KAPÍTULU 5
“Ami tenke halo tuir Maromak nuʼudar ukun-naʼin”
Apóstolu sira sai nuʼudar ezemplu ba ema Kristaun hotu neʼebé loos
Bazeia ba Apóstolu 5:12–6:7
1-3. (a) Tanbasá ema lori apóstolu sira ba Sinédriu, no pergunta importante mak saida? (b) Tanbasá ita presiza hatene kona-ba saida mak apóstolu sira halo?
JUÍS sira iha Sinédriu sai hirus makaʼas! Jesus nia apóstolu sira hetan tesi-lia iha tribunál. Tanbasá? Amlulik boot no ulun-naʼin Sinédriu nian naran José Caifás hatete ba sira ho hirus: “Ami haruka ona imi atu labele koʼalia tan hodi naran neʼe.” Tanba hirus makaʼas, Caifás lakohi temi Jesus nia naran. Maibé nia hatutan tan: “Imi halo nakonu Jeruzalein ho imi-nia hanorin, no imi hakarak atu fó-sala ba ami kona-ba mane neʼe nia raan.” (Após 5:28) Mandamentu mak klaru: Labele haklaken tan, se lae hetan kastigu!
2 Apóstolu sira sei halo saida? Jesus mak haruka sira atu haklaken no nia simu podér husi Maromak. (Mt 28:18-20) Apóstolu sira sei taʼuk ba ema no para haklaken ka lae? Ka sira sei hatudu aten-brani no kontinua haklaken? Pergunta importante mak: Sira sei halo tuir Maromak ka ema? Apóstolu Pedro hatán kedas hodi reprezenta apóstolu sira seluk. Ninia liafuan mak klaru no brani.
3 Nuʼudar ema Kristaun loos, ita hakarak tebes atu hatene saida mak apóstolu sira halo bainhira Sinédriu ameasa sira. Ita mós presiza halo tuir Jesus nia mandamentu atu haklaken. No bainhira ita halaʼo serbisu neʼe, karik ita mós sei hasoru susar. (Mt 10:22) Karik kontradór sira koko atu hanetik ka bandu ita-nia serbisu. Ita sei halo saida? Ita bele hetan benefísiu hodi aprende husi buat neʼebé ajuda apóstolu sira atu aten-brani no saida mak akontese antes sira hetan tesi-lia iha Sinédriu. a
“Jeová nia anju loke odamatan” (Apóstolu 5:12-21a)
4, 5. Tanbasá Caifás no ema Saduseu seluk sai “laran-moras tebes”?
4 Hanoin-hetan primeiravés ema bandu apóstolu sira atu haklaken, Pedro no João hatán: “Ami labele para atu koʼalia kona-ba buat neʼebé ami haree no rona ona.” (Após 4:20) Depois akontesimentu neʼe liutiha, Pedro no João hamutuk ho apóstolu sira seluk kontinua haklaken iha templu. Apóstolu sira halo milagre oioin, hanesan kura ema moras no duni sai anju aat sira. Sira halo ida-neʼe iha “Salomão nia Pórtiku”, neʼe mak iha templu nia parte sorin leste no baibain ema Judeu barak halibur iha neʼebá. Ema neʼebé moras mós hetan kura bainhira Pedro nia lalatak kona sira! Ema barak neʼebé hetan kura iha dalan fíziku mós simu liafuan diʼak. Rezultadu mak “mane ho feto barak tan hatudu fiar ba Naʼi no sai dixípulu”.—Após 5:12-15.
5 Caifás no ema Saduseu seluk sai “laran-moras tebes” no haruka guarda atu hatama apóstolu sira ba komarka. (Após 5:17, 18) Tanbasá sira sai hirus tebes? Apóstolu sira hanorin katak Jesus moris hiʼas ona, maibé ema Saduseu la fiar kona-ba moris hiʼas. Apóstolu sira dehan katak hodi tau fiar ba Jesus deʼit mak ita bele hetan salvasaun. Maibé ema Saduseu taʼuk katak governu Roma sei fó-kastigu ba sira se povu simu Jesus nuʼudar Ulun-Naʼin. (João 11:48) Tan neʼe ita la hakfodak bainhira ema Saduseu sira hakarak hapara apóstolu sira atu haklaken!
6. Tanbasá Jeová nia povu ohin loron hetan terus, no tanbasá ita la hakfodak?
6 Ohin loron ema fó-terus ba Jeová nia povu tanba ulun-naʼin relijiaun sira bobar lia. Kontradór sira-neʼe uza sira-nia podér atu fó influénsia ba governu no média atu hapara serbisu haklaken. Ita la hakfodak ho ida-neʼe. Ita-nia serbisu haklaken hatudu sai katak ulun-naʼin relijiaun sira mak bosok-teen. Bainhira ema laran-loos simu lia-loos husi Bíblia, sira sai livre husi hanorin no toman neʼebé la tuir Bíblia. (João 8:32) Tan neʼe, ita-nia serbisu haklaken halo ulun-naʼin relijiaun sira sai hirus no laran-moras.
7, 8. Oinsá anju nia matadalan fó influénsia ba apóstolu sira? Ita presiza husu pergunta saida ba ita-nia an?
7 Nuʼudar apóstolu sira hein iha komarka atu bá tribunál, karik sira hanoin katak inimigu sei oho sira tanba sira-nia fiar. (Mt 24:9) Maibé iha kalan neʼebá, buat ida akontese neʼebé sira nunka imajina, “Jeová nia anju loke odamatan komarka nian”. b (Após 5:19) Tuirmai anju fó matadalan espesífiku ba sira: “Hamriik iha templu no kontinua koʼalia ba ema.” (Após 5:20) Matadalan neʼe fó konfiansa ba apóstolu sira katak buat neʼebé sira halo mak loos. Karik anju nia liafuan neʼe mós hametin duni sira atu kontinua tahan maski hasoru susar naran deʼit. Ho fiar metin no aten-brani, apóstolu sira “tama ba templu kuandu rai naroman ona no sira hahú hanorin”.—Após 5:21.
8 Ita ida-idak presiza husu ba ita-nia an: ‘Haʼu iha fiar no aten-brani atu kontinua haklaken bainhira hasoru susar hanesan neʼe ka lae?’ Ita bele sai aten-brani liután atu “fó sasin ho didiʼak kona-ba Maromak nia Ukun” tanba ita hatene katak anju sira mak apoia serbisu importante neʼe.—Após 28:23; Apok 14:6, 7.
“Ami tenke halo tuir Maromak nuʼudar ukun-naʼin duké halo tuir ema” (Apóstolu 5:21b-33)
“Entaun, sira lori apóstolu sira bá hodi hamriik iha Sinédriu nia oin.”—Apóstolu 5:27
9-11. Apóstolu sira halo saida kuandu Sinédriu haruka sira para haklaken? Oinsá ema Kristaun neʼebé loos bele halo tuir apóstolu sira-nia ezemplu?
9 Caifás no juís sira iha Sinédriu prontu ona atu tesi-lia ba apóstolu sira. Maibé sira seidauk hatene buat neʼebé akontese iha komarka, tan neʼe sira haruka guarda atu lori apóstolu sira mai Sinédriu. Imajina toʼok oinsá guarda sira hakfodak bainhira hatene katak apóstolu sira la iha neʼebá maski komarka xave metin hela, seguru no “guarda sira mós hamriik iha odamatan”. (Após 5:23) Lakleur deʼit, xefe ba templu rona katak apóstolu sira haklaken hela kona-ba Jesus Kristu iha templu, maski loloos neʼe mak razaun tanbasá sira tama komarka! Xefe ba templu no guarda sira bá lalais templu no kaer apóstolu sira hodi lori ba Sinédriu.
10 Hanesan temi ona, ulun-naʼin relijiaun sira hirus makaʼas no haruka apóstolu sira atu para haklaken. Saida mak apóstolu sira halo? Pedro koʼalia ho brani hodi reprezenta apóstolu sira seluk: “Ami tenke halo tuir Maromak nuʼudar ukun-naʼin duké halo tuir ema.” (Após 5:29) Hodi halo nuneʼe, apóstolu sira hatudu ezemplu diʼak ba ema Kristaun neʼebé loos. Ita la presiza halo tuir autoridade sira se sira bandu ita atu halo tuir buat neʼebé Maromak haruka. Tan neʼe, se autoridade sira bandu serbisu haklaken, ita sei la para atu haklaken kona-ba liafuan diʼak. (Rom 13:1) Maibé ita sei kontinua haklaken ho didiʼak iha dalan neʼebé la dada autoridade sira-nia atensaun.
11 Bainhira apóstolu sira hatán ho aten-brani, neʼe halo ulun-naʼin relijiaun sira sai hirus tebes. Sira hakarak tebes atu “oho apóstolu sira”. (Após 5:33) Apóstolu sira hanoin katak sira sei hetan kastigu-mate, maibé Jeová ajuda sira iha dalan neʼebé kmanek tebes!
“Imi sei labele halakon sira” (Apóstolu 5:34-42)
12, 13. (a) Gamaliel fó sai saida ba juís sira, no sira halo saida? (b) Oinsá Jeová bele ajuda ninia povu ohin loron, no ita bele iha konfiansa saida se Maromak husik ita ‘hetan terus tanba halo hahalok loos’?
12 Tuirmai Gamaliel c defende apóstolu sira. Nia mak “mestre Ukun-Fuan nian neʼebé povu hotu respeitu”, inklui juís sira. Bainhira “nia haruka atu lori [apóstolu sira] sai ba liʼur ba tempu uitoan”, sira hotu rona ba nia. (Após 5:34) Nia temi ezemplu husi kontradór sira antes neʼe, neʼebé lakon tiha bainhira sira-nia ulun-naʼin mate. Tan neʼe, nia husu ba juís sira atu hein deʼit ho pasiénsia tanba karik ikusmai apóstolu sira mós sei lakon. Tuir loloos, sira-nia Ulun-Naʼin foin mate. Gamaliel koʼalia iha dalan lójiku, hodi dehan: “Keta hanetik ema sira-neʼe, maibé husik sira bá. Tanba se sira-nia planu neʼe ka serbisu neʼe mak husi ema, ida-neʼe sei lakon tiha. Maibé se ida-neʼe mai husi Maromak, imi sei labele halakon sira. Tanba se imi hanetik sira, karik imi halo funu hasoru Maromak rasik.” (Após 5:38, 39) Juís sira halo tuir nia. Maibé sira nafatin haruka ema atu baku apóstolu sira ho xikote no bandu sira “atu labele koʼalia tan hodi Jesus nia naran”.—Após 5:40.
13 Ohin loron Jeová mós bele uza ema neʼebé iha podér hanesan Gamaliel atu ajuda ninia povu. (Prov 21:1) Jeová bele uza ninia espíritu santu atu book ulun-naʼin, juís, no sira neʼebé iha podér atu halo tuir ninia hakarak. (Neem 2:4-8) Se Jeová husik ita “hetan duni terus tanba halo hahalok loos”, ita bele iha konfiansa kona-ba buat rua. (1 Ped 3:14) Primeiru, Maromak bele fó ita kbiit atu tahan. (1 Kor 10:13) Segundu, kontradór sira “sei labele halakon” Maromak nia serbisu.—Isa 54:17.
14, 15. (a) Apóstolu sira sente oinsá bainhira hetan tiha baku, no tanbasá? (b) Konta toʼok esperiénsia neʼebé hatudu katak Jeová nia povu tahan ho kontente.
14 Bainhira hetan tiha baku, apóstolu sira sai laran-kraik no rende an ka lae? Lae! Sira “sai husi Sinédriu nia oin no sira haksolok”. (Após 5:41) Tanbasá sira haksolok? Maski sira sente moras, maibé sira nafatin haksolok tanba hatene katak ema fó-terus ba sira tanba sira laran-metin ba Jeová no banati-tuir Jesus.—Mt 5:11, 12.
15 Hanesan ema Kristaun iha tempu uluk, ita mós tahan ho kontente bainhira hetan terus tanba lia-loos. (1 Ped 4:12-14) Klaru katak ita la gosta ema ameasa, fó-terus, ka hatama ita ba komarka. Maibé ita sente kontente tanba kontinua hatudu laran-metin. Hanoin toʼok kona-ba Henryk Dornik neʼebé kontinua tahan ba tinan barak maski hetan terus husi governu. Iha fulan-Agostu tinan 1944, autoridade sira hatama nia no ninia maun ba kampu-konsentrasaun ida. Kontradór balu hatete: “Saugati deʼit atu obriga sira halo tuir ita. Sira prontu mate tanba sira-nia fiar.” Irmaun Henryk dehan: “Haʼu lakohi mate. Maibé haʼu kontente tanba haʼu bele tahan terus ho laran-metin, nafatin aten-brani, no la lakon haʼu-nia dignidade.”—Tgo 1:2-4.
Hanesan apóstolu sira, ita mós haklaken “husi uma ba uma
16. Oinsá mak apóstolu sira hatudu katak sira hakarak haklaken ho didiʼak? Oinsá mak ita bele banati-tuir sira?
16 Apóstolu sira komesa kedas atu haklaken. Ho aten-brani, “loroloron iha templu no husi uma ba uma”, sira kontinua “haklaken liafuan diʼak kona-ba Kristu”. d (Após 5:42) Haklaken-naʼin sira-neʼe laran-manas atu haklaken ho didiʼak. Sira haklaken husi uma ba uma hodi tuir Jesus Kristu nia mandamentu. (Mt 10:7, 11-14) Iha dalan hanesan neʼe mak sira bele halo nakonu Jeruzalein ho sira-nia hanorin. Ohin loron ema koñese Testemuña ba Jeová tanba sira halo tuir apóstolu sira-nia ezemplu kona-ba haklaken. Bainhira ita hakaʼas an atu haklaken ba uma ida-idak iha ita-nia haklaken-fatin, ita hatudu katak ita hakarak fó sasin ho didiʼak no fó oportunidade ba ema hotu atu rona ba liafuan diʼak. Jeová haraik ninia bensaun ba arranju atu haklaken husi uma ba uma. Ohin loron ema barak tebes mak simu lia-loos, no barak mak hetan lia-loos bainhira Testemuña haklaken ba sira iha sira-nia uma.
Mane sira neʼebé kumpre kritéria mak “kaer knaar” (Apóstolu 6:1-6)
17-19. Problema saida mak mosu, no apóstolu sira fó matadalan saida atu rezolve?
17 Kongregasaun neʼebé foin harii hasoru problema ida neʼebé mai husi laran. Neʼe mak saida? Sira barak neʼebé hetan batizmu iha Jeruzalein hakarak atu aprende liután antes fila ba sira-nia hela-fatin. Dixípulu sira neʼebé hela iha Jeruzalein ho hakarak rasik fó osan kontribuisaun atu sosa ai-han no sasán seluk hodi apoia sira neʼebé mai iha Jeruzalein. (Após 2:44-46; 4:34-37) Iha tempu neʼebá mak mosu problema ida. Bainhira dixípulu sira fahe ai-han loroloron nian, feto-faluk neʼebé koʼalia lian Gregu “la hetan ai-han”. (Após 6:1) Maibé feto-faluk neʼebé koʼalia lian Ebraiku hetan. Entaun problema mak dixípulu sira hatudu diskriminasaun. No neʼe bele halakon unidade iha kongregasaun.
18 Apóstolu sira neʼebé serbí nuʼudar grupu administradór rekoñese katak la matenek se sira “husik Maromak nia liafuan tan deʼit atu fahe ai-han”. (Após 6:2) Atu rezolve problema neʼe, sira haruka dixípulu sira atu buka mane naʼin-hitu neʼebé “nakonu ho Maromak nia espíritu no matenek” atu apóstolu sira hili hodi “kaer knaar neʼe”. (Após 6:3) Presiza duni mane sira neʼebé kumpre kritéria tanba serbisu neʼe laʼós deʼit atu fahe ai-han, maibé mós atu tau matan ba osan, sosa sasán, no mós halo relatóriu. Mane hotu neʼebé sira hili mak iha naran Gregu, karik neʼe ajuda feto-faluk sira-neʼe atu tau fiar ba sira. Apóstolu sira hanoin didiʼak kona-ba mane sira-neʼe no halo orasaun, tuirmai sira hili mane naʼin-hitu atu “kaer knaar neʼe”. e
19 Tanba mane naʼin-hitu neʼe okupadu atu fahe hahán, neʼe katak sira la presiza haklaken ka lae? Lae! Mane ida husi sira neʼebé naran Estevão mak haklaken-naʼin neʼebé haklaken ho brani no badinas. (Após 6:8-10) Filipe mós ida husi mane naʼin-hitu no Bíblia temi nia nuʼudar “haklaken-naʼin”. (Após 21:8) Klaru katak sira kontinua haklaken ho laran-manas.
20. Oinsá Jeová nia povu ohin loron halo tuir ezemplu husi apóstolu sira?
20 Ohin loron Jeová nia povu halo tuir apóstolu sira-nia ezemplu kona-ba hili mane ida atu halaʼo knaar iha kongregasaun. Mane sira neʼebé hetan rekomendasaun atu kaer knaar tenke iha hanoin neʼebé hanesan ho Jeová no hatudu hahalok neʼebé mai husi espíritu santu. Mane sira neʼebé kumpre kritéria husi Bíblia mak simu knaar atu serbí nuʼudar katuas ka atan ba kongregasaun. f (1 Tim 3:1-9, 12, 13) Sira neʼebé kumpre kritéria hetan knaar neʼe liuhusi espíritu santu. Mane sira-neʼe halo serbisu ho badinas atu tau matan ba buat importante oioin. Porezemplu, katuas kongregasaun halo arranju atu ajuda sira neʼebé idade ona no presiza apoia. (Tgo 1:27) Katuas balu okupadu atu harii Reuniaun-Fatin, organiza reuniaun boot, ka serbí nuʼudar Komisaun neʼebé Komunika ho Ospitál. Atan ba kongregasaun tau matan ba knaar neʼebé laʼós liga ho vizita bibi-atan nian ka hanorin. Irmaun sira-neʼe presiza tau matan ba knaar sira iha kongregasaun no mós kontinua haklaken.—1 Kor 9:16.
“Maromak nia liafuan kontinua habelar” (Apóstolu 6:7)
21, 22. Saida mak hatudu katak Jeová fó bensaun ba kongregasaun neʼebé foun?
21 Ho Jeová nia ajuda, kongregasaun foun bele tahan problema neʼebé mosu iha kongregasaun laran no mai husi liʼur. Jeová fó bensaun, tanba Bíblia dehan: “Maromak nia liafuan kontinua habelar, no dixípulu sira kontinua aumenta barak tan iha Jeruzalein, no amlulik barak mós sai fiar-naʼin.” (Após 6:7) Neʼe mak relatóriu ida deʼit husi relatóriu barak neʼebé temi iha livru Apóstolu. (Após 9:31; 12:24; 16:5; 19:20; 28:31) Ohin loron, ita mós hetan anima bainhira rona relatóriu kona-ba oinsá serbisu haklaken iha mundu tomak laʼo ba oin.
22 Iha apóstolu sira-nia tempu, ulun-naʼin relijiaun neʼebé hirus kontinua fó-terus ba apóstolu sira. Sira mós hasoru susar seluk tan. Lakleur deʼit, ema fó-terus ba Estevão. Ita sei aprende kona-ba neʼe iha kapítulu tuirmai.
a Haree kaixa “ Sinédriu mak ema Judeu nia tribunál aas liu”.
b Livru Apóstolu temi kona-ba anju sira hamutuk dala 20, no versíkulu neʼe mak dala primeiru neʼebé livru Apóstolu temi kona-ba anju sira. Antes neʼe, iha Apóstolu 1:10 temi anju sira nuʼudar ‘mane neʼebé hatais roupa mutin’.
c Haree kaixa “ Gamaliel mak mestre neʼebé ema seluk respeitu”.
d Haree kaixa “Haklaken ‘husi uma ba uma’”.
e Karik mane sira-neʼe hatudu hahalok diʼak hanesan katuas kongregasaun sira tanba atu “kaer knaar neʼe” mak sériu. Bíblia la fó sai kona-ba horibainhira mak mane sira komesa hetan knaar nuʼudar katuas atu tau matan ba kongregasaun Kristaun.
f Iha tempu uluk, irmaun sira neʼebé kumpre kritéria bele hili irmaun ida atu serbí nuʼudar katuas kongregasaun. (Após 14:23; 1 Tim 5:22; Tito 1:5) Ohin loron, Grupu Administradór mak hili katuas área, no katuas área mak hili katuas kongregasaun no atan ba kongregasaun.
