1-3. Saida mak akontese bainhira Jesus mosu ba dala ikus ba ninia dixípulu sira? No neʼe hamosu pergunta saida deʼit?

 BAINHIRA Jesus mate, ninia apóstolu sira triste tebes. Maibé kuandu Jesus hetan moris-hiʼas, sira kontente tebes. Durante loron 40, Jesus mosu beibeik ba sira hodi hanorin no anima sira. Sira kontente atu hamutuk ho Jesus no lakohi atu nia husik hela sira. Maibé ikusmai Jesus mosu ba sira ba dala ikus.

² Apóstolu sira hamriik hamutuk iha Foho Oliveira, no rona didiʼak ba Jesus nia liafuan hotu, sira lakohi nia para atu hanorin sira. Depois nia koʼalia hotu tiha, nia foti ninia liman hodi haraik bensaun ba sira. Tuirmai nia komesa saʼe ba lalehan! Ninia dixípulu sira kontinua hateke nuʼudar nia saʼe ba lalehan. Ikusmai, kalohan taka netik no sira la haree tan nia. Nia la iha ona, maibé sira kontinua hateke saʼe ba lalehan.—Lc 24:50; Após 1:9, 10.

 ³ Akontesimentu importante neʼe troka duni apóstolu sira-nia moris. Agora sira-nia Naʼi, Jesus Kristu saʼe ona ba lalehan, entaun sira sei halo saida? Ita bele fiar katak Jesus prepara ona sira atu kontinua halo serbisu neʼebé nia hahú. Oinsá mak nia prepara sira? Saida mak sira halo? No ema Kristaun ohin loron bele aprende saida? Kapítulu primeiru husi livru Apóstolu fó resposta ba pergunta sira-neʼe.

4. Lucas hahú livru Apóstolu hodi hakerek kona-ba saida?

⁴ Lucas hahú livru Apóstolu hodi kumprimenta Teófilo. Antes neʼe, Lucas hakerek ona ninia Evanjellu ba Teófilo. a Lucas hahú livru Apóstolu hodi halo rezumu badak kona-ba akontesimentu neʼebé nia hakerek iha Evanjellu Lucas nia rohan. Nuneʼe lee-naʼin bele hatene katak nia sei hakerek kona-ba buat neʼebé akontese depois Jesus mate.

5, 6. (a) Saida mak ajuda Jesus nia dixípulu sira atu iha fiar neʼebé metin nafatin? (b) Ema Kristaun ohin loron nia fiar bazeia ba prova saida?

⁵ Saida mak ajuda Jesus nia dixípulu sira atu iha fiar neʼebé metin nafatin? Apóstolu 1:3 hatete kona-ba Jesus: “Nia mosu ba sira dala barak hodi fó prova katak nia moris-hiʼas ona.” Iha versíkulu neʼe, “doutór Lucas” uza liafuan neʼebé tradús nuʼudar “fó prova”. (Kol 4:14) Iha tempu neʼebá doutór sira mak uza fraze neʼe, no neʼe signifika evidénsia neʼebé forte no klaru. No Jesus hatudu duni evidénsia hodi mosu ba ninia dixípulu dala barak. Dala ruma nia mosu ba ema ida ka rua, dala ruma nia mosu ba ninia apóstolu hotu, no dala ida nia mosu ba ninia dixípulu naʼin-500. (1 Kor 15:3-6) Neʼe mak prova neʼebé klaru duni!

⁶ Ohin loron ema Kristaun nia fiar mós bazeia ba “prova” neʼebé klaru. Iha duni prova katak uluk Jesus moris iha rai, mate tanba ita-nia sala, no moris-hiʼas ka lae? Sin, iha duni. Bíblia fó sai kona-ba ema neʼebé sai sasin ba akontesimentu sira-neʼe, no neʼe sai nuʼudar prova neʼebé ita bele tau fiar. Bainhira ita estuda akontesimentu sira-neʼe no halo orasaun ba Jeová atu ajuda ita komprende buat neʼebé ita lee, ita-nia fiar sei sai metin liután. Hanoin-hetan, ita presiza iha prova neʼebé klaru atu iha fiar neʼebé metin. No ita presiza iha fiar neʼebé metin atu hetan moris rohan-laek.—João 3:16.

7. Jesus hatudu ezemplu saida kona-ba haklaken no hanorin?

⁷ Jesus mós koʼalia “kona-ba Maromak nia Ukun”. Porezemplu, nia esplika profesia neʼebé hatudu katak Mesias tenke hetan terus no  mate. (Lc 24:13-32, 46, 47) Bainhira Jesus esplika ninia knaar nuʼudar Mesias, nia mós esplika katak nia sei sai Liurai ba Maromak nia Ukun no buat neʼebé Ukun neʼe sei kumpre iha futuru. Jesus sempre haklaken kona-ba Maromak nia Ukun, no ohin loron mós Jesus nia dixípulu sira haklaken kona-ba Maromak nia Ukun.—Mt 24:14; Lc 4:43.

8, 9. (a) Jesus nia apóstolu hanoin sala kona-ba saida? (b) Oinsá Jesus hadiʼa apóstolu sira-nia hanoin, no neʼe hanorin saida mai ita ohin loron?

⁸ Bainhira apóstolu sira halibur hamutuk iha Foho Oliveira, neʼe mak sira-nia tempu ikus atu hamutuk ho Jesus iha rai. Ho laran-manas sira husu: “Naʼi, Ita-Boot sei hadiʼa fali Izraél nia ukun iha tempu neʼe ka lae?” (Após 1:6) Pergunta neʼe hatudu katak apóstolu sira hanoin sala kona-ba pontu rua. Primeiru, sira hanoin katak Maromak nia Ukun sei harii iha Izraél. Segundu, sira hanoin katak Maromak nia Ukun sei hahú kedas “iha tempu neʼe”. Oinsá mak Jesus hadiʼa sira-nia hanoin?

⁹ Karik Jesus hatene katak lakleur tan sira sei komprende katak ideia primeiru mak sala. Liutiha loron sanulu, ninia dixípulu sira haree nasaun foun ida hahú, neʼe mak Izraél Maromak nian. Depois neʼe, nasaun Izraél laʼós tan Maromak nia povu neʼebé espesiál. Kona-ba ideia segundu, Jesus fó-hanoin ba sira hodi dehan: “Imi la presiza hatene oras no tempu, tanba Aman deʼit mak iha direitu atu deside.” (Após 1:7) Jeová deʼit mak iha podér atu deside bainhira mak nia sei kumpre ninia hakarak. Kuandu Jesus iha rai, nia hatete katak nia rasik la hatene “loron no oras” bainhira mundu neʼe nia rohan sei mai, “só Aman deʼit mak hatene”. (Mt 24:36) Ohin loron, se ema Kristaun hahú hanoin barak kona-ba bainhira mak mundu nia rohan sei mai, tuir loloos sira hanoin barak kona-ba buat neʼebé sira la presiza hanoin.

10. Hahalok saida deʼit mak ita hakarak banati-tuir husi apóstolu sira, no tanbasá?

¹⁰ Ita lakohi hanoin sala kona-ba Jesus nia apóstolu sira, tanba loloos sira iha fiar neʼebé metin. Sira simu Jesus nia konsellu ho haraik an. Liután neʼe, maski sira iha hanoin neʼebé sala, sira-nia pergunta hatudu katak sira iha hahalok neʼebé diʼak. Jesus hatete beibeik ba ninia dixípulu sira: “Matan-moris nafatin bá.” (Mt 24:42; 25:13; 26:41) Sira hakarak tebes atu hatene buat neʼebé Jeová sei halo tuirmai. Ohin loron ita mós hakarak atu haburas hahalok neʼe. Importante tebes atu kontinua matan-moris tanba ita moris iha “loron ikus sira”.—2 Tim 3:1-5.

11, 12. (a) Jesus haruka ninia dixípulu sira atu halo saida? (b) Tanbasá mak Jesus liga espíritu santu ho serbisu haklaken?

¹¹ Jesus fó-hanoin apóstolu sira kona-ba buat neʼebé sira tenke tau uluk iha sira-nia moris. Nia hatete: “Kuandu espíritu santu tun ba imi,  imi sei simu kbiit, no imi sei sai haʼu-nia testemuña iha Jeruzalein, iha Judeia tomak no iha Samaria, no toʼo rai sira neʼebé dook liu iha mundu.” (Após 1:8) Jesus haruka apóstolu sira atu haklaken uluk iha Jeruzalein kona-ba ninia moris-hiʼas, fatin neʼebé uluk ema oho Jesus. Tuirmai sira sei haklaken iha Judeia, Samaria, no iha rai sira neʼebé dook liu.

¹² Antes Jesus haruka dixípulu sira haklaken, nia fó-hanoin sira katak nia sei haraik espíritu santu atu ajuda sira. Iha lian orijinál, liafuan “espíritu santu” mosu dala 40 liu iha livru Apóstolu. Dala barak livru neʼe hatudu ho klaru katak ita labele kumpre Jeová nia hakarak se espíritu santu la ajuda ita. Tan neʼe, importante tebes atu halo orasaun beibeik hodi husu espíritu santu! (Lc 11:13) Agora ita presiza duni ida-neʼe.

13. Ohin loron Maromak nia povu haklaken toʼo iha neʼebé, no tanbasá ita presiza halo serbisu neʼe ho badinas?

¹³ Iha apóstolu sira-nia tempu, liafuan “toʼo rai sira neʼebé dook liu iha mundu” refere ba parte balu deʼit iha mundu. Maibé agora, ita haklaken iha mundu tomak. Testemuña ba Jeová ho laran tomak simu knaar atu haklaken tanba hatene katak Maromak hakarak ema hotu atu rona liafuan diʼak kona-ba ninia Ukun. (1 Tim 2:3, 4) Ita halo serbisu neʼe ho badinas ka lae? Ita sei sente kontente tanba halo serbisu neʼe! Jeová sei fó kbiit neʼebé Ita presiza atu haklaken. Livru Apóstolu fó sai dalan diʼak atu haklaken no mós hahalok neʼebé Ita presiza haburas atu bele haklaken ho didiʼak.

14, 15. (a) Saida mak anju sira hatete kona-ba Jesus sei fila fali mai, no neʼe katak sá? (Haree mós nota-rodapé.) (b) Tanbasá ita bele dehan katak Kristu mai fali “iha dalan neʼebé hanesan” ho dalan neʼebé nia saʼe ba lalehan?

¹⁴ Hanesan temi ona iha kapítulu neʼe, Jesus saʼe ba lalehan no dixípulu sira la haree tan nia. Maski nuneʼe, apóstolu naʼin-11 kontinua hateke ba lalehan. Ikusmai, anju naʼin-rua mosu no dehan ba sira: “Ema Galileia sira, tanbasá mak imi hamriik hodi hateke ba lalehan? Jesus neʼebé saʼe ona ba lalehan, sei fila fali mai iha dalan neʼebé hanesan imi haree nia saʼe ba lalehan.” (Após 1:11) Anju nia liafuan la dehan katak Jesus sei mai fali ho isin neʼebé hanesan, hanesan relijiaun balu hanorin. Oinsá ita hatene ida-neʼe?

¹⁵ Anju hatete katak Jesus sei fila fali laʼós ho isin neʼebé hanesan, maibé “iha dalan neʼebé hanesan”. b Nia saʼe ba lalehan iha dalan oinsá? Apóstolu sira la haree tan Jesus bainhira anju koʼalia ho sira. Apóstolu sira deʼit mak haree no rekoñese katak Jesus husik ona mundu no saʼe ba lalehan hodi hamutuk ho ninia Aman. Kristu mós sei fila fali iha dalan neʼebé hanesan. No neʼe akontese duni. Ohin loron, só  ema neʼebé komprende Eskritura mak rekoñese katak Jesus ukun ona nuʼudar Liurai. (Lc 17:20) Ita mós presiza rekoñese ida-neʼe no ajuda ema seluk atu komprende katak sira presiza serbí Maromak agora.

16-18. (a) Apóstolu 1:13, 14 hanorin saida mai ita kona-ba dalan neʼebé ema Kristaun halibur hamutuk? (b) Saida mak ita bele aprende husi Jesus nia inan Maria nia ezemplu? (c) Tanbasá reuniaun sira importante ohin loron?

¹⁶ Apóstolu sira “fila fali ba Jeruzalein ho ksolok boot”. (Lc 24:52) Oinsá mak sira sei halo tuir Jesus nia matadalan no hanorin? Apóstolu kapítulu 1 versíkulu 13 no 14 hatete katak apóstolu sira halibur hamutuk iha “kuartu iha andár leten” no iha mós informasaun seluk kona-ba oinsá sira halibur hamutuk. Baibain uma sira iha Palestina iha kuartu iha andár leten neʼebé ema bele saʼe liuhusi eskada iha liʼur. Maski ita la hatene ho loloos, maibé karik neʼe mak kuartu iha Marcos nia inan nia uma neʼebé temi iha Apóstolu 12:12. Kuartu neʼe mak simples no Kristu nia dixípulu sira uza atu halibur hamutuk. Maibé sé-sé mak halibur iha neʼebá? No saida mak sira halo?

¹⁷ Ema neʼebé halibur hamutuk laʼós deʼit apóstolu sira maibé mós iha feto no mane seluk. Feto ida mak Maria, Jesus nia inan. Neʼe mak tempu ikus Bíblia temi kona-ba Maria. Iha tempu neʼebá, Maria la koko atu halo ema seluk hanoin katak nia mak importante liu, maibé ho haraik an nia adora Jeová hamutuk ho irmaun-irmán sira. No ita bele fiar katak nia sente kmaan tanba agora ninia oan-mane naʼin-haat tau fiar ba Jesus. (Mt 13:55; João 7:5) Depois Jesus mate tiha no moris-hiʼas, sira-nia atitude troka.—1 Kor 15:7.

¹⁸ Tanbasá dixípulu sira halibur hamutuk iha tempu neʼebá? Apóstolu 1:14 hatete: “Sira hotu neʼe laran ida deʼit hodi kontinua halo orasaun.” Halibur hamutuk mak buat neʼebé importante ba ema Kristaun. Ita halibur hamutuk atu anima malu, atu simu matadalan no konsellu, no importante liu mak atu adora Jeová. Bainhira ita halo orasaun no kanta iha reuniaun, neʼe halo Jeová kontente no neʼe mós ajuda ita. Entaun mai ita nunka para atu halibur hamutuk hodi adora Jeová no hetan anima!—Ebr 10:24, 25.

19-21. (a) Saida mak ita bele aprende husi Pedro neʼebé nafatin kaer knaar importante? (b) Tanbasá sira presiza hili apóstolu foun, no saida mak ita aprende husi dalan neʼebé sira hili apóstolu foun?

¹⁹ Jesus nia dixípulu sira presiza rezolve situasaun importante ida, no apóstolu Pedro mak tau matan ba situasaun neʼe. (Versíkulu 15-26) Ita hetan anima hodi hatene katak Jeová uza nafatin Pedro maski nia nega Jesus ba dala tolu. (Mc 14:72) Ita hotu mak sala-naʼin, no ita presiza hanoin-hetan katak Jeová mak “diʼak no prontu atu fó perdua”.—Sal 86:5.

 ²⁰ Pedro rekoñese katak sira presiza hili apóstolu foun hodi troka Judas neʼebé la laran-metin ba Jesus. Maibé ho sé? Ema neʼebé atu sai apóstolu tenke hamutuk ho Jesus kuandu nia haklaken iha rai no sai sasin kona-ba ninia moris-hiʼas. (Após 1:21, 22) Jesus mós promete ida-neʼe hodi hatete: “Imi neʼebé laʼo tuir ona haʼu sei tuur mós iha kadunan 12 atu tesi-lia ba Izraél nia suku 12.” (Mt 19:28) Jeová hakarak apóstolu naʼin-12 neʼebé laʼo tuir Jesus kuandu nia haklaken iha rai atu sai nuʼudar “fatuk 12” husi Jeruzalein foun nia fundasaun iha futuru. (Apok 21:2, 14) Tan neʼe Maromak ajuda Pedro atu komprende katak profesia kona-ba “husik ema seluk kaer fali ninia knaar nuʼudar ulun-naʼin” aplika ba Judas.—Sal 109:8.

²¹ Oinsá sira hili apóstolu foun? Liuhusi dada sorteiu. Ema toman halo ida-neʼe iha tempu neʼebá. (Prov 16:33) Maibé neʼe mak dala ikus Bíblia temi kona-ba ema dada sorteiu. Depois Maromak haraik ninia espíritu santu ba Jesus nia dixípulu, sira la presiza tan dada sorteiu. Maibé hanoin toʼok, tanbasá sira halo nuneʼe. Apóstolu sira halo orasaun: “Oh Jeová, Ita-Boot hatene ema hotu nia laran. Hatudu mai ami ema ida husi sira naʼin-rua neʼebé Ita hili ona.” (Após 1:23, 24) Sira hakarak Jeová mak foti desizaun kona-ba neʼe. Jeová hili Matias, karik nia mak ida husi dixípulu naʼin-70 neʼebé Jesus haruka atu haklaken. Ho ida-neʼe Matias sai parte ba apóstolu naʼin-12. c—Após 6:2.

22, 23. Tanbasá ita presiza halo tuir sira neʼebé dirije kongregasaun ohin loron?

²² Istória neʼe fó-hanoin ita katak Maromak hakarak ninia povu atu organiza an. Toʼo ohin loron, irmaun sira hetan knaar atu tau matan ba kongregasaun. Antes atu hili irmaun ida, katuas sira haree didiʼak ba kritéria sira iha Bíblia no halo orasaun hodi husu Maromak nia espíritu santu. Tan neʼe kongregasaun rekoñese katak irmaun sira-neʼe hetan knaar liuhusi espíritu santu. Bainhira ita halo tuir sira-nia matadalan, neʼe ajuda kongregasaun atu iha unidade.—Ebr 13:17.

²³ Jesus nia dixípulu sira-nia fiar sai metin liután tanba haree Jesus moris-hiʼas no tanba mudansa sira neʼebé akontese, tan neʼe sira prontu ba akontesimentu tuirmai. Kapítulu tuirmai sei koʼalia kona-ba neʼe.