1. Buat neʼebé Ita aprende ona husi livru neʼe book Ita atu husu pergunta saida?

ITA aprende ona lia-loos barak husi Bíblia hodi estuda livru ida-neʼe, hanesan Maromak nia promesa kona-ba moris rohan-laek, ema mate nia kondisaun no esperansa moris-hiʼas. (Eclesiastes 9:5; Lucas 23:43; João 5:28, 29; Apokalipse 21:3, 4) Karik Ita mós asiste ona reuniaun husi Testemuña ba Jeová no fiar katak sira halaʼo adorasaun neʼebé loos. (João 13:35) Ita mós komesa iha relasaun diʼak ho Jeová, no deside katak Ita hakarak  serbí nia. Se nuneʼe, karik Ita hanoin: ‘Saida mak haʼu tenke halo agora atu serbí Maromak?’

2. Tanbasá mak mane Etiópia ida hakarak atu hetan batizmu?

² Iha tempu uluk, mane ida husi rai-Etiópia mós hanoin hanesan neʼe. Liutiha tempu balu depois Jesus moris hiʼas, ninia dixípulu Filipe haklaken ba mane neʼe. Filipe hatudu ba nia katak Jesus mak Mesias. Buat neʼebé mane Etiópia neʼe aprende book ninia laran, no nia hatete: “Haree bá! Bee-lihun mak neʼe! Saida mak hanetik haʼu atu hetan batizmu?”​—Apóstolu 8:26-36.

3. (a) Jesus fó mandamentu saida ba ninia dixípulu sira? (b) Batizmu tenkesér halo oinsá?

³ Bíblia hanorin ho klaru katak, se Ita hakarak atu serbí Maromak, Ita presiza hetan batizmu. Jesus hatete ba ninia dixípulu sira: “Hanorin ema husi nasaun hotu atu sai haʼu-nia dixípulu, fó batizmu ba sira.” (Mateus 28:19) Jesus rasik mós hetan batizmu. Bainhira nia hetan batizmu, ema la fui deʼit bee ba ninia ulun, maibé hatama ninia isin-lolon tomak ba bee laran. (Mateus 3:16) Ohin loron, bainhira ema Kristaun ida hetan batizmu, ninia isin-lolon tomak tenke hatama ba bee laran.

4. Batizmu hatudu saida ba ema seluk?

⁴ Bainhira Ita hetan batizmu, neʼe hatudu ba ema seluk katak Ita hakarak duni atu sai Maromak nia belun no halo tuir nia. (Salmo 40:7, 8) Tan neʼe karik Ita husu: ‘Haʼu presiza halo saida atu hetan batizmu?’

5. (a) Antes hetan batizmu, Ita tenke halo saida? (b) Tanbasá mak importante atu tuir reuniaun Kristaun sira?

⁵ Antes hetan batizmu, Ita tenke hatene Maromak Jeová no Jesus. Ita komesa ona halo ida-neʼe hodi estuda  Bíblia. (Lee João 17:3.) Maibé neʼe seidauk toʼo. Bíblia hatete katak Ita tenke hetan “koñesimentu neʼebé loos” kona-ba Jeová nia hakarak. (Koloso 1:9) Reuniaun sira husi Testemuña ba Jeová sei ajuda Ita atu iha relasaun neʼebé besik liután ho Jeová. Neʼe mak razaun importante ida tanbasá Ita presiza tuir reuniaun beibeik.​—Ebreu 10:24, 25.

6. Atu bele hetan batizmu, ita presiza hatene saida kona-ba Bíblia?

⁶ Jeová la hein katak Ita hatene buat hotu iha Bíblia mak foin bele hetan batizmu. Nia la hanoin katak mane Etiópia neʼe tenkesér hatene buat hotu antes hetan batizmu. (Apóstolu 8:30, 31) Tuir loloos, ita hotu sei kontinua aprende kona-ba Maromak ba nafatin. (Eclesiastes 3:11) Maibé atu hetan batizmu, ita presiza hatene no simu ona hanorin báziku husi Bíblia.​—Ebreu 5:12.

7. Oinsá mak estuda Bíblia ajuda ona Ita rasik?

⁷ Bíblia hatete: “Se ita la iha fiar, ita labele halo Maromak kontente.” (Ebreu 11:6) Tan neʼe, Ita presiza iha fiar atu bele hetan batizmu. Bíblia fó-hatene ita katak ema balu iha sidade Korinto iha tempu uluk rona Jesus nia dixípulu sira-nia hanorin, no rezultadu mak sira “hahú sai fiar-naʼin no hetan batizmu”. (Apóstolu 18:8) Hanesan neʼe mós ho Ita. Estuda Bíblia ajuda Ita atu iha fiar ba Maromak nia promesa sira no Jesus nia sakrifísiu neʼebé bele salva ita husi sala no mate.​—Josué 23:14; Apóstolu 4:12; 2 Timóteo 3:16, 17.

8. Saida mak sei book Ita atu fó-hatene ema seluk kona-ba buat neʼebé Ita aprende?

⁸ Kuandu Ita aprende liután husi Bíblia no haree rasik oinsá mak Bíblia ajuda Ita-nia moris, Ita-nia fiar sei  sai metin liután. Ida-neʼe sei book Ita atu fó-hatene ema seluk kona-ba buat neʼebé Ita aprende. (Jeremias 20:9; 2 Korinto 4:13) Maibé Ita presiza fó-hatene ba sé-sé deʼit?

9, 10. (a) Ita bele hahú koʼalia kona-ba buat neʼebé Ita aprende ba sé deʼit? (b) Se Ita hakarak haklaken hamutuk ho kongregasaun, Ita presiza halo saida?

⁹ Karik Ita hakarak koʼalia kona-ba buat neʼebé Ita aprende daudauk ba Ita-nia família, belun, viziñu, ka kolega serbisu. Neʼe diʼak, maibé ita presiza halo nuneʼe iha dalan neʼebé hatudu domin no laran-diʼak. Tuirmai, Ita bele hahú haklaken hamutuk ho kongregasaun. Kuandu Ita sente prontu ona atu halo ida-neʼe, Ita bele koʼalia ba Testemuña neʼebé hanorin Bíblia ba Ita, katak Ita hakarak haklaken hamutuk ho maluk sira iha kongregasaun. Se ema neʼebé hanorin Ita hanoin katak Ita prontu ona no Ita moris tuir Bíblia nia matadalan sira, imi bele koʼalia ho katuas naʼin-rua iha kongregasaun.

¹⁰ Katuas sira sei koʼalia saida ho imi? Sira sei husu no haree katak Ita komprende no fiar hanorin báziku husi Bíblia no halo tuir Bíblia nia hanorin iha Ita-nia moris loroloron nian. Sira mós sei husu se Ita hakarak duni atu sai Testemuña ba Jeová ka lae. Hanoin-hetan katak katuas sira tau matan ba ema hotu iha kongregasaun, inklui mós Ita, tan neʼe, keta taʼuk atu koʼalia ho sira. (Apóstolu 20:28; 1 Pedro 5:2, 3) Depois neʼe, katuas sira sei fó-hatene Ita se Ita bele komesa haklaken hamutuk ho kongregasaun ka lae.

11. Tanbasá importante atu halo mudansa iha ita-nia moris antes haklaken hamutuk ho kongregasaun?

¹¹ Karik katuas sira sei esplika katak Ita presiza halo  mudansa balu tan atu bele haklaken hamutuk ho kongregasaun. Tanbasá mak importante tebes atu halo mudansa sira-neʼe? Tanba kuandu ita koʼalia kona-ba Maromak ba ema seluk, ita reprezenta Maromak Jeová no ita tenke moris iha dalan neʼebé fó hahiʼi ba nia.​—1 Korinto 6:9, 10; Galásia 5:19-21.

12. Tanbasá mak ema hotu presiza arrepende an?

¹² Iha buat seluk tan neʼebé Ita presiza halo antes atu hetan batizmu. Apóstolu Pedro hatete: “Arrepende an bá no fila fali ba Maromak, atu nuneʼe Jeová bele hamoos tiha imi-nia sala sira.” (Apóstolu 3:19) “Arrepende an” katak sá? Neʼe katak sente triste tebes ba sala neʼebé ita halo ona. Porezemplu, se uluk Ita-nia moris la tuir morál no halo sala seksuál, Ita presiza arrepende an. Maibé oinsá se husi kiʼik kedas Ita sempre hakaʼas an atu halo buat neʼebé loos? Ita mós presiza arrepende an, tanba ita hotu mak sala-naʼin no presiza hetan Maromak nia perdua.​—Roma 3:23; 5:12.

13. “Fila fali ba Maromak” katak sá?

¹³ Se Ita sente triste ba Ita-nia hahalok uluk nian, neʼe toʼo ona ka lae? Lae. Apóstolu Pedro hatete katak ita mós presiza “fila fali ba Maromak”. Neʼe katak Ita presiza husik tiha hahalok aat oioin neʼebé uluk Ita halo no hahú halo buat neʼebé loos. Imajina toʼok, ita laʼo ba fatin foun ida. Lakleur, Ita rekoñese katak Ita laʼo sala dalan. Ita sei halo saida? Ita sei para, fila fali no hili dalan neʼebé loos. Hanesan neʼe mós kuandu Ita estuda Bíblia, karik Ita rekoñese katak Ita presiza husik toman balu ka halo mudansa balu iha Ita-nia moris. Se nuneʼe,  sai prontu atu “fila fali ba Maromak” hodi troka Ita-nia hahalok no halo buat neʼebé loos.

14. Oinsá mak Ita dedika Ita-nia an ba Maromak?

¹⁴ Hakat importante ida tan antes atu hetan batizmu mak dedika Ita-nia an ba Jeová. Kuandu Ita dedika an ba Jeová, Ita hatoʼo orasaun ida atu promete katak Ita sei adora deʼit nia no tau uluk ninia hakarak nuʼudar buat neʼebé importante liu iha Ita-nia moris.​—Deuteronómio 6:15.

15, 16. Saida mak book ema atu dedika an ba Maromak?

¹⁵ Promete atu serbí deʼit Jeová mak hanesan promete atu moris hamutuk ba nafatin ho ema neʼebé Ita hadomi. Imajina toʼok mane ida neʼebé namora ho feto ida. Bainhira nia koñese liután feto neʼe, ninia domin sai boot liután no hakarak kaben ho feto neʼe. Maski neʼe mak desizaun neʼebé sériu, maibé nia prontu atu simu responsabilidade tanba nia hadomi feto neʼe.

¹⁶ Kuandu Ita aprende liután kona-ba Jeová, Ita sei hadomi nia no hakaʼas an atu serbí nia. Ida-neʼe sei book Ita atu halo orasaun ida hodi promete atu serbí nia. Bíblia hatete katak ema naran deʼit neʼebé hakarak tuir Jesus tenke “nega ninia an rasik”. (Marcos 8:34) Neʼe katak sá? Neʼe katak Ita tau uluk Jeová iha Ita-nia moris no halo tuir nia. Jeová nia hakarak mak importante liu fali Ita rasik nia hakarak no planu.​—Lee 1 Pedro 4:2.

17. Tanbasá mak ema balu la dedika an ba Jeová?

¹⁷ Ema balu la dedika an ba Jeová, tanba taʼuk katak  sira labele kumpre sira-nia promesa atu serbí nia ba nafatin. Sira lakohi halo Jeová triste, ka sira mós dala ruma hanoin katak se sira la dedika an ba Jeová, sira la presiza hatán ka lori todan kona-ba sira-nia hahalok sala.

18. Saida mak sei ajuda Ita atu la hanoin demais kona-ba halo Jeová triste?

¹⁸ Se Ita iha domin ba Jeová, neʼe ajuda Ita atu la hanoin demais kona-ba halo Jeová triste. Ita-nia domin ba nia sei book Ita atu hakaʼas an atu kumpre Ita-nia promesa. (Eclesiastes 5:4; Koloso 1:10) Ita sei la hanoin katak halo tuir Jeová nia hakarak mak susar demais. Apóstolu João hakerek: “Domin ba Maromak signifika katak ita halo tuir ninia ukun-fuan sira, no ninia ukun-fuan sira la susar liu atu kumpre.”​—1 João 5:3.

19. Tanbasá mak la presiza taʼuk atu dedika an ba Jeová?

¹⁹ Ita la presiza halo buat hotu ho perfeitu atu bele dedika an ba Jeová. Nia la husu ita atu halo buat neʼebé liu fali ita-nia kbiit. (Salmo 103:14) Nia sei ajuda Ita atu halo buat neʼebé loos. (Isaias 41:10) Tau fiar ba Jeová ho Ita-nia laran tomak, no ‘nia sei halo loos Ita-nia dalan sira’.​—Provérbios 3:5, 6.

20. Kuandu dedika an ona ba Maromak, saida mak hakat tuirmai?

²⁰ Ita sente prontu ona atu dedika an ba Jeová ka lae? Bainhira Ita dedika an ona ba Jeová, hakat tuirmai mak hetan batizmu.

21, 22. Oinsá mak Ita “fó sai” Ita-nia fiar “iha ema barak nia oin”?

²¹ Fó-hatene koordenadór ba grupu katuas iha Ita-nia kongregasaun katak Ita dedika an ona ba Jeová no  hakarak atu hetan batizmu. Tuirmai, nia sei arranja katuas balu atu halo revizaun hamutuk ho Ita kona-ba hanorin báziku husi Bíblia. Se katuas sira konkorda katak Ita prontu ona, sira sei fó-hatene Ita katak Ita bele hetan batizmu iha reuniaun boot tuirmai husi Testemuña ba Jeová. Iha reuniaun boot neʼe, irmaun ida sei hatoʼo diskursu hodi esplika batizmu signifika  saida. Depois neʼe, nia sei husu pergunta rua ba sira neʼebé prontu atu hetan batizmu. Hodi hatán ba pergunta sira-neʼe, Ita sei “fó sai” Ita-nia fiar “iha ema barak nia oin”.​—Roma 10:10.

²² Tuirmai, Ita sei hetan batizmu, no Ita-nia isin-lolon tomak sei tama ba bee laran. Batizmu neʼe sei  hatudu ba ema hotu katak Ita dedika an ona ba Jeová no agora Ita sai ona Testemuña ba Jeová.

23. Hetan batizmu “hodi Aman, Oan no espíritu santu nia naran” katak sá?

²³ Jesus hatete katak ninia dixípulu sira sei hetan batizmu “hodi Aman, Oan no espíritu santu nia naran”. (Lee Mateus 28:19.) Neʼe katak sá? Neʼe katak Ita rekoñese Jeová nia pozisaun, oinsá mak Jesus halaʼo ninia knaar hodi tuir Maromak nia hakarak, no oinsá Maromak uza ninia espíritu santu atu kumpre ninia hakarak.​—Salmo 83:18; Mateus 28:18; Galásia 5:22, 23; 2 Pedro 1:21.

24, 25. (a) Batizmu reprezenta saida? (b) Ita sei koʼalia kona-ba saida iha kapítulu ikus husi livru neʼe?

²⁴ Batizmu reprezenta buat neʼebé importante tebes. Bainhira Ita-nia isin-lolon tomak tama ba bee laran, neʼe hatudu katak Ita mate ona ba hahalok uluk nian. Bainhira Ita sai husi bee, Ita sei hahú moris foun hodi halo tuir Maromak nia hakarak. Neʼe hatudu katak Ita komesa serbí Jeová husi tempu neʼe ba oin. Hanoin-hetan katak Ita la dedika an ba ema, ka organizasaun, ka serbisu. Ita dedika Ita-nia moris ba Jeová.

²⁵ Ita-nia dedikasaun sei ajuda Ita atu iha relasaun besik ho Maromak nuʼudar belun. (Salmo 25:14) Maibé neʼe la dehan katak ema ida sei hetan salvasaun tan deʼit nia hetan ona batizmu. Apóstolu Paulo hakerek: “Kontinua hakaʼas an atu hetan imi-nia salvasaun.” (Filipe 2:12) Batizmu mak hakat primeiru atu bele hetan salvasaun. Maibé oinsá mak ita bele kontinua hakbesik ba Jeová? Kapítulu ikus husi livru neʼe sei fó resposta.