1, 2. Pergunta saida mak Ita tenke husu ba Ita-nia an? Tanbasá mak importante atu hanoin kona-ba neʼe?

LIUHUSI estuda Bíblia, Ita aprende katak maski ema barak dehan sira adora Maromak, maibé tuir loloos, sira hanorin ka halo buat neʼebé Maromak hakribi. (2 Korinto 6:17) Tan neʼe mak Jeová haruka ita atu sai husi relijiaun falsu, ka “Babilónia Boot”. (Apokalipse 18:2, 4) Entaun, saida mak Ita sei halo? Ita ida-idak presiza halo desizaun. Ita tenke husu ba ita-nia an: ‘Haʼu hakarak adora Maromak tuir ninia hakarak, ka tuir haʼu-nia toman deʼit?’

² Se Ita husik tiha ona relijiaun falsu, neʼe diʼak tebes. Maibé karik iha Ita-nia laran, Ita gosta nafatin toman ka kostume balu husi relijiaun falsu. Mai ita koʼalia kona-ba toman ka kostume balu neʼebé mai husi relijiaun falsu no buka-hatene tanbasá mak ita presiza iha hanoin neʼebé hanesan ho Jeová nian.

3. (a) Tanbasá mak ema balu sente susar atu la uza tan imajen ka estátua iha sira-nia adorasaun? (b) Bíblia hatete saida kona-ba uza imajen ka estátua atu adora Maromak?

³ Ema balu adora Maromak hodi uza imajen, estátua ka oratóriu ba tinan barak ona. Se Ita mós iha toman hanesan neʼe, karik Ita sente susar atu adora Maromak hodi la uza tan buat sira-neʼe. Maibé keta haluha katak Jeová hanorin ita kona-ba oinsá atu adora nia. Bíblia hatete ho klaru katak Jeová lakohi ita atu uza imajen ka  estátua iha adorasaun.​—Lee Éxodo 20:4, 5; Salmo 115:4-8; Isaias 42:8; 1 João 5:21.

4. (a) Tanbasá mak ita labele hamulak ba beiʼala sira? (b) Tanbasá mak Jeová bandu ninia povu atu labele koko koʼalia ho ema mate sira?

⁴ Ema balu uza sira-nia tempu no osan barak atu halo kontente sira-nia beiʼala. Dala ruma ema mós adora sira-nia beiʼala hodi hamulak ba sira. Maibé ita aprende ona katak ema neʼebé mate labele ajuda ita no labele fó susar ba ita tanba sira la moris ona. Tuir loloos, perigu atu koko koʼalia ho matebian sira, tanba maski Ita sente katak matebian mak koʼalia ho Ita, maibé tuir loloos, neʼe mak husi anju aat. Tan neʼe mak Jeová bandu povu Izraél atu labele koko koʼalia ho ema mate sira no labele iha ligasaun ho anju aat sira.​—Deuteronómio 18:10-12; haree Apéndise 26 no 31.

5. Saida mak bele ajuda Ita atu la uza tan estátua hodi adora Maromak no la hamulak tan ba beiʼala sira?

⁵ Saida mak bele ajuda Ita atu la uza tan estátua hodi adora Maromak, ka la hamulak tan ba beiʼala sira? Ita presiza lee Bíblia no hanoin didiʼak kona-ba Jeová nia hanoin ba buat hirak-neʼe. Tuir loloos Jeová “hakribi” buat sira-neʼe. (Deuteronómio 27:15) Halo orasaun ba Jeová loron-loron atu husu ajuda, hodi nuneʼe ita bele iha hanoin hanesan ho nia no adora nia tuir ninia hakarak. (Isaias 55:9) Ita bele fiar katak Jeová sei fó forsa ba Ita atu sai livre husi buat hotu neʼebé iha ligasaun ho adorasaun falsu.

6. Tanbasá mak ema hili loron 25 Dezembru atu selebra Jesus nia loron-moris?

⁶ Ema barak iha mundu tomak selebra Natál tanba sira hanoin katak neʼe mak Jesus nia loron-moris. Maibé tuir loloos, Natál iha ligasaun ho adorasaun  falsu. Ensiklopédia ida esplika katak iha tempu antigu ema jentiu sira iha rai-Roma selebra loro-matan nia loron-moris iha data 25 Dezembru. Atu halo ema jentiu barak sai ema Kristaun, ulun-naʼin igreja sira deside atu selebra Jesus nia loron moris iha 25 Dezembru maski Jesus la moris iha loron neʼe. (Lucas 2:8-12) Jesus nia dixípulu sira iha tempu uluk la selebra Natál. Livru ida (Sacred Origins of Profound Things) esplika katak durante tinan 200 depois Jesus moris, “la iha ema ida mak hatene loron saida mak Jesus moris, no la iha ema ida mak interese kona-ba neʼe”. Ema komesa selebra Natál maizumenus tinan 300 depois Jesus mate.

7. Tanbasá mak ema Kristaun neʼebé loos la selebra Natál?

⁷ Ema barak hatene katak Natál no kostume hanesan halo festa ka troka prezente mak mai husi ema jentiu sira-nia adorasaun falsu. Porezemplu, maizumenus tinan 300 liubá iha rai-Inglaterra no parte balu iha Amérika, iha lei neʼebé bandu ema atu labele selebra Natál tanba Natál mak ema jentiu nia loron-boot. Ema neʼebé selebra Natál hetan kastigu. Maibé neineik-neineik, ema komesa selebra fali Natál. Entaun, tanbasá mak ema Kristaun neʼebé loos la selebra Natál? Neʼe tanba sira hakarak halo Maromak kontente.

8, 9. Tanbasá mak ema Kristaun iha tempu antigu la selebra tinan?

⁸ Selebrasaun seluk neʼebé ema barak gosta mak halo-tinan. Ema Kristaun neʼebé loos selebra tinan ka lae? Bíblia konta deʼit katak ema neʼebé la adora Jeová mak selebra tinan. (Génesis 40:20; Marcos 6:21) Ema iha tempu uluk halo festa tinan nian atu fó hahiʼi ba maromak falsu sira. Tan neʼe, “ema Kristaun sira iha tempu antigu  hanoin katak selebra tinan mak ema jentiu sira-nia kostume”.​—The World Book Encyclopedia.

⁹ Ema Roma no ema Grésia iha tempu antigu fiar katak kuandu ema ida foin moris, espíritu ida mós akompaña no proteje ema neʼe iha ninia moris tomak. Tuir livru ida (The Lore of Birthdays), ema Roma no Grésia fiar katak “espíritu neʼe iha ligasaun espesiál ho maromak ida neʼebé moris iha data neʼebé hanesan ho ema neʼe”.

10. Tanbasá mak ema Kristaun ohin loron la selebra tinan?

¹⁰ Tuir ita-nia hanoin, Jeová sente kontente ka lae, kuandu ema halo selebrasaun neʼebé liga ho relijiaun falsu? (Isaias 65:11, 12) Lae duni. Tan neʼe, ita la selebra loron-moris no mós loron-boot sira neʼebé iha ligasaun ho relijiaun falsu.

11. Tanbasá mak ema balu nafatin selebra loron-boot sira? Ita presiza hanoin ulukliu kona-ba saida?

¹¹ Ema balu hatene katak Natál no loron-boot balu mai husi relijiaun falsu, maibé sira nafatin selebra loron sira-neʼe. Sira hanoin katak neʼe mak oportunidade diʼak ba família atu halibur no ransu hamutuk. Ita mós hanoin hanesan neʼe ka lae? La sala atu gasta tempu hamutuk ho família. Jeová mak hahú arranju família nian, no nia hakarak ita atu iha relasaun diʼak ho ita-nia família. (Éfeso 3:14, 15) Maibé ita presiza hanoin ulukliu kona-ba ita-nia relasaun diʼak ho Jeová duké halo ita-nia família kontente hodi selebra loron-boot neʼebé mai husi relijiaun falsu. Tan neʼe, apóstolu Paulo hatete: “Kontinua buka-hatene kona-ba buat neʼebé halo Naʼi kontente.”​—Éfeso 5:10.

12. Jeová la simu loron-boot no selebrasaun hanesan saida deʼit?

¹² Ema barak la interese kona-ba loron-boot nia hun,  maibé Jeová la hanoin hanesan neʼe. Nia la simu loron-boot sira neʼebé iha ligasaun ho adorasaun falsu no selebrasaun atu hahiʼi ema ka nasaun. Porezemplu, ema Ejitu sira iha tempu antigu iha selebrasaun oioin ba maromak falsu sira. Bainhira ema Izraél sai ona husi rai-Ejitu, sira mós halo tuir ema Ejitu nia festa ida no dehan katak neʼe mak “festa ba Jeová”. Maibé Jeová fó kastigu ba sira neʼebé selebra festa neʼe. (Éxodo 32:2-10) Hanesan profeta Isaias hatete ona, ita labele “kona buat ida neʼebé la moos”!​—Lee Isaias 52:11.

13. Kuandu Ita deside atu la selebra tan loron boot sira, karik Ita sei iha pergunta saida deʼit?

¹³ Kuandu Ita deside atu la selebra tan loron-boot sira, karik Ita sei hanoin kona-ba buat oioin. Porezemplu, karik Ita hanoin: ‘Se haʼu-nia kolega husu tanbasá mak haʼu la selebra Natál, oinsá mak haʼu sei esplika? Se ema ruma fó prezente Natál mai haʼu, haʼu tenke halo saida? Oinsá se haʼu-nia kaben hakarak haʼu atu selebra loron-boot? Oinsá mak haʼu bele ajuda haʼu-nia oan sira atu la sai triste tanba la selebra loron-boot no la halo festa tinan nian?’

14, 15. Se ema ruma fó boas-festas ka prezente ba Ita, saida mak Ita bele halo?

¹⁴ Buat neʼebé importante mak tetu didiʼak situasaun ida-idak neʼebé Ita hasoru. Porezemplu, se ema ruma fó boas-festas, karik Ita bele hatete deʼit “Obrigadu” ba sira duké finje la rona. Maibé se ema ruma hakarak hatene liután kona-ba ita-nia fiar, diʼak atu esplika tanbasá Ita la hola parte iha selebrasaun neʼe. Maibé keta haluha, Ita presiza nafatin hatudu laran-diʼak, matenek no respeitu. Bíblia hatete: “Sempre koʼalia ho laran-diʼak hodi  tau masin uitoan, atu nuneʼe imi bele hatene oinsá imi tenke hatán ba ema ida-idak.” (Koloso 4:6) Karik Ita bele esplika katak Ita gosta atu hamutuk ho família no kolega sira no fó prezente ba malu, maibé Ita hakarak halo ida-neʼe iha tempu seluk.

¹⁵ Maibé oinsá se ema ruma fó prezente ba Ita? Bíblia la fó lei oioin kona-ba neʼe, maibé hatete deʼit katak ita presiza mantein ita-nia konxiénsia neʼebé diʼak. (1 Timóteo 1:18, 19) Karik ema neʼebé fó prezente ba Ita seidauk hatene katak Ita la selebra loron-boot neʼe. Ka karik nia hatete: “Haʼu hatene ó la selebra ida-neʼe, maibé haʼu hakarak deʼit atu fó prezente neʼe ba ó.” Iha situasaun ida-idak, Ita bele deside atu simu ka la simu prezente hodi tuir Ita-nia konxiénsia. Maibé importante mak atu iha konxiénsia neʼebé diʼak no moos. Ita lakohi halo buat naran deʼit neʼebé estraga ita-nia relasaun ho Jeová.

16. Se Ita-nia família hakarak atu selebra loron-boot, Ita bele halo saida?

¹⁶ Se Ita-nia família hakarak atu selebra loron-boot, Ita bele halo saida? Ita la presiza haksesuk malu. Keta haluha katak sira mós iha direitu atu deside buat neʼebé sira hakarak halo. Hatudu laran-diʼak no respeitu sira-nia desizaun hanesan Ita hakarak sira mós respeitu Ita-nian. (Lee Mateus 7:12.) Maibé se Ita-nia família hakarak Ita atu ransu hamutuk iha loron-boot neʼe, Ita presiza halo saida? Antes atu foti desizaun, halo orasaun hodi husu Jeová nia ajuda atu bele halo desizaun neʼebé diʼak. Hanoin kona-ba situasaun, no buka-hatene informasaun kona-ba neʼe. Hanoin-hetan, Ita sempre hakarak halo Jeová kontente.

17. Atu Ita-nia oan labele sente laran-moras tanba ema seluk selebra loron-boot, Ita bele halo saida?

 ¹⁷ Saida deʼit mak ita bele halo atu ajuda ita-nia oan sira kuandu sira haree ema seluk selebra loron-boot sira? Dala ruma, diʼak atu halo festa kiʼik hamutuk ho sira iha loron seluk. Karik Ita mós bele fó prezente espesiál ba sira. No prezente diʼak liu neʼebé Ita bele fó ba Ita-nia oan mak Ita-nia tempu no domin.

18. Tanbasá mak ita presiza tuir reuniaun sira?

¹⁸ Atu halo Jeová kontente, ita presiza husik relijiaun falsu, no mós kostume ka selebrasaun sira neʼebé iha ligasaun ho relijiaun falsu. Maibé ita mós presiza halaʼo adorasaun neʼebé loos. Oinsá? Dalan ida mak hodi tuir beibeik reuniaun sira husi Testemuña ba Jeová. (Lee Ebreu 10:24, 25.) Reuniaun sira-neʼe mak parte neʼebé importante tebes iha adorasaun neʼebé loos. (Salmo 22:22; 122:1) Ita bele fó laran-manas ba malu bainhira ita halibur hamutuk.​—Roma 1:12.

19. Tanbasá importante atu fó-hatene lia-loos husi Bíblia ba ema seluk?

¹⁹ Parte importante ida tan mak fó-hatene ema seluk kona-ba buat neʼebé ita aprende ona husi Bíblia. Ema barak sente laran-susar tanba buat aat oioin neʼebé akontese iha mundu neʼe. Karik Ita mós hatene ema balu neʼebé hanesan neʼe. Entaun, fó-hatene sira Ita-nia esperansa kapás ba futuru. Kuandu ita tuir beibeik reuniaun sira no fó-hatene ema seluk kona-ba lia-loos husi Bíblia, neʼe sei ajuda Ita atu la hanoin barak kona-ba Ita-nia desizaun atu husik relijiaun falsu no kostume sira neʼebé la tuir Bíblia. Ita bele fiar katak Ita bele moris kontente no Jeová sei fó bensaun barak ba Ita-nia hakaʼas an kuandu Ita hili atu adora nia iha dalan neʼebé loos.​—Malaquias 3:10.