JESUS KRISTU fó mandamentu ba ema kristaun sira atu selebra, ka komemora, loron neʼebé nia mate. Selebrasaun neʼe mós bolu “Naʼi nia han-kalan”. (1 Korinto 11:20) Tansá mak selebrasaun neʼe importante tebetebes? Bainhira mak ita selebra ida-neʼe, no oinsá?

 Jesus Kristu halo selebrasaun neʼe ba dala primeiru iha kalan neʼebé ema judeu sira selebra Festa Salvasaun nian (ka Páskua Izraél nian) iha tinan 33. Selebrasaun neʼe sira halo tinan ida dala ida deʼit, iha loron 14 Nisan tuir ema judeu sira-nia kalendáriu. Fulan-Nisan komesa kuandu sira foin haree fulan lotuk depois semana primeiru iha fulan-Marsu. Liutiha loron 14, kuandu loro-matan tun tiha, sira selebra Festa Salvasaun nian.

Jesus selebra Festa Salvasaun nian hamutuk ho nia apóstolu sira, no kuandu sira selebra tiha festa neʼe, nia haruka Judas Iscariotes sai. Depois neʼe, Jesus hahú Naʼi nia Han-Kalan. Ida-neʼe troka selebrasaun ema judeu nian neʼebé bolu nuʼudar Festa Salvasaun nian, tan neʼe, ita mós selebra Naʼi nia Han-Kalan tinan ida dala ida.

Evanjellu Mateus hakerek: “Nuʼudar sira han hela, Jesus foti paun ida, no depois husu tiha bensaun, nia silu hodi fó ba ninia dixípulu sira no dehan: ‘Simu no han bá. Neʼe reprezenta haʼu-nia isin.’ No mós, nia foti kopu ida, no depois fó tiha agradese ba Maromak, nia fó ba sira no dehan: ‘Imi hotu, hemu bá. Tanba ida-neʼe reprezenta haʼu-nia “raan aliansa nian”, neʼebé sei fakar atu ema barak hetan perdua husi sala.’”—Mateus 26:26-28.

Ema balu hanoin katak Jesus halo paun sai ninia isin rasik no halo tua-uvas nakfila ba nia raan. Maibé, kuandu Jesus fahe paun neʼe, Jesus nia isin sei tomak hela. Jesus nia apóstolu sira han duni Jesus nia isin rasik no hemu duni nia raan ka lae? Lae. Se sira han duni Jesus nia isin karik, neʼe katak sira han ema, no ida-neʼe kontra Maromak nia ukun-fuan. (Gênesis [Kejadian] 9:3, 4; Levítico [Imamat] 17:10) Tuir Lucas 22:20, Jesus hatete: “Kopu neʼe reprezenta aliansa foun liuhusi haʼu-nia raan, neʼebé sei fakar tanba imi.” Kopu neʼe sai “aliansa foun” duni ka lae? Lae, tanba aliansa mak hanesan promesa, laʼós buat ida neʼebé ita-nia liman bele kaer.

 Tan neʼe, paun no tua-uvas mak nuʼudar símbolu deʼit. Paun reprezenta Kristu nia isin neʼebé la iha sala. Jesus uza paun neʼebé resin husi Festa Salvasaun nian. Paun neʼe la iha fermentu. (Êxodo [Keluaran] 12:8) Iha Bíblia, dala barak fermentu reprezenta sala ka buat neʼebé aat. Tan neʼe, paun neʼebé la iha fermentu reprezenta isin perfeitu neʼebé Jesus entrega nuʼudar sakrifísiu. Jesus nia isin la iha sala ida.—Mateus 16:11, 12; 1 Korinto 5:6, 7; 1 Pedro 2:22; 1 João 2:1, 2.

Tua-uvas mean neʼe reprezenta Jesus nia raan. Hodi fakar raan neʼe mak bele halaʼo aliansa foun. Jesus hatete katak nia raan sei nakfakar atu ema bele “hetan perdua husi sala”. Ida-neʼe loke dalan ba ema atu sai moos iha Maromak nia oin no hola parte iha aliansa foun ho Maromak Jeová. (Ebreu 9:14; 10:16, 17) Aliansa, ka kontratu neʼe halo ema kristaun naʼin-144.000 bele bá lalehan. Iha neʼebá, sira sei halaʼo knaar nuʼudar liurai no amlulik atu haraik bensaun ba ema hotu.—Gênesis (Kejadian) 22:18; Jeremias (Yeremia) 31:31-33; 1 Pedro 2:9; Apokalipse 5:9, 10; 14:1-3.

Sé deʼit mak sei han paun no hemu tua-uvas iha loron atu komemora Kristu nia mate? Ema sira neʼebé tama iha aliansa foun deʼit, katak sira neʼebé iha esperansa atu bá lalehan, sira mak sei han paun no hemu tua-uvas. Maromak nia espíritu santu mak fó sasin ba sira katak Maromak hili tiha ona sira atu sai liurai iha lalehan. (Roma 8:16) Sira mós hola parte iha aliansa Ukun nian hamutuk ho Jesus.—Lucas 22:29.

Oinsá ho ema neʼebé iha esperansa atu moris ba nafatin iha mundu foun? Sira mós halo tuir Jesus nia mandamentu no selebra Naʼi nia Han-Kalan, maibé sira la han paun no mós la hemu tua-uvas neʼe. Tinan ida dala ida iha loron 14 Nisan, depois loro-matan tun, Testemuña ba Jeová iha mundu tomak selebra Naʼi nia  Han-Kalan. Maski ema uitoan deʼit mak dehan sai katak sira iha esperansa atu bá lalehan, selebrasaun neʼe importante tebes ba ema hotu neʼebé halo tuir Kristu. Selebrasaun neʼe halo ita hotu hanoin filafali kona-ba domin boot neʼebé Maromak Jeová no Jesus Kristu hatudu mai ita.—João 3:16.