Irmaun-irmán doben sira:

Domin ba Maromak no ba ema seluk motiva ita atu halo tuir Jesus nia mandamentu neʼebé dehan: “Laʼo bá no hanorin ema husi nasaun hotu atu sai haʼu-nia dixípulu, fó batizmu ba sira.” (Mt 28:​19, 20; Mc 12:​28-31) Kuandu ita haburas domin neʼebé la hanoin an deʼit, neʼe iha kbiit boot no bele book ema neʼebé “prontu atu simu lia-loos neʼebé lori ba moris rohan-laek”.—Após 13:48.

Uluk ita hakaʼas an atu dekór ita-nia liafuan atu haklaken ba ema no fahe publikasaun. Agora ita presiza aumenta ita-nia matenek atu konversa. Ita hakarak hatudu domin ba ema seluk hodi koʼalia kona-ba tópiku neʼebé sira interese. Neʼe katak ita tenke prontu atu adapta tuir sira-nia situasaun no buka-hatene kona-ba buat neʼebé ema ida-idak hanoin daudaun. Oinsá mak broxura neʼe bele ajuda ita?

Broxura neʼe iha lisaun 12. Lisaun ida-idak temi hahalok neʼebé ita presiza haburas atu bele hatudu domin no ajuda ema atu sai Jesus nia dixípulu. Lisaun ida-idak mós fó sai ezemplu kona-ba oinsá Jesus ka ema Kristaun iha apóstolu sira-nia tempu hatudu hahalok neʼe bainhira haklaken. Ita hotu nia hakarak mak laʼós atu dekór deʼit liafuan atu haklaken, maibé buka dalan atu hatudu domin ba ema. Tuir loloos, ita presiza hatudu hahalok sira neʼebé temi iha broxura neʼe iha tempu hotu neʼebé ita haklaken, maibé ita sei aprende oinsá mak hahalok balu importante tebes bainhira ita komesa konversa ho ema, vizita fali, ka dirije estudu Bíblia.

Nuʼudar Ita estuda lisaun ida-idak, hanoin didiʼak kona-ba oinsá mak Ita bele hatudu hahalok neʼe bainhira Ita koʼalia ho ema iha Ita-nia área. Mai ita hakaʼas an atu haburas liután ita-nia domin ba Jeová no mós ba ema. Domin neʼe sei ajuda Ita atu kumpre Ita-nia knaar atu hanorin ema sai Jesus nia dixípulu.

Ami kontente tebes atu serbisu hamutuk ho imi hodi serbí Jeová ho unidade. (Sof 3:9) Ami hein katak Jeová sei haraik bensaun barak ba imi nuʼudar imi kontinua hadomi ema no hanorin sira sai dixípulu!