LORON-BOOT ka loron santu neʼebé ohin loron ema selebra iha rai barak la mai husi Bíblia. Se nuneʼe, loron-boot sira-nia hun mai husi neʼebé? Iha livru barak neʼebé esplika kona-ba loron-boot sira neʼebé ema selebra iha mundu. Mai ita haree ezemplu balu.

Páskua. Ema barak selebra Páskua tanba sira hanoin katak neʼe mak dalan loos atu komemora Jesus nia mate no moris-hiʼas. Maibé, buat barak neʼebé ema halo iha selebrasaun  Páskua mai husi ema jentiu, hanesan la han naʼan, la halo serbisu todan no kostume seluseluk tan.

Selebrasaun Tinan Foun nian. Data no kostume kona-ba selebrasaun Tinan Foun nian iha rai oioin la hanesan. Kona-ba Tinan Foun, The World Book Encyclopedia hatete: “Iha tinan 46 molok Kristu, Liurai Roma nian naran Júlio fó sai katak loron 1 iha fulan-Janeiru mak Loron Tinan Foun. Ema Roma sira dedika loron neʼe ba Jano nuʼudar maromak portaun no odamatan nian, no maromak hun nian. Sira hanaran fulan-Janeiru husi Jano, maromak ho oin rua, ida hateke ba oin, no ida seluk hateke ba kotuk.” Nuneʼe, selebrasaun Tinan Foun nian mai husi jentiu sira-nia tradisaun.

Halloween. Kona-ba selebrasaun ida-neʼe, neʼebé atu besik hanesan ho selebrasaun Loron Matebian nian, The Encyclopedia Americana hatete: “Kostume sira neʼebé iha relasaun ho Halloween mai husi serimónia druida [ema selta ka ema Europa klaran sira-nia amlulik iha tempu antigu] nian iha tempu molok kristaun. Ema selta sira selebra festa ba maromak rua neʼebé boot liu, maromak loro-matan nian no maromak matebian nian . . . no sira selebra festa ba maromak sira-neʼe iha loron 1 iha fulan-Novembru, ema selta sira-nia Tinan Foun. Neineik-neineik, festa matebian nian sai parte iha serimónia kristaun nian.”

Loron-boot seluseluk. Iha neʼe, la temi hotu loron-boot neʼebé ema selebra iha mundu tomak. Maibé, Maromak Jeová la simu selebrasaun atu hahiʼi ema ka ema nia organizasaun ruma. (Jeremias [Yeremia] 17:5-7; Apóstolu 10:25, 26) No mós, atu hatene Maromak nia hanoin kona-ba selebrasaun relijiaun nian ruma, importante atu buka-hatene selebrasaun neʼe nia hun. (Isaías [Yesaya] 52:11; Apokalipse 18:4) Matadalan sira husi Bíblia neʼebé temi iha Kapítulu 16 husi livru neʼe, bele ajuda ita atu hatene Maromak nia hanoin kuandu ita hola parte iha loron-boot neʼebé laʼós relijiaun nian.