APÉNDISE
Sé mak arkanju Miguel?
BÍBLIA la koʼalia dala barak kona-ba anju ida naran Miguel. Maibé, kuandu Bíblia temi kona-ba nia, nia sempre halo buat ruma. Iha livru Daniel, Miguel funu hasoru anju sira neʼebé aat, iha karta Judas, nia haksesuk malu ho Satanás, no iha Apokalipse, nia halo funu hasoru Diabu no anju aat sira. Miguel moris tuir nia naran tanba nia defende Maromak Jeová nia pozisaun nuʼudar ukun-naʼin no luta hasoru Maromak nia inimigu sira. Naran Miguel katak: “Sé mak hanesan Maromak?” Maibé, sé mak Miguel neʼe?
Dala ruma, ema iha naran rua. Porezemplu, Jacob iha naran seluk Izraél, no apóstolu Pedro mós ema bolu Simão. (Gênesis [Kejadian] 49:1, 2; Mateus 10:2) Hanesan neʼe mós, Bíblia hatudu katak Miguel mak naran ida seluk ba Jesus Kristu, antes no depois nia moris iha mundu. Mai ita haree razaun balu husi Bíblia atu komprende loloos kona-ba ida-neʼe.
Arkanju. Maromak nia Liafuan bolu Miguel nuʼudar “arkanju”. (Judas 9) Liafuan ida-neʼe katak “anju sira-nia ulun-naʼin”. Liafuan “arkanju” nunka mosu iha Bíblia nuʼudar “arkanju sira”. Ida-neʼe hatudu katak iha arkanju ida deʼit, naran Miguel. No Bíblia ajuda ita atu hatene katak Jesus mak halaʼo knaar nuʼudar arkanju. Iha 1 Tesalónika 4:16, koʼalia kona-ba Naʼi Jesus Kristu neʼebé moris hiʼas ona, dehan: “Naʼi rasik sei tun husi lalehan no nia sei bolu makaʼas ho lian arkanju nian.” Iha neʼe hatudu katak Jesus nia lian mak arkanju nian. Eskritura ida-neʼe ajuda ita atu hatene katak Jesus rasik mak arkanju Miguel.
Tropa nia ulun-naʼin. Bíblia hatete katak “Miguel no ninia anju sira halo funu ho samea boot . . . no ninia anju sira”. (Apokalipse 12:7) Neʼe katak Miguel iha knaar nuʼudar Ulun-Naʼin ba tropa husi anju sira neʼebé laran-metin ba Maromak. Apokalipse esplika mós Jesus nuʼudar Ulun-Naʼin ba tropa anju sira-nian. (Apokalipse 19:14-16) Apóstolu Paulo mós hakerek kona-ba “Jesus mosu mai husi lalehan hamutuk ho ninia anju sira”. (2 Tesalónika 1:7) Nuneʼe, Bíblia hatete kona-ba Miguel ho “ninia anju sira” no mós kona-ba Jesus ho “ninia anju sira”. (Mateus 13:41; 16:27; 24:31; 1 Pedro 3:22) Maibé, Maromak nia Liafuan nunka hatudu katak iha tropa rua husi anju sira neʼebé serbí Maromak iha lalehan. Tan neʼe, ita bele hatene katak Miguel mak Jesus Kristu. *
^ par. 4 Ita bele hetan informasaun liután neʼebé hatudu katak Miguel mak naran seluk ba Maromak nia Oan, Jesus, iha livru Pemahaman Alkitab, Jilid 2, pájina 126-7. Livru neʼe husi Testemuña ba Jeová, no iha mós iha lia-portugés.
