KAPÍTULU 6
Estevão “nakonu ho Maromak nia laran-diʼak no kbiit”
Aprende husi dalan neʼebé Estevão haklaken ho aten-brani iha Sinédriu nia oin
Bazeia ba Apóstolu 6:8–8:3
1-3. (a) Estevão hasoru situasaun saida neʼebé bele halo nia sente taʼuk, no ninia reasaun mak oinsá? (b) Ita sei aprende kona-ba pergunta saida deʼit?
ESTEVÃO hamriik iha Sinédriu nia oin, iha fatin tesi-lia nian neʼebé boot, karik besik templu iha Jeruzalein, no iha mane naʼin-71 neʼebé tuur haleʼu nia. Neʼe mak tempu neʼebé Sinédriu atu tesi-lia ba Estevão. Juís sira-neʼe iha podér boot no sira barak la gosta Jesus nia dixípulu Estevão. Mane neʼebé bolu sira atu halibur iha fatin neʼe mak Amlulik Boot Caifás, nia mak ulun-naʼin iha tempu neʼebé Sinédriu tesi-lia ba Jesus fulan balu antes neʼe. Estevão sente taʼuk ka lae?
2 Iha buat kmanek ida neʼebé akontese ho Estevão nia oin. Juís sira haree ninia oin “hanesan anju ida nia oin”. (Após 6:15) Anju sira fó sai lia-menon husi Jeová, tan neʼe sira kalma, nakonu ho dame, no la presiza sente taʼuk. Nuneʼe mós ho Estevão. Juís sira neʼebé odi tebes nia mós bele haree ida-neʼe. Oinsá mak Estevão bele kalma nafatin?
3 Ema Kristaun ohin loron mós bele aprende buat barak husi resposta ba pergunta neʼe. Ita mós presiza buka-hatene tanbasá Estevão bele tama ba situasaun susar neʼe. Antes neʼe, oinsá mak Estevão defende ona ninia fiar? No oinsá mak ita bele banati-tuir nia?
“Sira soran povu” (Apóstolu 6:8-15)
4, 5. (a) Tanbasá mak Estevão folin-boot ba kongregasaun? (b) Oinsá mak Estevão “nakonu ho Maromak nia laran-diʼak no kbiit”?
4 Ita aprende ona katak Estevão mak folin-boot ba kongregasaun Kristaun foun. Iha kapítulu antes neʼe, ita aprende katak nia mak mane ida husi mane naʼin-hitu neʼebé simu knaar espesiál husi apóstolu sira. Ita admira ho ninia hahalok haraik an bainhira ita hanoin fali kona-ba abilidade sira neʼebé nia hetan husi Jeová. Iha Apóstolu 6:8, ita aprende katak Maromak fó nia kbiit atu “halo milagre boot no sinál sira” hanesan ho buat neʼebé apóstolu balu halo. Ita mós aprende katak nia “nakonu ho Maromak nia laran-diʼak no kbiit”. Neʼe katak sá?
5 Estevão hatudu hahalok laran-diʼak, laran-maus, no neʼe halo ema gosta atu hakbesik ba nia. Dalan neʼebé nia koʼalia halo rona-naʼin sira fiar katak nia hanoin duni sira no lia-loos neʼebé nia hanorin bele lori benefísiu ba sira. Nia nakonu ho kbiit tanba hatudu haraik an no husik Jeová nia espíritu santu dirije nia. Duké sai foti an ho ninia abilidade sira, nia fó hahiʼi hotu ba Jeová no hatudu katak nia hanoin ema. Tan neʼe ita la hakfodak kuandu kontradór sira haree nia nuʼudar ema neʼebé lori perigu ba sira!
6-8. (a) Kontradór sira duun Estevão kona-ba saida, no tanbasá? (b) Tanbasá Estevão nia ezemplu bele ajuda ema Kristaun ohin loron?
6 Mane balu diskute malu ho Estevão, maibé “sira labele manán ninia matenek no mós Maromak nia espíritu neʼebé ajuda nia atu koʼalia”. a Tanba hirus, “ho subasubar deʼit sira book ema” atu duun matak Estevão neʼebé la halo sala. Sira mós “soran povu, katuas sira, no eskriba sira”, atu obriga lori Estevão ba Sinédriu. (Após 6:9-12) Kontradór sira duun nia kona-ba buat rua: Katak nia koʼalia aat Maromak no Moisés. Neʼe katak sá?
7 Kontradór sira duun katak Estevão koʼalia aat Maromak tanba koʼalia kontra “fatin santu”, neʼe mak templu iha Jeruzalein. (Após 6:13) Sira duun katak Estevão koʼalia aat Moisés tanba koʼalia kontra Moisés nia Ukun-Fuan no hakarak troka tradisaun neʼebé mai husi Moisés. Neʼe mak hahalok neʼebé sériu tanba ba ema Judeu buat neʼebé importante liu mak templu, Moisés nia Ukun-Fuan, no tradisaun barak neʼebé sira aumenta ba Ukun-Fuan. Entaun ema neʼebé duun Estevão dehan katak nia mak ema neʼebé perigozu no tenke mate!
8 Triste mak ohin loron ulun-naʼin relijiaun sira baibain uza dalan hanesan neʼe atu fó-terus ba Maromak nia povu. Dala ruma, ulun-naʼin relijiaun sira book governu atu fó-terus Testemuña ba Jeová. Ita presiza halo saida bainhira ema duun matak ita? Ita bele aprende buat oioin husi Estevão.
Haklaken ho brani kona-ba “Maromak glória nian” (Apóstolu 7:1-53)
9, 10. Matenek-naʼin balu dehan saida kona-ba liafuan neʼebé Estevão koʼalia iha Sinédriu nia oin, no saida mak ita presiza hanoin-hetan?
9 Hanesan temi ona ohin, bainhira Estevão rona daudaun ba ema neʼebé duun nia, ninia oin haree kalma hanesan anju nia oin. Tuirmai Caifás hatete ba nia: “Buat sira-neʼe loos ka lae?” (Após 7:1) Agora mak tempu ba Estevão atu koʼalia, no nia koʼalia ho aten-brani!
10 Matenek-naʼin balu kritika Estevão nia liafuan no dehan katak maski nia koʼalia naruk loos, maibé nia la prova katak nia la sala. Tuir loloos, Estevão hatudu ezemplu neʼebé diʼak tebes kona-ba oinsá “atu defende” liafuan diʼak. (1 Ped 3:15) Hanoin-hetan, ema duun Estevão katak nia koʼalia aat Maromak tanba la respeitu templu no koʼalia aat Moisés tanba la respeitu Ukun-Fuan. Estevão hatán hodi koʼalia kona-ba períodu tolu husi Izraél nia istória, no nia tau énfaze ba pontu importante sira-neʼe. Mai ita haree oinsá nia halo ida-neʼe.
11, 12. (a) Tanbasá Estevão temi kona-ba Abraão? (b) Tanbasá Estevão temi kona-ba José?
11 Husi Abraão nia tempu toʼo José nia tempu. (Após 7:1-16) Ema Judeu respeitu Abraão tanba ninia fiar, tan neʼe Estevão hahú hodi koʼalia kona-ba Abraão. Estevão koʼalia kona-ba buat neʼebé sira konkorda no tau énfaze katak “Maromak glória nian” mosu ba Abraão iha Mezopotámia. (Após 7:2) Loloos, Abraão mak ema estranjeiru iha rai neʼebé Maromak promete. Tempu neʼebá seidauk iha templu no Moisés nia Ukun-Fuan. Tan neʼe ema ida labele dehan katak tenke iha templu no ukun-fuan atu bele laran-metin ba Maromak.
12 Ema neʼebé rona ba Estevão mós respeitu tebes Abraão nia bei-oan José. Estevão fó-hanoin sira katak José nia maun sira, neʼebé mak beiʼala husi Izraél nia suku sira, fó-terus no faʼan José nuʼudar atan. Maibé Maromak uza nia atu salva Izraél husi rai-hamlaha. Klaru katak Estevão haree José nia situasaun hanesan Jesus Kristu nian, maibé nia la temi kona-ba neʼe atu ninia rona-naʼin nafatin rona ba nia.
13. Oinsá mak Estevão hatán ba kontradór sira, no neineik-neineik Estevão fó sai kona-ba saida?
13 Moisés nia tempu. (Após 7:17-43) Estevão temi buat barak kona-ba Moisés, neʼe matenek tanba membru barak husi Sinédriu mak ema Saduseu neʼebé simu deʼit Eskritura neʼebé Moisés hakerek. Hanoin-hetan, ema mós duun katak Estevão koʼalia aat Moisés. Dalan neʼebé Estevão hatán hatudu katak nia respeitu tebes Moisés no Ukun-Fuan. (Após 7:38) Nia mós fó sai katak povu Izraél mós la simu Moisés maski nia koko atu salva sira. Sira la simu Moisés bainhira Moisés tinan 40. No liutiha tinan 40, iha situasaun balu, sira mós kontra Moisés nuʼudar sira-nia ulun-naʼin. b Ho ida-neʼe, neineik-neineik Estevão fó sai pontu importante katak Maromak nia povu kontra beibeik ema neʼebé Maromak hili nuʼudar sira-nia ulun-naʼin.
14. Estevão uza Moisés nia ezemplu atu prova pontu importante saida?
14 Estevão fó-hanoin ba sira katak Moisés fó sai nanis ona kona-ba profeta ida neʼebé sei mosu iha Izraél. Sé mak neʼe? No ema sei simu nia ka lae? Estevão la hatán ba pergunta sira-neʼe toʼo ninia konkluzaun. Nia fó sai pontu importante seluk tan: Moisés aprende katak fatin naran deʼit bele sai santu, porezemplu rai neʼebé besik ai-hun tarak neʼebé lakan, fatin neʼebé uluk Jeová koʼalia ba nia. Entaun, Maromak hakarak ita atu adora nia iha fatin ida deʼit hanesan templu iha Jeruzalein ka lae? Mai ita haree.
15, 16. (a) Tanbasá Estevão koʼalia kona-ba tenda santu? (b) Tanbasá Estevão temi kona-ba Salomão nia templu?
15 Tenda santu no templu. (Após 7:44-50) Estevão fó-hanoin ba Sinédriu katak antes harii templu ida iha Jeruzalein, Maromak haruka Moisés atu harii tenda santu. Neʼe mak tenda neʼebé sira bele muda no uza ba adorasaun. La iha ema ida mak brani atu dehan katak templu mak diʼak liu fali tenda santu, tanba Moisés adora Jeová iha tenda santu.
16 Depois neʼe, bainhira Salomão harii templu iha Jeruzalein, nia hatete buat ruma neʼebé importante tebes iha ninia orasaun. Neʼe hanesan ho buat neʼebé Estevão hatete: “Maromak neʼebé Aas Liu Hotu la hela iha uma neʼebé ema nia liman mak halo.” (Após 7:48; 2 Krón 6:18) Jeová bele uza templu atu kumpre ninia hakarak, maibé nia mós bele kumpre ninia hakarak maski la iha templu. Tan neʼe ninia atan sira labele hanoin katak dalan ida deʼit atu halaʼo adorasaun loos mak hodi uza templu. Estevão remata pontu neʼe hodi temi liafuan husi livru Isaias: “Lalehan mak haʼu-nia kadunan, no rai mak fatin ba haʼu atu tau haʼu-nia ain. Uma saida mak imi sei harii ba haʼu? Jeová mak dehan. Ka fatin ba haʼu atu deskansa mak iha neʼebé? Haʼu mak halo buat sira-neʼe hotu ho haʼu-nia liman, loos ka lae?”—Após 7:49, 50; Isa 66:1, 2.
17. Oinsá mak Estevão nia liafuan sira (a) fó sai kona-ba kontradór sira-nia atitude, no (b) prova katak nia la halo sala ida?
17 Bainhira Ita hanoin kona-ba Estevão nia liafuan hotu, Ita bele haree katak nia hatudu ho klaru kona-ba kontradór sira-nia atitude. Nia hatudu katak Jeová mak fleksivel no bele kumpre ninia hakarak iha dalan oioin, la iha situasaun ka tradisaun neʼebé bele hanetik ninia hakarak. Estevão nia rona-naʼin sira hafolin tebes templu furak iha Jeruzalein no tradisaun sira neʼebé ema aumenta ba Moisés nia Ukun-Fuan, maibé sira la komprende objetivu husi Ukun-Fuan no mós templu. Estevão nia liafuan sira hatudu katak dalan diʼak liu atu hatudu respeitu ba Ukun-Fuan no templu mak hodi halo tuir Jeová. Estevão nia liafuan fó prova katak nia la halo sala ida, tanba nia halo tuir Jeová ho ninia kbiit tomak.
18. Iha dalan saida deʼit mak ita bele banati-tuir Estevão?
18 Saida mak ita bele aprende husi Estevão nia liafuan? Nia hatene didiʼak Eskritura sira. Ita mós presiza estuda didiʼak Bíblia, hodi nuneʼe ita bele “uza ho loloos liafuan lia-loos nian”. (2 Tim 2:15) Ita mós bele aprende husi Estevão nia ezemplu oinsá atu koʼalia ho laran-diʼak. Ema neʼebé rona ba nia mak hirus tebes, maibé nia uza tempu barak atu koʼalia kona-ba buat neʼebé sira konkorda ona no hafolin tebes. Nia mós koʼalia ba sira ho respeitu hodi bolu sira “aman”. (Após 7:2) Ita mós presiza fó sai lia-loos husi Bíblia “ho laran-maus no respeitu kleʼan”.—1 Ped 3:15.
19. Oinsá mak Estevão ho aten-brani fó sai kona-ba Jeová nia mensajen tesi-lia nian ba Sinédriu?
19 Ita la dada an atu fó sai lia-loos kona-ba Maromak nia Liafuan, maski neʼe bele hakanek ema nia laran. Ita mós lakohi atu troka Maromak nia mensajen tesi-lia nian tan deʼit atu halo ema kontente. Estevão hatudu ezemplu diʼak mai ita. Nia haree katak evidénsia hotu neʼebé nia fó sai iha Sinédriu nia oin la book sira-nia laran. Tan neʼe espíritu santu book nia atu remata ninia liafuan hodi koʼalia ho aten-brani katak sira mak hanesan deʼit ho sira-nia beiʼala neʼebé la simu José, Moisés, no profeta sira seluk. (Após 7:51-53) Juís sira-neʼe mós oho Mesias neʼebé mak Moisés no profeta sira seluk fó sai nanis ona. Tuir loloos, sira mak kontra Moisés nia Ukun-Fuan iha dalan neʼebé aat liu!
“Naʼi Jesus, simu haʼu-nia moris bá” (Apóstolu 7:54–8:3)
“Rona tiha neʼe, sira sai hirus tebes ba Estevão no ruun nehan.”—Apóstolu 7:54
20, 21. Saida mak Sinédriu halo bainhira rona ba Estevão nia liafuan, no oinsá mak Jeová hametin nia?
20 Estevão nia liafuan halo juís sira sai hirus tebetebes. Sira la interese tan ho sira-nia dignidade no sira ruun nehan ba Estevão. Karik Estevão rekoñese katak nia mak hanesan deʼit ho ninia Naʼi Jesus. Sira sei la hatudu laran-sadiʼa ba nia.
21 Estevão presiza aten-brani atu hasoru situasaun neʼebé lakleur tan sei akontese. No nia hetan anima liuhusi vizaun neʼebé Jeová fó ba nia. Estevão haree Jeová nia glória, no nia haree Jesus hamriik iha Jeová nia liman-loos! Bainhira Estevão koʼalia kona-ba vizaun neʼe, juís sira taka sira-nia tilun. Tanbasá? Tanba antes neʼe, Jesus fó-hatene ba tribunál neʼebé hanesan katak nia mak Mesias no nia sei iha ninia Aman nia liman-loos. (Mc 14:62) Estevão nia vizaun prova katak Jesus koʼalia buat neʼebé loos. Loloos Sinédriu nega no oho ona Mesias! Ikusmai sira hotu ataka Estevão no ema tuda mate nia. c
22, 23. Oinsá mak Estevão nia mate hanesan ho ninia Naʼi? No hanesan ho Estevão, oinsá mak ema Kristaun ohin loron bele tau fiar ba Jeová?
22 Hanesan ninia Naʼi, bainhira Estevão atu mate nia sente dame, tau fiar tomak ba Jeová, no fó perdua ba ema sira neʼebé oho nia. Nia hatete: “Naʼi Jesus, simu haʼu-nia moris bá.” Karik nia sei bele haree Oan-Mane husi ema hamutuk ho Jeová iha vizaun neʼe. Klaru katak Estevão hatene Jesus nia liafuan neʼebé hametin tebes: “Haʼu mak moris-hiʼas no moris.” (João 11:25) Ikusmai, Estevão halo orasaun ho lian makaʼas no dehan: “Jeová keta fó kastigu ba sira kona-ba sala neʼe.” Koʼalia tiha ida-neʼe, nia mate.—Após 7:59, 60.
23 Estevão mak Jesus nia dixípulu primeiru neʼebé kontradór sira oho. (Haree kaixa “ Estevão mate tanba fó sasin kona-ba Jesus”.) Triste mak laʼós nia deʼit mak hasoru situasaun hanesan neʼe. Durante tinan barak, Jeová nia atan balu mate tanba ulun-naʼin relijiaun, polítiku-naʼin, no kontradór seluk mak oho. Maibé ita bele tau fiar ba Jeová hanesan buat neʼebé Estevão halo. Jesus agora ukun ona nuʼudar Liurai no nia simu kbiit boot husi Jeová. La iha buat ida mak bele hanetik nia atu fó moris-hiʼas ba ninia atan sira neʼebé laran-metin.—João 5:28, 29.
24. Oinsá mak Saul envolve iha Estevão nia mate, no oinsá mak Estevão nia mate lori impaktu ba tempu naruk?
24 Mane joven ida naran Saul mós iha neʼebá kuandu ema oho Estevão. Nia apoia ema sira-neʼe, no mós hein sira-nia roupa bainhira ema tuda mate Estevão. Depois neʼe, Saul komesa fó-terus makaʼas ba Jesus nia dixípulu sira. Estevão nia mate fó impaktu ba ema oioin durante tempu naruk. Ninia ezemplu hametin ema Kristaun atu kontinua laran-metin ba Jeová toʼo mate. Liután neʼe, Saul neʼebé ikusmai ema koñese nuʼudar Paulo arrepende kona-ba buat neʼebé akontese ba Estevão. (Após 22:20) Nia apoia atu oho Estevão, maibé ikusmai nia hatete: “Uluk haʼu koʼalia aat Maromak no fó-terus ba ninia povu no haʼu foti an.” (1 Tim 1:13) Klaru katak Paulo nunka haluha Estevão no oinsá Estevão defende an. Iha Paulo nia diskursu balu no ninia karta sira, nia temi kona-ba liafuan sira neʼebé Estevão uza hodi defende an. (Após 7:48; 17:24; Ebr 9:24) Estevão “nakonu ho Maromak nia laran-diʼak no kbiit”, no Paulo aprende no banati-tuir ninia ezemplu kona-ba fiar no aten-brani. Ita mós sei halo nuneʼe ka lae?
a Kontradór sira mak parte husi “Sinagoga husi Ema neʼebé sai Livre”. Karik uluk ema Roma kaer sira no ikusmai halo sira livre, ka sira mak atan neʼebé sai livre no ikusmai simu ema Judeu nia fiar. Sira balu mak husi Silísia, hanesan Saul husi Tarsu. Maibé Bíblia la konta katak Saul mós inklui mane sira husi Silísia neʼebé diskute malu ho Estevão.
b Estevão nia liafuan fó sai informasaun neʼebé ita labele hetan iha parte seluk iha Bíblia. Porezemplu, informasaun kona-ba Moisés nia edukasaun iha rai-Ejitu, ninia tinan kuandu nia halai husi rai-Ejitu, no nia hela iha Midian ba tinan hira.
c Tuir ema Roma nia lei, karik Sinédriu la iha podér atu fó kastigu-mate ba ema ida. (João 18:31) Entaun, ema-lubun neʼebé hirus mak oho Estevão no neʼe laʼós kastigu husi tribunál.
