak no hafolin buat neʼebé nia halo tiha ona mai ita?

⁸ Ita hatudu ita-nia domin ba Maromak hodi halo tuir ninia ukun-fuan no matadalan. La susar atu halo  nuneʼe. Maromak Jeová nia ukun-fuan sira laʼós atu hatodan ita, maibé ajuda ita atubele moris kontente. (Isaías [Yesaya] 48:17, 18) Hodi moris tuir Maromak Jeová nia matadalan, ita bele hatudu katak ita hafolin duni buat hotu neʼebé ita-nia Aman iha lalehan halo tiha ona mai ita. Maibé triste tebes tanba ohin loron ema barak la hatudu hahalok hanesan neʼe. Ita lakohi sai hanesan ema balu iha Jesus nia tempu neʼebé la hatene fó-agradese. Jesus fó isin-diʼak ba ema naʼin-sanulu neʼebé moras-lepra, maibé ema ida deʼit mak fila fali atu fó obrigadu ba Jesus. (Lucas 17:12-17) Loos, ita hakarak sai hanesan ema ida-neʼebé hatene fó-agradese, laʼós hanesan ema naʼin-sia neʼebé la hatene fó-agradese!

⁹ Entaun, Maromak Jeová nia ukun-fuan saida deʼit mak ita tenke halo tuir? Iha livru neʼe ita koʼalia tiha ona kona-ba ukun-fuan oioin, maibé mai ita hanoin filafali balun deʼit. Halo tuir ukun-fuan sira-neʼe sei ajuda ita atu hela nafatin iha Maromak nia domin.

10. Tansá mak importante atu aprende nafatin kona-ba Maromak Jeová?

¹⁰ Atu hakbesik liután ba Maromak Jeová, importante liu atu aprende kona-ba nia no kontinua halo ida-neʼe. Se Ita haneruk ahi iha rai neʼebé malirin tebes iha kalan, Ita sei husik deʼit ahi neʼe mate ka lae? Lae. Ita sei aumenta ai atu ahi lakan nafatin. Hanesan ai neʼebé halo ahi lakan nafatin, nuneʼe mós “matenek husi Maromak” sei haburas nafatin ita-nia domin ba Maromak Jeová.—Provérbios (Amsal) 2:1-5.

11. Dixípulu sira sente oinsá kona-ba Jesus nia hanorin?

¹¹ Jesus hakarak atu ninia dixípulu sira-nia domin  ba Maromak Jeová no Maromak nia Liafuan moris no buras nafatin. Bainhira Jesus moris fali, nia hanorin ninia dixípulu naʼin-rua kona-ba profeta sira-nia liafuan balu neʼebé sai loos iha nia. Dixípulu sira sente oinsá? Sira dehan ba malu: “Ita sente laran-manas tebes kuandu nia koʼalia ba ita tuir dalan no kuandu nia esplika Eskritura sira ba ita ho klaru, loos ka lae?”—Lucas 24:32.

12, 13. (a) Ohin loron, saida mak akontese ba ema barak nia domin ba Maromak no nia Liafuan? (b) Atu ita-nia domin la sai malirin, saida mak ita tenke halo?

¹² Bainhira Ita foin aprende kona-ba saida mak Bíblia loloos hanorin, Ita sai laran-manas, kontente, no hadomi Maromak, loos ka lae? Ita hotu sente hanesan neʼe duni. Maibé, atu hametin no haburas nafatin ita-nia domin ba Maromak, ita presiza hakaʼas an. Ita lakohi sai hanesan ema barak iha mundu neʼe, neʼebé Jesus fó-hatene nanis: “Ema barak nia domin sei sai malirin.” (Mateus 24:12) Entaun, atu ita-nia domin ba Maromak Jeová no lia-loos husi Bíblia la sai malirin, saida mak Ita tenke halo?

¹³ Kontinua atu buka-hatene didiʼak kona-ba Maromak Jeová no Jesus Kristu. (João 17:3) Hanoin kleʼan kona-ba buat neʼebé ita aprende husi Maromak nia Liafuan. Husu Ita-nia an: ‘Husi eskritura ida-neʼe, saida mak haʼu aprende kona-ba Maromak Jeová? Oinsá mak eskritura ida-neʼe ajuda haʼu atu hadomi nia ho haʼu-nia moris, neon no laran tomak?’ (1 Timóteo 4:15) Kuandu Ita hanoin kleʼan hanesan neʼe, Ita-nia domin ba Maromak Jeová sei buras nafatin.

14. Oinsá mak orasaun bele ajuda ita-nia domin ba Maromak Jeová metin nafatin?

¹⁴ Buat ida tan neʼebé bele ajuda Ita haburas nafatin  Ita-nia domin ba Maromak Jeová mak halo orasaun beibeik. (1 Tesalónika 5:17) Iha Kapítulu 17 iha livru neʼe, ita aprende katak orasaun mak prezente neʼebé folin-boot husi Maromak. Atu iha nafatin relasaun neʼebé besik ho ema ida, ita presiza koʼalia beibeik ho nia. Nuneʼe mós, atu iha relasaun neʼebé besik nafatin ho Maromak Jeová, ita presiza koʼalia beibeik ho nia iha orasaun. Neʼe laʼós katak ita dekór, ka repete deʼit ita-nia orasaun, maibé halo orasaun ho laran tomak. Ita bele koʼalia ba Maromak Jeová hanesan oan ida koʼalia ba nia aman neʼebé nia hadomi. Klaru katak ita hakarak hatudu respeitu, maibé ita mós bele fó-hatene ba Maromak saida deʼit mak iha ita-nia hanoin no ita-nia laran. (Salmo [Mazmur] 62:8) Sin, estuda Bíblia rasik no halo orasaun mak parte importante iha ita-nia adorasaun ba Maromak no bele ajuda ita hela nafatin iha Maromak nia domin.

15, 16. Tanbasá serbisu haklaken kona-ba Maromak nia Ukun mak knaar neʼebé importante tebes no hanesan rikusoin?

¹⁵ Estuda Bíblia rasik no halo orasaun mak parte iha ita-nia adorasaun neʼebé ita bele halo mesak. Maibé, parte ida tan husi ita-nia adorasaun ba Maromak mak atu koʼalia kona-ba ita-nia fiar ba ema seluk. Ita halo ona ida-neʼe ka lae? Se halo ona, ita halaʼo knaar espesiál neʼebé Maromak haraik ba ita. (Lucas 1:74) Bainhira ita koʼalia lia-loos kona-ba Maromak Jeová, ita halaʼo knaar importante tebes neʼebé nia haraik ba ema kristaun hotu neʼebé loos, neʼe mak haklaken liafuan diʼak kona-ba Maromak nia Ukun.—Mateus 24:14; 28:19, 20.

¹⁶ Apóstolu Paulo hafolin loos nia knaar no bolu  ida-neʼe hanesan rikusoin. (2 Korinto 4:7) Koʼalia ba ema seluk kona-ba Maromak Jeová no buat neʼebé nia sei halo mak knaar neʼebé diʼak liu. Ita serbí ba Patraun neʼebé diʼak liu, no simu kolen neʼebé diʼak liu. Hodi hola parte iha serbisu neʼe, ita ajuda ema neʼebé laran-moos atu hakbesik ba ita-nia Aman iha lalehan no atu laʼo iha dalan neʼebé lori sira ba moris rohan-laek! Tuir Ita-nia hanoin, iha ka lae, serbisu ida neʼebé diʼak liu fali ida-neʼe? La iha. No mós, fó sasin kona-ba Maromak Jeová no nia Liafuan sei aumenta liután ita-nia fiar no hametin ita-nia domin ba nia. Maromak Jeová mós hafolin serbisu neʼebé ita halo ba nia. (Ebreu 6:10) Hodi halaʼo serbisu neʼe ho badinas sei ajuda ita atu hela nafatin iha Maromak nia domin.—1 Korinto 15:58.

17. Tanbasá mak ema kristaun sira tenke halaʼo serbisu haklaken ho laran-manas?

¹⁷ Importante tebes atu hanoin-hetan katak agora mak tempu ba ita atu haklaken Maromak nia Ukun ho laran-manas. Bíblia hatete: “Haklaken Maromak nia liafuan ho laran-manas.” (2 Timóteo 4:2) Tanbasá mak ita tenke halo ida-neʼe? Tanba Maromak nia Liafuan hatete: “Maromak Jeová nia loron boot besik ona. Loron neʼe besik ona, no mai lalais loos.” (Sofonias [Zefanya] 1:14) Sin, tempu besik ona atu Maromak Jeová halakon mundu aat neʼe. Ita tenke fó avizu ba ema! Sira presiza hatene katak agora mak tempu atu hili Maromak Jeová nuʼudar sira-nia Ukun-Naʼin. Mundu aat neʼe nia rohan “sei la tarde”.—Habacuque (Habakuk) 2:3.

18. Tanbasá mak ita tenke halibur hamutuk ho maluk kristaun sira neʼebé loos atu adora Maromak Jeová?

¹⁸ Maromak Jeová hakarak ita atu adora nia hodi  halibur hamutuk ho maluk kristaun sira neʼebé loos. Tan neʼe mak ninia Liafuan hatete: “Mai ita hanoin malu hodi ajuda malu atu hatudu domin no hahalok diʼak, no maski ema balu sai toman atu la halibur  hamutuk, maibé imi keta haluha atu halibur an hamutuk, no fó laran-manas ba malu, liuliu nuʼudar imi haree loron neʼe besik ona mai.” (Ebreu 10:24, 25) Bainhira ita tuir reuniaun hamutuk ho maluk kristaun sira, ita iha oportunidade neʼebé furak atu hahiʼi no adora Maromak neʼebé ita hadomi. Ita mós bele hametin ita-nia maluk nia fiar no fó laran-manas ba malu.

19. Oinsá mak ita bele hametin ita-nia domin ba maluk kristaun iha kongregasaun?

¹⁹ Bainhira ita halibur hamutuk iha kongregasaun atu adora Maromak Jeová, ita sei hametin ita-nia domin no ita-nia relasaun ho maluk kristaun. Importante atu hanoin deʼit hahalok diʼak husi ita-nia maluk kristaun sira, hanesan mós Maromak Jeová haree ita-nia hahalok diʼak. Ita labele hanoin katak ita-nia maluk sira sei nunka halo sala. Ita hotu sala-naʼin. Iha kongregasaun ita hotu la hanesan, tanba balun kleur ona, no balun foin komesa atu serbí Maromak Jeová. (Koloso 3:13) Hakaʼas an atu habelun ho sira neʼebé hadomi tebes Maromak Jeová tanba halo ida-neʼe bele ajuda ita laʼo ba oin iha lia-loos. Sin, adora Maromak Jeová hamutuk ho maluk kristaun iha kongregasaun sei ajuda Ita atu hela nafatin iha Maromak nia domin. Bensaun saida deʼit mak Maromak Jeová sei haraik ba sira neʼebé ho laran-metin adora nia no hela nafatin iha nia domin?

20, 21. Saida mak “moris neʼebé loloos”? Tanbasá mak ida-neʼe esperansa neʼebé furak tebes?

²⁰ Iha futuru, Maromak Jeová sei fó prezente ba nia atan sira neʼebé laran-metin ba nia. Prezente neʼe mak  moris. Maibé moris hanesan saida? Agora ita moris daudaun tanba ita dada-iis, han, no hemu loos ka lae? No mós bainhira ita laran-kontente tebes, karik ita hatete: “Neʼe mak dehan moris!” Maibé tuir Bíblia, ohin loron la iha ema ida neʼebé moris loloos.

²¹ Maromak nia liafuan fó laran-manas mai ita atu hakaʼas an “kaer metin ba moris neʼebé loloos”. (1 Timóteo 6:19) Ida-neʼe hatudu katak moris neʼebé loloos mak buat neʼebé ita hakarak atu hetan iha futuru. Sin, bainhira ita sai perfeitu ona mak ita hetan moris neʼebé loloos, katak moris neʼebé tuir Maromak nia hakarak ba Adão no Eva. Kuandu ita iha saúde diʼak, moris ho dame no haksolok iha mundu foun mak ita foin goza “moris neʼebé loloos”, neʼe katak moris rohan-laek. (1 Timóteo 6:12) Ida-neʼe mak esperansa neʼebé furak tebes, loos ka lae?

22. Oinsá mak Ita bele “kaer metin ba moris neʼebé loloos”?

²² Oinsá mak ita bele “kaer metin ba moris neʼebé loloos”? Apóstolu Paulo hatete ba ema kristaun sira atu “halo hahalok diʼak” no “sai riku ho hahalok loos”. (1 Timóteo 6:18) Ida-neʼe hatudu katak ita tenke halaʼo moris tuir lia-loos neʼebé ita aprende husi Bíblia. Maibé apóstolu Paulo dehan katak hatudu hahalok diʼak bele manán “moris neʼebé loloos” ka lae? Lae. Tuir loloos, ita bele hetan esperansa neʼe tanba Maromak hatudu ninia “laran-diʼak neʼebé boot” mai ita. (Roma 5:15) Maski nuneʼe, Maromak Jeová hakarak duni fó bensaun ba sira neʼebé serbí nia ho laran-metin. Nia hakarak haree ita halaʼo “moris neʼebé loloos”. Sira neʼebé hela nafatin iha Maromak nia domin sei hetan moris rohan-laek iha futuru neʼebé nakonu ho dame no ksolok.

23. Tanbasá mak importante atu ita hela nafatin iha Maromak nia domin?

 ²³ Ita ida-idak tenke husu ba ita-nia an: ‘Haʼu adora Maromak tuir dalan neʼebé nia hatete iha Bíblia ka lae?’ Se loroloron ita hatán sin, ita laʼo iha dalan neʼebé loos. Ita bele fiar katak Maromak Jeová mak ita-nia mahon. Maromak proteje ninia atan sira neʼebé serbí nia ho laran-metin durante tempu susar iha mundu aat neʼe. Maromak Jeová mós sei lori ita tama iha mundu foun neʼebé besik ona atu mai. Ita sei haksolok tebes bainhira ida-neʼe akontese duni! Iha tempu neʼebá ita sei kontente loos tanba ita hili ona atu adora Jeová iha loron ikus sira-neʼe. Se agora ita hili atu adora Maromak Jeová, ita sei goza ba nafatin “moris neʼebé loloos”, tuir buat neʼebé Maromak hakarak nanis ba ema!