Husi kiʼik kedas, Samuel hela no serbisu iha tabernákulu, fatin neʼebé ema bá atu adora Jeová. Ó hatene ka lae, tanbasá mak Samuel serbisu iha tabernákulu? Ulukliu, mai ita aprende kona-ba Samuel nia inan, Ana.

Ba tempu kleur, Ana hakarak tebes atu iha oan, maibé nia la bele iha oan. Tan neʼe, nia halo orasaun ba Jeová no husu makaʼas ba ninia ajuda. Nia promete katak, se nia iha oan-mane ida, nia sei fó oan neʼe atu hela no serbí iha tabernákulu. Jeová hatán Ana nia orasaun no nia iha oan-mane ida. Nia tau naran Samuel ba oan-mane neʼe. No hanesan Ana promete tiha ona, kuandu Samuel maizumenus tinan tolu ka haat, Ana lori nia ba tabernákulu atu serbí Maromak.

Amlulik boot iha tabernákulu mak naran Eli. Ninia oan-mane naʼin-rua mós serbí iha neʼebá. Hanoin-hetan ka lae, tabernákulu mak Maromak nia uma neʼebé ema bá atu adora nia, no ema neʼebé serbisu iha neʼebá tenke hatudu hahalok diʼak. Maibé, Eli nia oan-mane sira halo hahalok neʼebé aat tebes. Samuel haree buat neʼebé sira halo. Tuir ó-nia hanoin, maski Eli nia oan-mane sira-nia hahalok aat, maibé Samuel hatudu hahalok saida?— Samuel nafatin hatudu hahalok loos, hanesan ninia inan-aman hanorin ba nia.

Saida mak Eli tenke halo kona-ba ninia oan-mane sira?— Tuir loloos, nia tenke fó kastigu ba sira no la husik ona sira atu serbí iha Maromak nia uma. Maibé Eli la halo ida-neʼe, tan neʼe Jeová hirus nia no mós ninia oan naʼin-rua. Jeová deside atu fó kastigu ba sira.

Iha kalan ida, kuandu Samuel toba-dukur, nia rona ema ruma bolu nia: ‘Samuel!’ Nia halai ba Eli maibé Eli hatete: ‘Laʼós haʼu mak bolu ó.’ Ida-neʼe akontese dala rua tan. Kuandu Samuel rona ba dala tolu, Eli hatete ba Samuel katak, se Samuel rona tan lian neʼe, nia tenke dehan: ‘Jeová, koʼalia ba haʼu, tanba  haʼu rona ba Ita-Boot.’ Samuel halo nuneʼe duni. Depois Jeová hatete ba Samuel: ‘Dehan ba Eli katak haʼu sei fó kastigu ba ninia família tanba buat aat neʼebé sira halo.’ Tuir ó-nia hanoin, fasil ka lae ba Samuel atu hatoʼo mensajen neʼe ba Eli?— La fasil. Maski Samuel taʼuk, maibé nia halo buat neʼebé Jeová hatete ba nia. Ikusmai, buat neʼebé Jeová hatete sai loos. Eli nia oan-mane naʼin-rua mate, no Eli mós mate.

Samuel hatudu ezemplu neʼebé diʼak mai ita. Nia halo buat neʼebé loos maski nia haree ema seluk halo hahalok aat. Oinsá ho ó? Ó hakarak sai hanesan Samuel hodi halo nafatin buat neʼebé loos ka lae? Se ó halo nuneʼe, ó sei halo Jeová no ó-nia inan-aman kontente tebes.