1, 2. Saul hakarak halo saida iha Damasku?

 SAUL no ema-lubun besik ona atu toʼo Damasku, sira planu atu halo buat aat iha neʼebá. Sira sei dada sai Jesus nia dixípulu sira husi uma-laran, kesi sira, hamoe, no lori sira ba Jeruzalein atu fó-kastigu iha Sinédriu nia oin.

² Ida neʼebé dirije ema-lubun neʼe mak naran Saul. a Nia hola parte ona hodi oho ema. Bainhira ema Judeu neʼebé fanátiku tuda mate Estevão, nia mós haree no apoia ida-neʼe. (Após 7:57–8:1) Saul la fó-terus deʼit ba Jesus nia dixípulu sira iha Jeruzalein, maibé nia mós dirije ema atu fó-terus ba Jesus nia dixípulu sira iha sidade seluk. Nia hakarak halakon grupu relijiaun neʼebé ema koñese nuʼudar “Naʼi nia dalan”.—Após 9:1, 2; haree kaixa “ Saul nia podér iha Damasku”.

3, 4. (a) Saida mak akontese ba Saul? (b) Ita sei koʼalia kona-ba pergunta saida deʼit?

³ Derrepente deʼit, naroman nabilan ida haleʼu Saul. Sira neʼebé laʼo hamutuk ho nia haree naroman neʼe no sira labele koʼalia tanba hakfodak. Saul sai matan-delek no nia monu ba rai. Nia rona lian ida husi lalehan dehan: “Saul, Saul, tanbasá mak ó fó-terus ba haʼu?” Saul hakfodak no husu: “Sé mak Ita, Naʼi?” Karik Saul hakfodak tebes bainhira rona lian neʼebé dehan: “Haʼu mak Jesus, neʼebé ó fó-terus daudaun.”—Após 9:3-5; 22:9.

⁴ Ita bele aprende saida husi Jesus nia liafuan primeiru ba Saul? Ita bele hetan benefísiu saida hodi aprende kona-ba tempu neʼebé Saul sai Jesus nia dixípulu? Ita bele aprende saida husi dalan neʼebé kongregasaun uza tempu dame nian depois Saul sai tiha Jesus nia dixípulu?

5, 6. Saida mak ita bele aprende husi Jesus nia liafuan ba Saul?

⁵ Bainhira Jesus hapara Saul iha dalan atu bá Damasku, nia la husu: “Tanbasá mak ó fó-terus ba haʼu-nia dixípulu sira?” Hanesan  temi iha leten, nia dehan: “Tanbasá mak ó fó-terus ba haʼu?” (Após 9:4) Sin, Jesus mós sente susar sira neʼebé ninia dixípulu sira hasoru.—Mt 25:34-40, 45.

⁶ Se Ita hasoru susar tanba Ita-nia fiar ba Kristu, fiar bá katak Jeová no Jesus mós hatene buat neʼebé Ita hasoru. (Mt 10:22, 28-31) Karik Jeová la halakon kedas susar neʼebé Ita hasoru. Hanoin-hetan, Jesus mós haree bainhira Saul envolve iha Estevão nia mate, no nia mós haree Saul dada sai dixípulu sira husi uma-laran iha Jeruzalein. (Após 8:3) Maibé iha tempu neʼebá, Jesus la hapara ema neʼebé fó-terus ba dixípulu sira. Maski nuneʼe liuhusi Jesus, Jeová fó kbiit ba Estevão no dixípulu sira seluk atu sira bele kontinua laran-metin.

7. Saida mak Ita bele halo atu tahan hasoru susar sira?

⁷ Ita mós bele tahan hasoru susar se Ita halo tuir hakat sira tuirmai: (1) Deside metin atu laran-metin ba Jeová, maski hasoru susar naran deʼit. (2) Husu Jeová nia ajuda. (Flp 4:6, 7) (3) Keta selu aat, maibé entrega buat hotu ba Jeová. (Rom 12:17-21) (4) Fiar katak Jeová sei fó Ita forsa neʼebé Ita presiza atu bele tahan toʼo tempu neʼebé nia halakon susar neʼe.—Flp 4:12, 13.

8, 9. Karik Ananias sente oinsá kona-ba ninia knaar?

⁸ Depois hatán tiha Saul nia pergunta, “Sé mak Ita, Naʼi?” Jesus hatete ba nia: “Hamriik bá, tama ba sidade, no iha neʼebá mak ó sei hatene saida mak ó tenke halo.” (Após 9:6) Saul labele haree, tan neʼe ema neʼebé laʼo hamutuk ho nia lori nia ba Damasku, no iha neʼebá mak nia jejún no halo orasaun ba loron tolu. Liután neʼe, Jesus koʼalia ba dixípulu ida naran Ananias kona-ba Saul, no “ema Judeu hotu neʼebé hela iha fatin neʼebá koʼalia diʼak kona-ba [Ananias]”.—Após 22:12.

⁹ Hanoin toʼok kona-ba Ananias nia sentimentu! Jesus Kristu nuʼudar Ulun ba kongregasaun neʼebé moris-hiʼas ona mak koʼalia diretamente ba nia no fó  knaar neʼebé espesiál ba nia. Neʼe mak priviléjiu neʼebé boot, maibé neʼe mós knaar neʼebé todan! Bainhira Jesus hatete katak Ananias presiza koʼalia ho Saul, Ananias hatán: “Naʼi, haʼu rona ona husi ema barak kona-ba mane neʼe, kona-ba buat aat hotu neʼebé nia halo ba Ita-Boot nia ema santu sira iha Jeruzalein. Nia mai iha neʼe ho podér husi ulun-naʼin amlulik sira atu kaer ema hotu neʼebé bolu Ita-nia naran.”—Após 9:13, 14.

10. Ita bele aprende saida kona-ba Jesus husi dalan neʼebé nia koʼalia ba Ananias?

¹⁰ Jesus la korrije Ananias tanba fó sai ninia hanoin. Maibé Jesus fó ba nia matadalan neʼebé klaru. No Jesus hatudu respeitu ba nia hodi fó-hatene tanbasá Jesus hakarak nia atu halaʼo knaar neʼe. Jesus hatete  kona-ba Saul: “Haʼu hili tiha ona mane neʼe atu lori haʼu-nia naran ba nasaun sira, liurai sira, no mós ba Izraél nia oan sira. Haʼu sei hatudu momoos ba nia kona-ba susar hotu neʼebé nia tenke hasoru tanba haʼu-nia naran.” (Após 9:15, 16) Ananias halo tuir kedas Jesus. Nia vizita Saul no hatete: “Saul, haʼu-nia maun, Naʼi Jesus neʼebé mosu ba ó iha dalan bainhira ó laʼo daudaun mai iha neʼe, nia mak haruka haʼu mai atu ó bele haree fali no sai nakonu ho espíritu santu.”—Após 9:17.

11, 12. Saida mak ita bele aprende husi istória kona-ba Jesus, Ananias, no Saul?

¹¹ Ita bele aprende buat balu husi istória kona-ba Jesus, Ananias, no Saul. Porezemplu, ita aprende katak Jesus dirije serbisu haklaken hanesan nia promete nanis ona. (Mt 28:20) Maski ohin loron Jesus la koʼalia diretamente ba ita, maibé nia nafatin dirije serbisu haklaken liuhusi atan laran-metin no matenek neʼebé nia hili atu tau matan ba ninia atan sira. (Mt 24:45-47) Grupu Administradór dirije haklaken-naʼin no pioneiru sira atu buka ema neʼebé hakarak koñese liután Jesus. Hanesan temi ona iha kapítulu antes neʼe, ema barak halo orasaun atu husu matadalan no tuirmai Testemuña ba Jeová haklaken ba sira.—Após 9:11.

¹² Ananias halo tuir Jesus, simu ninia knaar no Jeová haraik bensaun ba nia. Ita mós halo tuir mandamentu atu haklaken ka lae, maski neʼe halo Ita laran-taridu? Ema balu sente laran-taridu kuandu haklaken husi uma ba uma no taʼuk atu hasoru ema neʼebé sira la koñese. Ema seluk tan sente susar atu haklaken iha serbisu-fatin, iha dalan, liuhusi telefone, ka hakerek karta. Ananias manán ninia sentimentu taʼuk no simu priviléjiu atu ajuda Saul simu espíritu santu. b Ananias bele hetan susesu tanba nia tau fiar ba Jesus no fiar katak Saul bele sai ema Kristaun. Hanesan Ananias, ita mós bele manán sentimentu taʼuk se ita fiar katak Jesus mak dirije serbisu haklaken, ita hanoin ema nia sentimentu, no haree ema neʼebé halo ita taʼuk nuʼudar ema neʼebé bele sai ita-nia maluk Kristaun.—Mt 9:36.

13, 14. Se Ita estuda hela Bíblia maibé seidauk hetan batizmu, saida mak Ita bele aprende husi Saul nia ezemplu?

¹³ Saul lalais atu halo mudansa bazeia ba buat neʼebé nia aprende. Kuandu hetan tiha kura, nia hetan batizmu no komesa halibur  hamutuk ho dixípulu sira iha Damasku. Maibé laʼós neʼe deʼit. “Nia hahú kedas atu haklaken iha sinagoga sira kona-ba Jesus, katak Jesus mak Maromak nia Oan-Mane.”—Após 9:20.

¹⁴ Se Ita estuda hela Bíblia maibé seidauk hetan batizmu, Ita hakarak banati-tuir Saul hodi halo mudansa no aplika buat neʼebé Ita aprende ka lae? Saul rasik haree milagre ida neʼebé Jesus halo, no neʼe motiva nia atu hetan batizmu. Ema seluk mós haree milagre sira neʼebé Jesus halo, maibé neʼe la motiva sira atu halo mudansa. Porezemplu, ema Farizeu balu haree Jesus kura mane neʼebé liman-matek, no ema Judeu barak hatene katak Jesus fó moris-hiʼas ba Lázaro. Maibé neʼe la motiva sira atu laʼo tuir Jesus, no sira balu kontra nia. (Mc 3:1-6; João 12:9, 10) Maibé Saul halo duni mudansa. Tanbasá Saul sai dixípulu maibé ema seluk lae? Tanba nia hamtaʼuk Maromak duké taʼuk ba ema no nia hafolin laran-sadiʼa neʼebé Kristu hatudu ba nia. (Flp 3:8) Se Ita mós halo nuneʼe, Ita sei la husik buat ida hapara Ita atu haklaken no hetan batizmu.

15, 16. Saul halo saida iha sinagoga, no ema Judeu balu iha Damasku halo saida kuandu Saul haklaken?

¹⁵ Imajina toʼok ema-lubun nia reasaun! Sira hakfodak no hirus kuandu haree Saul hahú haklaken kona-ba Jesus iha sinagoga. Sira husu: “Mane neʼe mak haterus ema sira neʼebé bolu naran neʼe iha Jeruzalein, loos ka lae?” (Após 9:21) Bainhira Saul esplika tanbasá nia troka ninia hanoin kona-ba Jesus, Saul “esplika ho klaru katak Jesus mak Kristu”. (Após 9:22) Maski ita esplika ho klaru no lójiku, maibé neʼe la dehan katak ema seluk sei fiar ida-neʼe ka neʼe sei book ema atu husik sira-nia tradisaun ka hahalok foti an. Maibé Saul nafatin haklaken.

¹⁶ Tinan tolu liutiha, ema Judeu iha Damasku nafatin kontra Saul. Ikusmai sira koko atu oho nia. (Após 9:23; 2 Kor 11:32, 33; Gal 1:13-18) Bainhira Saul hatene kona-ba planu aat neʼe, nia deside atu sai husi sidade hodi husik ema seluk hatún nia ho bote boot liuhusi janela neʼebé iha sidade nia moru. Lucas bolu sira neʼebé ajuda Saul nuʼudar “[Saul nia] dixípulu sira”. (Após 9:25) Liafuan sira-neʼe hatudu katak ema balu iha Damasku troka sira-nia hahalok no sai Kristu nia dixípulu.

17. (a) Ema balu nia reasaun mak oinsá kona-ba lia-loos husi Bíblia? (b) Ita presiza kontinua halo saida, no tanbasá?

¹⁷ Bainhira Ita hahú koʼalia ba família, kolega, no ema seluk kona-ba buat diʼak neʼebé Ita aprende, karik Ita hanoin katak ema hotu sei simu lia-loos husi Bíblia tanba neʼe mak lójiku. Karik ema balu simu, maibé ema barak lae. Karik Ita-nia família balu haree Ita nuʼudar inimigu. (Mt 10:32-38) Maski nuneʼe, se Ita kontinua aumenta Ita-nia matenek atu  esplika Eskritura sira no hatudu hahalok Kristaun, karik sira bele troka sira-nia hanoin.—Após 17:2; 1 Ped 2:12; 3:1, 2, 7.

18, 19. (a) Bainhira Barnabé ajuda Saul, neʼe lori rezultadu saida? (b) Oinsá mak ita bele banati-tuir Barnabé no Saul?

¹⁸ Kuandu Saul toʼo iha Jeruzalein, dixípulu sira la fiar katak nia sai ona dixípulu ida. Maibé kuandu Barnabé konfirma katak Saul sai ona dixípulu ida, apóstolu sira simu nia no nia hela hamutuk ho sira ba tempu balu. (Após 9:26-28) Saul kuidadu tebes, maibé nia la moe atu koʼalia kona-ba liafuan diʼak. (Rom 1:16) Nia ho aten-brani haklaken iha Jeruzalein, fatin neʼebé uluk nia fó-terus ba Jesus nia dixípulu sira. Ema Judeu iha Jeruzalein hirus kuandu haree Saul neʼebé uluk dirije sira atu halakon ema Kristaun, agora sai fali dixípulu ida. Tan neʼe sira hakarak atu oho nia. Bíblia hatete: “Kuandu maun-alin sira hatene kona-ba neʼe, sira lori nia tun ba Sezareia no haruka nia ba Tarsu.” (Após 9:30) Saul halo tuir Jesus nia matadalan neʼebé nia simu liuhusi kongregasaun. Saul no kongregasaun hetan benefísiu.

¹⁹ Haree toʼok oinsá Barnabé hatudu inisiativu atu ajuda Saul. Ita bele fiar katak neʼe halo sira-nia relasaun belun sai metin liután. Hanesan Barnabé, Ita mós prontu atu ajuda ema foun sira iha kongregasaun, porezemplu haklaken ho sira no ajuda sira atu hakbesik liután ba Jeová ka lae? Hodi halo nuneʼe Ita sei hetan bensaun. Hanesan Saul, se Ita mak haklaken-naʼin foun, Ita prontu atu simu ajuda husi ema seluk ka lae? Hodi haklaken hamutuk ho sira neʼebé iha esperiénsia barak sei ajuda Ita atu aumenta Ita-nia matenek iha serbisu haklaken. Ita sei sente kontente liután no iha relasaun belun neʼebé metin ba nafatin.

20, 21. Oinsá mak Maromak nia povu aproveita “tempu dame nian” iha tempu uluk no tempu modernu?

²⁰ Depois Saul sai tiha dixípulu ida no sai husi Jeruzalein ho seguru, “kongregasaun hotu iha Judeia, Galileia no Samaria tomak tama iha tempu dame nian”. (Após 9:31) Oinsá mak dixípulu sira aproveita tempu dame neʼe? (2 Tim 4:2) Bíblia dehan katak “sira kontinua sai metin liután”. Apóstolu no katuas sira hametin dixípulu sira-nia fiar, no ajuda kongregasaun atu “hamtaʼuk ba Jeová no sente kmaan liuhusi espíritu santu”. Porezemplu, Pedro uza tempu atu hametin dixípulu sira iha sidade Lida iha Rai-Tetuk Saron. Tanba ninia hakaʼas an, ema barak neʼebé hela iha área neʼe “tau fiar ba Naʼi”. (Após 9:32-35) Dixípulu sira la husik buat seluk atu dada sira-nia atensaun, maibé sira hakaʼas an atu tau matan ba malu no mós haklaken kona-ba liafuan diʼak. Rezultadu mak “dixípulu barak aumenta liután”.

 ²¹ Maizumenus iha tinan 1990, Testemuña ba Jeová iha nasaun barak mós tama iha “tempu dame nian”. Governu neʼebé kontra Maromak nia povu ba tinan barak derrepente deʼit lakon sira-nia podér, no lei balu neʼebé bandu serbisu haklaken la aplika tan. Haklaken-naʼin rihun ba rihun aproveita oportunidade atu haklaken ho livre, no neʼe lori rezultadu neʼebé diʼak tebes.

22. Oinsá Ita bele uza didiʼak Ita-nia liberdade?

²² Ita aproveita didiʼak liberdade neʼebé Ita iha ka lae? Se Ita hela iha nasaun neʼebé iha liberdade kona-ba relijiaun, Satanás sei hakarak tebes tenta Ita atu uza Ita-nia tempu hodi buka rikusoin duké serbí Jeová. (Mt 13:22) Keta husik buat ida atu dada Ita-nia atensaun. Maibé uza Ita-nia liberdade ho didiʼak. Rekoñese katak neʼe mak oportunidade atu haklaken ho didiʼak no hametin kongregasaun. Hanoin-hetan, Ita-nia situasaun bele troka derrepente.

23, 24. (a) Saida mak ita bele aprende husi buat neʼebé akontese ba Tabita? (b) Saida mak ita presiza halo?

²³ Hanoin toʼok kona-ba buat neʼebé akontese ba dixípulu ida naran Tabita, ka Dorkada. c Nia hela iha Jope neʼebé la dook husi Lida. Irmán laran-metin neʼe uza ninia tempu no sasán ho matenek, nia “halo hahalok diʼak barak no nia fó ajuda ba ema kiak sira”. Triste mak nia sai moras no mate. Dixípulu sira iha Jope, liuliu feto-faluk sira neʼebé nia ajuda triste tebes tanba nia mate. Bainhira Pedro toʼo uma neʼebé hatoba ninia mate-isin, Pedro halo milagre neʼebé apóstolu sira seluk seidauk halo. Pedro halo orasaun no tuirmai halo Tabita moris fali! Imajina toʼok ksolok neʼebé feto-faluk no dixípulu seluk sente bainhira Pedro bolu sira atu tama ba kuartu no haree Tabita moris fali. Situasaun neʼe hametin duni sira atu bele tahan hasoru susar sira neʼebé atu mai. “Ema hotu iha Jope hatene kona-ba neʼe, no ema barak tau fiar ba Naʼi.”—Após 9:36-42.

²⁴ Ita bele aprende pontu importante rua husi buat neʼebé akontese ba Tabita. (1) Ita-nia moris bele troka derrepente. Importante atu iha naran diʼak ho Maromak kuandu ita sei iha oportunidade atu halo ida-neʼe! (Ecle 7:1) (2) Moris-hiʼas sei akontese duni. Jeová haree Tabita nia hahalok diʼak no fó kolen ba nia. Jeová mós sei hanoin-hetan ita-nia hakaʼas an no sei  fó moris-hiʼas ba ita se ita mate antes Armagedon. (Ebr 6:10) Entaun maski ita tahan daudaun “tempu neʼebé susar” ka moris “iha tempu dame nian”, mai ita hakaʼas an atu kontinua haklaken kona-ba Kristu.—2 Tim 4:2.