KAPÍTULU 10
“Jeová nia liafuan kontinua habelar”
Anju ida halo Pedro livre, no liafuan diʼak kontinua habelar maski ema fó-terus makaʼas
Bazeia ba Apóstolu 12:1-25
1-4. Pedro hasoru situasaun susar saida, no se Ita iha ninia situasaun Ita sei sente oinsá?
KUANDU soldadu taka komarka nia portaun, Pedro bele rona portaun nia lian makaʼas. Pedro nia liman kesi metin ho korrente neʼebé liga ba guarda Roma naʼin-rua neʼebé laʼo iha ninia sorin-sorin atu lori nia ba ninia sela. Tuirmai, nia presiza hein ba oras barak, karik ba loron balu atu hatene saida mak sei akontese ba nia. Iha sela laran, nia bele hateke deʼit parede, korrente neʼebé kesi hela nia, no mós guarda sira.
2 Tuirmai, Pedro simu julgamentu neʼebé todan tebes. Liurai Herodes Agripa I hakarak Pedro atu hetan kastigu-mate. a Depois festa Páskua, Herodes hakarak hatudu Pedro ba ema-lubun no atu fó kastigu-mate ba Pedro nuʼudar prezente ba ema-lubun. Neʼe laʼós deʼit liafuan ameasa. Antes neʼe, Herodes mós fó kastigu-mate ba apóstolu Tiago.
3 Imajina toʼok kalan antes Herodes hakarak oho Pedro. Saida mak Pedro hanoin kuandu nia mesak iha sela neʼebé nakukun? Karik nia hanoin kona-ba buat neʼebé Jesus hatete ba nia tinan balu antes neʼe, katak loron ida ema sei kaer no oho nia. (João 21:18, 19) Karik Pedro hanoin katak buat neʼebé Jesus fó-hatene nanis sai loos daudaun ona.
4 Se Ita iha Pedro nia situasaun, Ita sei sente oinsá? Ema barak sei sente laran-kraik no hanoin katak sira la iha tan esperansa. Maibé ba Jesus nia dixípulu sira, la iha situasaun ida mak bele halakon duni sira-nia esperansa. Saida mak ita bele aprende husi Pedro no ema Kristaun seluk nia reasaun bainhira ema kontra? Mai ita haree toʼok.
“Kongregasaun halo orasaun ho laran-manas” (Apóstolu 12:1-5)
5, 6. (a) Tanbasá no oinsá mak Liurai Herodes Agripa I fó-terus kongregasaun Kristaun? (b) Tanbasá Tiago nia mate lori susar ba kongregasaun Kristaun?
5 Hanesan ita aprende ona iha kapítulu antes neʼe, bainhira Cornélio no ninia família sai ema Kristaun, neʼe mak akontesimentu importante ida ba kongregasaun Kristaun. Maibé karik ema Judeu sira hakfodak kuandu hatene katak ema Kristaun Judeu halaʼo adorasaun ho ema husi nasaun seluk.
6 Herodes mak polítiku-naʼin neʼebé matenek, no nia haree situasaun neʼe nuʼudar oportunidade atu manán ema Judeu nia laran, tan neʼe nia hahú fó-terus ba ema Kristaun. Herodes “oho João nia maun Tiago ho surik”, karik nia halo nuneʼe tanba rona katak uluk apóstolu Tiago besik loos ho Jesus. (Após 12:2) Situasaun neʼe lori susar ba kongregasaun! Tiago mak ida husi sira naʼin-tolu neʼebé haree Jesus nakfila an no haree milagre seluk neʼebé apóstolu seluk la haree. (Mt 17:1, 2; Mc 5:37-42) Jesus bolu Tiago no ninia alin João nuʼudar “Rai-Tarutu nia Oan” tanba sira laran-manas tebes. (Mc 3:17) Tan neʼe, kongregasaun lakon haklaken-naʼin ida neʼebé aten-brani, laran-metin, no mós apóstolu ida neʼebé sira hadomi.
7, 8. Kongregasaun halo saida kuandu Pedro tama komarka?
7 Ema Judeu kontente hodi haree Tiago mate, no neʼe tuir duni buat neʼebé Herodes hakarak. Neʼe halo nia sai brani liután atu fó-terus ba Pedro. Hanesan temi iha parágrafu primeiru, Herodes haruka guarda atu kaer Pedro. Karik Herodes hanoin-hetan katak antes neʼe apóstolu sira sai husi komarka tanba milagre, hanesan temi iha Kapítulu 5 husi livru neʼe. Tan neʼe, Herodes fó orden atu kesi metin Pedro ho korrente entre guarda naʼin-rua no tau guarda naʼin-16 atu hein troka malu loron no kalan hodi Pedro labele halai sai. Se Pedro halai sai, guarda sira-neʼe mak sei hetan kastigu-mate. Iha situasaun susar hanesan neʼe, saida mak ema Kristaun sira sei halo?
8 Kongregasaun hatene didiʼak saida mak sira presiza halo. Apóstolu 12:5 hatete: “Kuandu Pedro iha hela komarka, kongregasaun halo orasaun ho laran-manas ba Maromak kona-ba nia.” Sin, sira halo orasaun kona-ba Pedro ho laran. Maski Tiago mate, maibé sira la lakon sira-nia fiar. Sira nafatin fiar katak Jeová sei rona ba sira-nia orasaun. Jeová hafolin ema nia orasaun. Se ema halo orasaun hodi tuir Jeová nia hakarak, nia sei hatán. (Ebr 13:18, 19; Tgo 5:16) Neʼe mak lisaun importante ba ema Kristaun ohin loron.
9. Oinsá mak ita bele banati-tuir ema Kristaun neʼebé halo orasaun kona-ba Pedro?
9 Ita hatene kona-ba maluk fiar-naʼin balu neʼebé hasoru daudaun susar ka lae? Karik sira hasoru susar tanba ema fó-terus, governu bandu, ka dezastre naturais. Ita bele halo orasaun kona-ba sira. Karik Ita koñese maluk Kristaun neʼebé hasoru susar neʼebé ema seluk la hatene, hanesan família kontra, laran-kraik, ka susar seluk neʼebé koko sira-nia fiar. Se Ita hanoin kleʼan antes halo orasaun, karik Ita bele hanoin-hetan ema balu nia naran hodi temi sira iha Ita-nia orasaun ba Jeová, “Maromak neʼebé rona ba orasaun”. (Sal 65:2) Klaru katak Ita mós hakarak irmaun-irmán sira halo hanesan neʼe ba Ita, se Ita hasoru susar.
Ita harohan kona-ba irmaun-irmán sira neʼebé tama komarka tanba sira-nia fiar
“Laʼo tuir haʼu” (Apóstolu 12:6-11)
10, 11. Esplika toʼok oinsá Jeová nia anju halo Pedro livre husi komarka.
10 Pedro taʼuk kona-ba buat neʼebé nia sei hasoru ka lae? Ita la hatene ho loloos, maibé durante ninia kalan ikus iha komarka, nia toba-dukur entre guarda naʼin-rua. Pedro fiar metin katak maski buat naran deʼit mak akontese tuirmai, Jeová sei nafatin hanoin-hetan nia. (Rom 14:7, 8) Maibé karik Pedro nunka imajina kona-ba buat furak neʼebé sei akontese. Derrepente deʼit naroman nabilan nakonu iha ninia sela laran. Anju ida hamriik iha neʼebá, maibé karik guarda sira labele haree anju neʼe. Tuirmai anju neʼe fanu lalais Pedro, no korrente neʼebé kesi hela iha ninia liman monu sai mesak!
“Sira toʼo portaun besi neʼebé atu sai husi komarka hodi tama ba sidade, no portaun neʼe nakloke mesak.”—Apóstolu 12:10
11 Anju fó matadalan badak ba Pedro hodi dehan: “Hadeer lalais! . . . Prepara ó-nia an no tau ó-nia sandálias. . . . Tau ó-nia roupa.” Pedro halo tuir kedas. Tuirmai anju neʼe hatete: “Laʼo tuir haʼu”, no Pedro laʼo tuir. Sira sai husi sela laran, laʼo neineik hodi liu guarda sira neʼebé hein hela iha liʼur, no laʼo ba portaun boot neʼebé halo husi besi. Karik Pedro hanoin, oinsá mak sira bele liu portaun neʼe? Maibé kuandu sira hakbesik ba portaun, portaun neʼe nakloke mesak. Tuirmai, sira sai ba liʼur no anju neʼe lakon. Ikusmai Pedro rekoñese katak neʼe laʼós vizaun ida, maibé neʼe realidade. Nia livre ona!—Após 12:7-11.
12. Tanbasá ita bele sente kmaan hodi hanoin kona-ba dalan neʼebé Jeová salva Pedro?
12 Ita bele sente kmaan hodi hanoin kona-ba Jeová nia kbiit neʼebé la iha limitadu atu bele salva ninia atan sira. Pedro sai prizioneiru ba liurai ida neʼebé hetan apoiu husi governu neʼebé iha kbiit boot iha tempu neʼebá. Maski nuneʼe, Pedro bele laʼo sai deʼit husi komarka! Klaru katak Jeová la halo milagre hanesan neʼe atu salva ninia atan hotu. Porezemplu, Jeová la halo hanesan neʼe ba Tiago. Iha akontesimentu seluk, Jeová mós la salva Pedro kuandu Jesus nia liafuan kona-ba Pedro tenke sai loos. Ema Kristaun ohin loron la hein katak Jeová sei salva sira liuhusi milagre. Maski nuneʼe, ita hanoin-hetan katak Jeová nunka troka. (Mal 3:6) No lakleur tan, nia sei uza ninia Oan-Mane atu halo livre ema barak tebes husi komarka neʼebé aat liu, neʼe mak mate. (João 5:28, 29) Promesa neʼe bele ajuda ita atu iha aten-brani bainhira hasoru susar neʼebé boot.
“Sira haree nia no hakfodak” (Apóstolu 12:12-17)
13-15. (a) Kuandu Pedro toʼo iha Maria nia uma, irmaun-irmán sira-nia reasaun mak oinsá? (b) Tuirmai livru Apóstolu koʼalia kona-ba saida, no Pedro kontinua halo saida ba ninia maluk Kristaun sira?
13 Pedro hamriik iha dalan no hanoin kona-ba saida mak nia sei halo. Tuirmai nia halo desizaun. Iha feto Kristaun ida naran Maria neʼebé hela besik neʼebá. Karik nia mak feto-faluk neʼebé riku tanba nia iha uma neʼebé boot atu kongregasaun bele halibur hamutuk. Ninia oan mak João Marcos neʼebé livru Apóstolu temi ba dala primeiru iha akontesimentu neʼe no ikusmai João Marcos sai hanesan oan ba Pedro. (1 Ped 5:13) Iha kalan neʼebá, ema barak halibur iha Maria nia uma maski kalan-boot ona, no sira halo orasaun. Karik sira halo orasaun atu Pedro bele sai livre, maibé sira hakfodak ho dalan neʼebé Jeová hatán ba sira!
14 Pedro dere portaun neʼebé atu tama ba uma neʼe nia pátiu. Atan-feto ida hakbesik ba portaun, ninia naran Rode neʼebé iha lian Gregu signifika “Roza”. Bainhira nia rona Pedro nia lian, nia hakfodak tebes! Duké loke portaun, nia husik deʼit Pedro hamriik iha liʼur, no halai tama kedas ba laran no fó-hatene ba kongregasaun katak Pedro iha liʼur. Maibé sira la fiar ba nia no hanoin katak nia bulak ona. Maski nuneʼe, nia la rende an no kontinua hatete katak buat neʼebé nia koʼalia mak loos. Sira balu komesa fiar nia, maibé sira mós hatete katak karik neʼe mak anju ida neʼebé rona hanesan Pedro. (Após 12:12-15) Pedro kontinua dere portaun toʼo ikusmai sira mós loke.
15 Kuandu sira loke portaun, “sira haree nia no hakfodak”! (Após 12:16) Sira kontente tebetebes no Pedro presiza halo kalma sira hodi nia bele konta kona-ba saida mak akontese. Nia mós haruka sira atu fó-hatene buat sira-neʼe ba dixípulu Tiago no sira seluk. Tuirmai nia bá kedas antes Herodes nia tropa sira bele hetan nia. Pedro kontinua serbí Jeová ho laran-metin iha fatin seluk neʼebé seguru. Dala ikus livru Apóstolu temi kona-ba Pedro mak tempu neʼebé nia ajuda atu rezolve problema kona-ba sirkunsizaun neʼebé temi iha Apóstolu kapítulu 15. Tuirmai livru Apóstolu fokus deʼit kona-ba Paulo nia serbisu haklaken no viajen sira. Maski nuneʼe, ita bele fiar katak Pedro hametin duni irmaun-irmán sira-nia fiar iha fatin neʼebé nia bá. Tan neʼe, irmaun-irmán sira nafatin sente kontente kuandu Pedro husik hela sira iha Maria nia uma.
16. Tanbasá ita bele fiar katak iha futuru ita sei moris ho kontente?
16 Dala ruma Jeová fó ba ninia atan sira buat neʼebé liu fali sira-nia imajinasaun, tan neʼe sira kontente tebes. Neʼe mak buat neʼebé irmaun-irmán sira sente iha kalan neʼebá. Dala ruma ita mós sente hanesan neʼe bainhira Jeová haraik bensaun ba ita. (Prov 10:22) Iha futuru, ita sei haree Jeová nia promesa hotu sai loos iha mundu tomak. Bensaun neʼebé ita simu sei furak liu fali buat neʼebé ita imajina. Se ita nafatin laran-metin ba Jeová, ita sei moris ho kontente iha futuru.
“Jeová nia anju fó moras ba nia” (Apóstolu 12:18-25)
17, 18. Saida mak halo ema-lubun fó hahiʼi ba Herodes?
17 Herodes hakfodak tanba Pedro bele sai husi komarka, maibé neʼe mós halo nia sai hirus tebes. Herodes haruka lalais tropa sira atu buka Pedro, no tuirmai halo interrogasaun ba guarda sira neʼebé hein Pedro. Ikusmai guarda sira-neʼe “hetan kastigu”, karik kastigu-mate. (Após 12:19) Herodes Agripa laʼós ema neʼebé laran-sadiʼa. Ikusmai mane aat neʼe hetan kastigu ka lae?
18 Karik Herodes sente moe tanba la susesu atu oho Pedro, maibé lakleur deʼit nia hetan oportunidade atu gaba an. Ninia inimigu balu mai atu hasoru nia tanba sira hakarak halo dame ho nia, no neʼe loke dalan ba nia atu koʼalia ba ema-lubun. Lucas hakerek katak bainhira Herodes koʼalia nia “hatais roupa liurai nian”. Matenek-naʼin kona-ba ema Judeu nia istória naran Josefo hakerek katak Herodes nia roupa halo husi osan-mutin no kuandu loro-matan kona liurai, neʼe halo nia nabilan, tan neʼe ema haree nia hanesan maromak ida. Tuirmai Herodes neʼebé foti an komesa koʼalia. Ema-lubun fó hahiʼi ba nia hodi dehan: “Neʼe maromak ida nia lian, laʼós ema nian!”—Após 12:20-22.
19, 20. (a) Tanbasá Jeová fó-kastigu ba Herodes? (b) Tanbasá ita bele sente kmaan hodi hatene istória kona-ba Herodes Agripa nia mate?
19 Só Maromak deʼit mak merese simu hahiʼi, no Maromak haree buat neʼebé akontese! Loloos Herodes iha oportunidade atu sees husi kastigu. Nia bele deʼit dehan ba ema-lubun atu labele halo ida-neʼe. Neʼe mak ezemplu ida kona-ba buat neʼebé temi iha Provérbios 16:18: “Foti an sei halo ema monu.” Tuirmai, “iha momentu neʼe kedas, Jeová nia anju fó moras ba nia”, no halo mane foti an neʼe mate iha dalan neʼebé aat tebes, “ular-oan han [Herodes] no nia mate”. (Após 12:23) Josefo mós hatete katak derrepente deʼit liurai sai moras no liurai rekoñese katak nia hetan moras todan tanba simu hahiʼi husi ema-lubun. Josefo hakerek katak Herodes moras ba loron lima antes nia mate. b
20 Dala ruma haree hanesan ema aat nunka hetan kastigu. Neʼe la halo ita hakfodak tanba “aat-naʼin mak domina mundu tomak”. (1 João 5:19) Maibé Maromak nia atan neʼebé laran-metin dala ruma sente susar bainhira haree hanesan ema aat la hetan kastigu. Tan neʼe istória kona-ba Herodes bele fó kmaan mai ita. Ida-neʼe hatudu katak Jeová tesi-lia duni ba ema aat, no fó-hanoin ita katak nia hadomi justisa. (Sal 33:5) Ikusmai nia sei lori justisa ba mundu.
21. Saida mak lisaun importante liu iha Apóstolu kapítulu 12, no tanbasá neʼe lori kmaan mai ita ohin loron?
21 Istória neʼe remata ho lisaun neʼebé anima tebes ita: “Jeová nia liafuan kontinua habelar no ema barak liután sai fiar-naʼin.” (Após 12:24) Istória kona-ba oinsá serbisu haklaken laʼo ba oin iha tempu uluk, fó-hanoin ita katak Jeová mós haraik bensaun ba serbisu haklaken ohin loron. Klaru katak istória iha Apóstolu kapítulu 12 laʼós deʼit kona-ba apóstolu ida nia mate no oinsá apóstolu seluk sai husi komarka. Maibé neʼe mós hanorin ita lisaun importante kona-ba Jeová no mós oinsá Jeová la husik Satanás atu halakon kongregasaun no serbisu haklaken. Satanás la susesu, no ema seluk neʼebé koko atu hapara serbisu haklaken mós sei la susesu. (Isa 54:17) Maibé ema neʼebé apoia Jeová no Jesus hola parte iha serbisu neʼebé sei susesu. Neʼe halo ita sente kmaan! Ita iha priviléjiu atu haklaken kona-ba “Jeová nia liafuan”!
a Haree kaixa “ Liurai Herodes Agripa I”.
b Doutór no hakerek-naʼin ida fó sai katak sintoma neʼebé Josefo no Lucas hakerek karik mosu tanba lombriga neʼebé halo ninia tee-oan entupidu toʼo halo nia mate. No kuandu pasiente ida kona moras neʼe, dala ruma nia sei muta sai lombriga sira-neʼe ka lombriga dolar sai husi ninia isin kuandu nia mate. Referénsia ida hakerek: “Tanba Lucas mak doutór, nia bele esplika ho klaru saida mak akontese ba [Herodes], no ajuda ita komprende katak nia mate iha dalan neʼebé aat tebes.”
